SHemppuwaa Usuppuna

Hayqqidaageeti Awan Deꞌiyoonaa?

Nuuni hayqqiyo wode waaniyoo?

Nuuni ayssi hayqqiyoo?

Hayquwaabaa tumaa eriyoogee minttettii?

1-3. Asay hayquwaara gayttidaagan ay oyshaa oychchii? Dumma dumma haymaanooteti ay zaaruwaa immiyoonaa?

 HA OYSHATI asay shaꞌan qoodettiya layttau oychchiiddi deꞌido oyshata gidishin, keehippe qoppanau bessiya oyshata. Nuuni ay mala asakka gidin woy awankka deꞌiyaaba gidin, ha oyshatu zaaroy nu ubbau koshshiyaagaa.

² Hagaappe kasetiya shemppuwan, Yesuus Kiristtoosa wozoy merinaa deꞌuwau ogiyaa waati dooyidaakko tamaarida. Geeshsha Maxaafay ‘hayqoy deꞌenna’ wodiyaabaa yootiyoogaakka tamaarida. (Ajjuutaa 21:4) He wodee gakkanaashin, asa zaree hayqqees. Eranchcha Kawoy Solomoni “Paxa de7⁠iya asati issitoo haiqqanau de7⁠iyoogaa eroosona” yaagiis. (Eranchchaa 9:5) Nuuni danddyettida keenaa daro wodiyaa deꞌanau koyoos. SHin yaatiiddikka, nuuni hayqqiyo wode waaniyaakko qoppoos.

³ Nuuni siiqiyoogeeti hayqqiyo wode azzanoos. Qassi ‘Eti waani deꞌiyoonaashsha? Waayettiiddi deꞌiyoonaashsha? Nuna wochchiyoonaashsha? Nuuni eta maaddana danddayiyooniishsha? Etaara simmidi gayttaneeshsha?’ yaagidi oychchana danddayoos. Alamiyaa haymaanooteti, ha oyshatuyyo issoy haraappe dummatiya zaaruwaa immoosona. Amaridaageeti, geeshsha deꞌuwaa deꞌikko, saluwaa baasa shin, iita deꞌuwaa deꞌikko, taman xuugettaasa yaagidi tamaarissoosona. Hara haymaanooteti asay hayqqiyo wode, ayyaana alamiyaa biidi ba mayzzatuura deꞌees yaagidi tamaarissoosona. Hara haymaanooteti qassi, hayqqidaageeti garssa bagga alamiyau bi pirddettidi,  haraba gididi simmi yelettoosona yaagidi tamaarissoosona.

4. Hayquwaa xeelliyaagan, daro haymaanooteti issi mala gidida ay qofaa oyqqidonaa?

⁴ Ha haymaanootetu timirttee ubbay issi mala qofan maayettees; hegeekka, nu ashoy hayqqiyo wode, nu bollaappe hayqqenna issibi deꞌees yaagiyaagaa. Beniigaa gidin, ha wodiyan deꞌiyaagaa gidin, ubba haymaanootee gaana danddayettees, nuuni xeellana danddayiiddi, siyana danddayiiddinne qoppana danddayiiddi merinau deꞌana danddayiyoogaa tamaarissees. SHin hegee waani hanana danddayii? Nuussi siyettiyaabaynne nu qofay nu guuggiyaa oosuwaara gayttidaba. Nuuni hayqqiyo wode, nu guuggee oosuwaa essees. Nu guuggee oosuwaa essidaba gidikko, aybikka nuussi siyettennanne hassayanau gidin, beꞌanaunne siyanau danddayokko.

HAYQQIYO WODE TUMUPPE WAANIYOO?

5, 6. Geeshsha Maxaafay hayqqidaageeti deꞌiyo hanotaabaa ay tamaarissii?

⁵ Asi hayqqiyo wode haniyaabay, guuggiyaa Medhdhida Yihoowayyo qosa gidenna. I tumaa erees; ba Qaalaa, Geeshsha Maxaafan, hayqqidaageeti deꞌiyo hanotaa qonccissiis. Geeshsha Maxaafaa qoncce timirttee: Issi uri hayqqiyo wode, deꞌuwan deꞌenna yaagiyaagaa. Hayqoy deꞌuwan deꞌenna hanota. Hayqqida uri beꞌanau, siyanau woy qoppanau danddayenna. Nuuni hayqqiyo wode, nu bollaappe shaahettidi deꞌiya issibinne baawa. Nuussi hayqqenna shemppoy woykko ayyaani deꞌenna. a

⁶ Solomoni paxa deꞌiyaageeti issitoo hayqqanau deꞌiyoogaa eriyoogaa akeeki simmidi: “Haiqqidaageeti aibanne erokkona” yaagidi xaafiis. I he tumaa gujji qonccissiiddi, hayqqidaageeti siiqanau woykko ixxanau danddayennaagaanne “duufuwan oosoi, woikko halchchoi, woikko eri, woikko aadhdhida eratetti” deꞌennaagaa yootiis. (Eranchchaa 9:5, 6, 10) Hegaadankka, Mazamure 146:4y issi uri hayqqiyo wode, a “halchchoi ubbai he gallassikka atti aggees” yaagees. Nuuni hayqqiyaageeta, qassi nu bollay hayqqin appe shaahettidi deꞌana danddayennaageeta. Nu  deꞌoy muqaaddaa tamaa mala. Eexxiya muqaaddaa tamaa toyssiyo wode, tamay toꞌi aggeesippe attin, awanne biidi deꞌenna.

YESUUSI HAYQUWAABAA AY YOOTIDEE?

7. Hayqoy ay malakko Yesuusi waatidi qonccissidee?

⁷ Yesuus Kiristtoosi hayqqidaageeti deꞌiyo hanotaabaa yootiis. Issi wode, i keehippe eriyo Alꞌꞌaazara giyo bitanee hayqqidoogaa siyiis. Hegaappe, Yesuusi ba erissiyo ashkkaratussi: “Nu dabboi Al77aazari xiskkiis” yaagiis. Erissiyo ashkkarati, Alꞌꞌaazarassi sahoy kehana gakkaanaashin, i coo shemppanau xiskkidoogaa Yesuusi yootiyaabadan qoppidosona. SHin eti qoppidoogaadaana gidenna. Yesuusi: “Al77aazari haiqqiis.” yaagidi qonccissiis. (Yohaannisa 11:11-14) Yesuusi hayquwaa xiskkuwaaranne shemppiyoogaara malatissidoogaa akeeka. Alꞌꞌaazari he wodiyan, saluwan gidin, taman xuugettiyo sohuwankka gidin deꞌibeenna. I kiitanchchatuura gidin, ba mayzzatuurakka gidin gayttibeenna. Alꞌꞌaazaari hara asa gididikka yelettibeenna. I aymoy baynna xiskkuwan kayrida uradan, hayquwan shemppi uttiis. Hara wodekka, Yesuusi hayquwaa xiskkuwan leemisiis. I Yaaꞌiroosa naꞌiyo hayquwaappe denttido wode, “na7⁠iyaa xiskkausuppe attin, haiqqabeikku” yaagiis.—Luqaasa 8:52,53.

8. Asi hayqqiyoogee Xoossaa halchcho gidennaagaa waati eranau danddayiyoo?

⁸ Asay hayqqanaadan Xoossay koyroppekka halachchideeyye? Akkay, mule halchchibeenna! Yihooway asaa medhdhidoy, saꞌaa bolli merinau deꞌanaadaana. Ha maxaafan kasetidi tamaaridoogaadan, Xoossay koyro azinaanne maccaasiyo loꞌꞌiya gannatiyan wottiis. I etau kumetta payyatettaa immidi anjjiis. Yihooway etau loꞌꞌo gididabaa xallaa amottiis. Ba naata siiqiya asa oonakka gidin, eti ceegatettaaninne hayquwan metootana mala koyii? Koyennaagee qoncce! Yihooway ba naataa siiqeesinne eti merinau saꞌaa bolli ufayssan deꞌana mala koyiis. Asaa  naata xeelliyaagan, Geeshsha Maxaafay: “Xoossai asaa wozanan merinatettaa wottiis” yaagees. (Eranchchaa 3:11) Xoossay nuuyyo merinau deꞌana koshshay deꞌanaadan oottidi medhdhiis. He koshshay polettana mala issi issi giigissotakka oottiis.

ASAY ASYSSI HAYQQII?

9. Yihooway Addaamessi ay azazo immidee? He azazoy metiyaagaa gidennay aybissee?

⁹ Yaatin, asay ayssi hayqqii? Zaaruwaa demmanau, saꞌaa bolli  issi bitaneenne issi maccaasee xallay deꞌiyo wode, aybi hanidaakko qoppana koshshees. Geeshsha Maxaafay: “GODAI Xoossai xeellanau lo77⁠iya, maanaukka mal77⁠iya ubba qommo mittaa biittaappe mokissiis” yaagidi qonccissees. (Doomettaabaa 2:9) Gidikkonne, etau issi azazoy imettiis. Yihooway Addaama: “Gannatiyaa mittaa teeraa ubbaappe neeni maana giikko ma; shin lo77⁠uwaanne iitaa erissiya mittaa teeraappe mooppa; aissi giikko, neeni appe miido gallassi tumu haiqqana yaagidi azaziis.” (Doomettaabaa 2:16, 17) Hegee azazettanau metenna azazo. Addaameenne Hewaana maana danddayiyo daro mittaa teeray deꞌees. SHin etau polo deꞌuwaa gujjidi, hara darobaa Immidaagaa galatiyoogaa bessiyo keehippe dumma hanotay haꞌꞌi merettiis. Eti azazettiyaaba gidikko, galataa bessiyoogaa xalla gidennan, saluwan deꞌiyaa bantta Aawaa maataa bonchchiyoogaanne a siiqo kaalettuwaa koyiyoogaa bessoosona.

10, 11. (a) Koyro azinaynne a machchiyaa waanidi Xoossaa bonchchennan aggidonaa? (b) Addaameenne Hewaana azazettennan aggido hanotaa wolqqaamabadan xeelliyoy aybissee?

¹⁰ Koyro azinaynne a machchiyaa, Yihoowassi azazettennan agganau koyidoogee azzanttiyaaba. SHooshshaa baggaara Seexaanay Hewaano: “Xoossai tumu inttena, Gannatiyan de7⁠iya mitta teeraa ubbaappekka mooppite giidee?” yaagidi oichchiis. Hewaana zaarada: “Nuuni gannatiyan de7⁠iya mittatatu teeraa maanau danddayoos; shin Xoossai nuna, ‘Gannatiyaassi gidduwan de7⁠iya mitta teeraa mooppite; bochchoppite; hinkkoode intte haiqqana’ giis” yaagaasu.—Doomettaabaa 3:1-3.

¹¹ Seexaanay: “CHii, intte ainnekka haiqqekketa; Xoossai hegaa giidoogee, he mittaa teeraa intte miikko, intte aifee dooyettin, lo77⁠uwaanne iitaa Xoossaadan intte eranaagaa i eriyo gishshaassa” yaagiis. (Doomettaabaa 3:4, 5) Mooppite geetettida mittaappe maada, Hewaana goꞌettiyaabadan ammananaadan, Seexaanay koyiis. Seexaanay giidoogaadan gidikko, a iitaanne kehaa ba huuphiyau kuuyyiyo maatay issi deꞌees; a koyiyoobaa ba huuphiyau oottiyo maatay issi deꞌees. He mittaa teeraa min gakkiya hanotaabaa, Xoossay worddotidaba milatissiyaabaakka Seexaanay yootiis. Hewaana Seexaanaa ammanaasu. Hegaa gishshau, Hewaana he mittaa teeraappe ekkada maasu. Yaatada  ba azinaayyookka hegaappe immin, ikka miis. Eti hegaa oottidoy erennan aggidi gidenna. Xoossay eta oottoppite giidobaa milxxi ootti eriiddi oottidosona. Eti he mittaa teeraa miyoogan, azazettanau bessiya metenna azazuwaa eriiddi naagennan aggidosona. Eti saluwan deꞌiya bantta Aawaanne au deꞌiya maataa bonchchennaagaa bessidosona. Banttana siiqiya Medhdhidaagaa hegaadan bonchchennan aggiyoogee, atto giyooba gidenna!

12. Addaameenne Hewaana Yihoowaara eqettanau doorido wode, Yihoowassi aybbi siyettidaakko, akeekanau aybi maaddana danddayii?

¹² Leemisuwau: Issi neeni yela dichchido naꞌay woykko naꞌiyaa, neeyyo bonchchoynne siiqoy deꞌiyo ogiyan azazettennaagaa  bessiyaaba gidikko, neeyyo aybi siyettanee? Hegan neeni keehippe azzanana. Addaameenne Hewaana Yihoowaara eqettanau doorido wode, Yihooway ay keena keehippe azzanidaakko qoppa.

13. Addaamee hayqqiyo wode, i waananaagaa Yihooway yootidee? Hegee woygiyoogee?

¹³ Azazettibeenna Addaamanne Hewaano merinau deꞌanaadan Yihooway oottiyo ayba gaasoynne deꞌenna. I giidoogaadankka, eti hayqqidosona. Addaameenne Hewaana deꞌuwan deꞌokkona. Eti ayyaana alamiyau pinnibookkona. Hegaa nuuni Addaamee azazettibeenna wode, Yihooway ayyo giidobaappe erana danddayoos. Xoossay: “Neeni biittau simmana . . . neeni biittaappe ekettadasa; neeni baana; neeni baanau simmana” yaagiis. (Doomettaabaa 3:19) Xoossay Addaama biittaa baanaappe medhdhiis. (Doomettaabaa 2:7) Hegaappe kase, Addaamee deꞌenna. Yaatiyo gishshau, Yihooway, Addaamee baanau simmanaagaa yootido wode, Addaamee deꞌenna hanotau simmanaagaa yootiis. Addaamee kase i merettido baanaadan, deꞌoy baynnaagaa gidees.

14. Nuuni hayqqiyoy aybissee?

¹⁴ Addaameenne Hewaana ha wode gakkanaashin deꞌana danddayoosona shin, Xoossaassi azazettanau koyibeenna gishshau, nagaraa oottidi hayqqidosona. Nuuni hayqqiyo gaasoy, Addaameppe nagaraanne hayquwaa a zaree ubbay laattido gishshataassa. (Roome 5:12) He nagaray, ooninne baqati attanau danddayenna, zariyaappe laattiyo iita harggiyaa mala. A geeduwan yiya hayqoy qanggetta. Hayqoy morkkeppe attin, dabbo gidenna. (1 Qoronttoosa 15:26) Ha iita morkkiyaappe attanaadan, Yihooway wozuwaa giigissido gishshatau, nuuni ay keena galatana bessii!

HAYQUWAABAA TUMAA ERIYOOGEE GOꞌEES

15. Hayquwaabaa tumaa eriyoogee minttettiyaagaa gidiyoy aybissee?

¹⁵ Geeshsha Maxaafay hayqqida asay deꞌiyo hanotaabaa tamaarissiyoobay minttettees. Nuuni tamaaridi aadhdhidoogaadan, hayqqida asati waayiyan woykko keehippe azzanttiyaaban  metootokkona. Eti nuna qohana danddayenna gishshau, eta yayyiyo gaasoy baawa. Eti nu maadduwaa koyokkona; qassi nunakka maaddana danddayokkona. Nuuni etaara haasayana danddayokko; etikka nunaara haasayana danddayokkona. Haymaanootiyaa kaalettiya daroti wordduwan, hayqqidaageeta maaddana danddayiyaabadan yootoosona; hegeeta ammaniya asati etau miishshaa qanxxoosona. SHin hayquwaabaa tumaa eriyoogee, hegaa mala wordduwaa tamaarissiyaageetun cimettennaadan teqqees.

16. Daro haymaanootetu timirttiyaa kaalettiyay oonee? Ayba ogiyan?

¹⁶ Neeni kaalliyo haymaanootee, Geeshsha Maxaafay hayqqida asatubaa tamaarissiyoogaara maayii? Daroti maayokkona. Aybissi giikko, eta timirttiyaa kaalettiyay Seexaanaa gidiyo gishshataassa. I worddo haymaanootiyaa goꞌettidi, ashoy hayqqin, eti ayyaana alamiyan deꞌiyoogaa doommoosona giidi asay ammananaadan oottees. Hagee, Seexaanay hara wordduwaa bolli gujjidi, Xoossaa Yihoowappe asaa haassiyo worddo. Hegaa waati oottii?

17. Hayqqida asay merinau waayettees giya timirttee, Yihoowa bonchchissennaagaa gididoy aybissee?

¹⁷ Kaseti akeekidoogaadan, issi issi haymaanooteti, issi uri iita deꞌuwaa deꞌidaba gidikko, hayqqiyo wode merinau waayettanau taman paxa kaaꞌettiyo sohuwaa bees giidi tamaarissoosona. Ha timirttee Xoossaa bonchchissenna. Yihooway siiqiya Xoossaa, qassi hegaa mala ogiyan mulekka asaa waayiyaa bessenna. (1 Yohaannisa 4:8) Azazettenna naꞌi deꞌiyo bitanee ba naꞌaa kushiyaa taman xuuggiyoogan neeyyo aybbi siyettanee? Hegaa mala asa neeni bonchchanee? Ubba neeni he uraara erettanau koyanee? Koyennaagee qoncce! He bitanee meqetti baynna asa gidiyoogaa neeni qoppanaagee qoncce. SHin Seexaanay, Yihooway asaa merinau taman waayiyaa bessees giidi, nuuni ammananaadan koyees.

18. Hayqqidaageetussi goynniyoogee baasettidoy ayba worddo haymaanoote timirttiyaanee?

¹⁸ Seexaanay asay hayqqiyo wode, paxa deꞌiya asatun bonchchettana bessiya ayyaana gidees giidi tamaarissanaadankka  amarida haymaanootetun goꞌettees. He timirttiyaadan gidikko, hayqqida asatu ayyaanay wolqqaama dabbo woykko yashissiya morkke gidana danddayees. Daro asati ha worddo timirttiyaa ammanoosona. Eti hayqqida asaa yayyoosona, etau bonchchuwaa immoosonanne etau goynnoosona. Hegaappe dumma gidida ogiyan, Geeshsha Maxaafay hayqqidaageeti xiskkidabadan deꞌiyoogaanne nuuni issi tumu Xoossaa xalaalau, Yihoowau, nuna Medhdhidaagaunne nuussi koshshiyaabaa Immiyaagau goynnana koshshiyoogaa tamaarissees.—Ajjuutaa 4:11.

19. Hayquwaabaa tumaa eriyoogee, Geeshsha Maxaafaa timirtte gidida awugaa akeekanaadan maaddii?

¹⁹ Hayqqida asatubaa tumaa eriyoogee, haymaanootetu wordduwan cimettiyoogaappe nena naagees. Hegee, neeni Geeshsha Maxaafan deꞌiya hara timirttiyaakka akeekanaadan maaddees. Leemisuwau, asay hayqqiyo wode ayyaana alamiyau pinnennaagaa neeni eriyo wode, gannate saꞌan demmiyo merinaa deꞌuwaa hidootay neessi keehippe tumattees.

20. Kaalliya shemppuwan ay oyshaa beꞌanau deꞌiyoo?

²⁰ Daro wodeppe kase, xillo bitanee Iyyoobi hagaadan oychchiis: “Issi asi haiqqikko, simmidi paxanee?” (Iyyooba 14:14) Hayquwan xiskkiya, deꞌoy baynna uri deꞌuwau simmidi yaanee? Kaalliya shemppuwan tamaaranaagaadan, hegaa xeelliyaagan Geeshsha Maxaafay tamaarissiyoobay keehippe minttettiyaaba.

[Tohossa qofaa]

GEESHSHA MAXAAFAY TAMAARISSIYOOBAA

▪ Hayqqida asati beꞌokkona, siyokkonanne qoppokkona.—Eranchchaa 9:5.

▪ Hayqqida asati shemppidosona; eti waayiyaa beꞌokkona.—Yohaannisa 11:11.

▪ Nuuni hayqqiyoy Addaameppe nagaraa laattido gishshataassa—Roome 5:12.

[Oyshaa]

[Sinttaa 59n diya misiliyaa]

Tamay awu biidee?

[Sinttaa 60n diya misiliyaa]

Yihooway asaa medhdhidoy eti saꞌaa bolli merinau deꞌanaassa

[Sinttaa 62n diya misiliyaa]

Addaamee baanaappe merettiis; baanau simmiis