SHemppuwaa Laappuna

Hayqqida Ne Siiqotuyyo Deꞌiya Tumu Hidootaa

Hayqqidaageeti denddanaagee attennaagaa waatidi erana danddayiyoo?

Hayqqidaageeta denttiyoogaara gayttidaagan Yihoowayyo aybi siyettii?

Hayquwaappe denddanaageeti oonee?

1-3. Nuna ubbaa yedettiiddi deꞌiya morkkee aybee? Geeshsha Maxaafay tamaarissiyoobaa akeekan xeelliyoogee nuussi woppaa ehiyoy aybissee?

 NEENI issi iita morkkiyaappe woxxa baqattaydda deꞌiyabadan ane qoppa. I neeppe wottan keehi eesoteesinne keehippe mino. Ne dabbotuppe amaridaageeta i worishin neeni beꞌido gishshau, i qareti baynnaagaa gidiyoogaa eraasa. Neeyyo danddayettidaagaa keenaa appe baqata attanau baaxetikkonne, i neekko matatti matatti bees. Neeyyo ayba hidootinne deꞌiyaaba milatenna. Gidikkonne, ne qoppennan nena appe ashshiya uri gakkiis. I ne morkkiyaappe keehi wolqqaama; qassi nena maaddanaukka neeyyo qaalaa geliis. Hegee nena hirggaappe ay keena woppissanddeeshsha!

² Neeni hegaa mala morkkee yedettiiddi deꞌiyo mala hanotan deꞌaasa. Nuuni ubbaykka hegaa mala hanotan deꞌoos. Aadhdhida shemppuwan nuuni tamaaridoogaadan, Geeshsha Maxaafay hayquwaa morkke yaagees. Nu giddoppe ooninne appe baqati attanau woy a xoonanau danddayenna. Nu giddoppe daroti ha morkkee nuuni keehi siiqiyoogeeta worin beꞌida. SHin Yihooway hayquwaappe keehi wolqqaama. I nuna Ashshiyaagaanne siiqiyaagaa; qassi ha morkkiyaa xoonana danddayiyoogaa bessiis. Qassi i ha morkkiyaa, hayquwaa, muleera xayssanau qaalaa geliis. Geeshsha Maxaafay, “ubbaappe wurssettan xayana morkkee  haiquwaa” yaagidi tamaarissees. (1 Qoronttoosa 15:26) Hegee mishiraachcho!

³ Nu eriyo issi uri hayqqiyo wode, morkke gidida hayqoy nuna waati qohiyaakko ane qanttan beꞌoos. Hegaadan oottiyoogee, nuna ufayssiya issibaa akeekanaadan maaddees. Hayqqidaageeti naaꞌꞌantto deꞌanaagaa Yihooway qaalaa geliis. (Isiyaasa 26:19) Eta i deꞌuwau zaaridi ehaana. Dendduwaa hidootay hegaa.

SIIQIYO URI HAYQQIYO WODE

4. (a) Siiqiyo asi hayqqiyo wode, Yesuusi bau siyettiyaabaa qonccissido ogee, Yihoowayyo hegan aybi siyettiyaakko nuna tamaarissiyoy aybissee? (b) Yesuusi ayba dumma dabbotaa medhdhidee?

⁴ Hayqoy neeppe shaakkido, ne siiqiyo uri deꞌii? Seelay, azzanoynne aynne oottana danddayennaagee siyettiyo hanotay, danddayidi aattiyoobanne milatenna. Hegaa mala wodiyan minttettiyaabaa demmanau, Xoossaa Qaalaakko xeellana bessees. (2 Qoronttoosa 1:3, 4) Geeshsha Maxaafay, hayquwaa xeelliyaagan Yihoowayyonne Yesuusayyo siyettiyaabaa akeekanaadan nuna maaddees. Ubbaban ba Aawaa milatiya Yesuusi, asi hayqqiyo wode siyettiya seelaabaa erees. (Yohaannisa 14:9) Yesuusi Yerusalaame biyo wode, darotoo Alꞌꞌaazaranne a michcheta, Mayraamonne Martto oychchanau matan deꞌiya katamaa Biitaaniyaa bees. Eti siiqo dabbo gididosona. Geeshsha Maxaafay: “Yesuusi Martto, i michchiyoonne Al77aazara siiqees” yaagees. (Yohaannisa 11:5) Gidikkonne, nuuni aadhdhida shemppuwan tamaaridoogaadan Alꞌꞌaazari hayqqiis.

5, 6. (a) Yesuusi Alꞌꞌaazara dabbotinne laggeti azzaniyaageetuura gayttido wode, waanidee? (b) Yesuusassi siyettida azzanoy nuna minttettiyoy aybissee?

⁵ Ba dabboy hayqqidoogan Yesuusassi aybi siyettidee? Xaafettida taarikee, Alꞌꞌaazara dabbotinne laggeti i hayqqidoogau kayyottishin, Yesuusi etakko biidoogaa yootees. Yesuusi eta beꞌidi keehippe azzaniis. I “ba wozanan daro mishettiis; qassi tookki shemppiis.” Hegaappe, “Yesuusi afuxxiis” yaagidi xaafettida taarikee qonccissees. (Yohaanisa 11:33, 35) Yesuusi azzanidoogee ayyo hidooti baynnaagaa bessii? CHii bessenna.  Ubba issi garamissiyaabi polettana haniyoogaa Yesuusi erees. (Yohaannisa 11:3, 4) Yaaninkka, hayqoy ehiyo seelaynne azzanoy ayyo siyettiis.

⁶ Yesuusau siyettida azzanoy issi baggaara nuna minttettiyaaba. Hegee, Yesuusinne a Aaway, Yihooway, hayquwaa ixxiyoogaa nuna tamaarissees. SHin, Xoossaa Yihooway he morkkiyaa oli xoonana danddayees! Xoossay Yesuusassi ay oottiyo wolqqaa immidaakko ane beꞌoos.

‘‘AL77AAZARAA, HAA KIYA!’’

7, 8. Alꞌꞌaazaara hanotay he sohuwan eqqidi xeelliya asaayyo hidooti baynnaba milatana danddayiyoy aybissee? SHin Yesuusi ay oottidee?

⁷ Alꞌꞌaazari gonggoluwan moogettiis; qassi Yesuusi he gonggoluwaa penggiyaa qumꞌꞌido shuchchaa denttanaadan oychchiis. Moogettoosappe oyddu gallassay aadhdhido gishshatau, Alꞌꞌaazara bollay musiyoogaa doommanaagee qoncce gidiyo gishshau, Martta he qofan maayabuukku. (Yohaannisa 11:39) Asa xeelan, ayba hidootinne deꞌiyooba milatenna.

⁸ SHuchchaa gonddorssin Yesuusi ba qaalaa xoqqu oottidi: “Al77aazaraa, haa kiya!” yaagiis. Hegaappe aybi hanidee? ‘Hayqqida bitanee kiyiis.’ (Yohaannisa 11:43, 44) Hegan deꞌiya asay ay keena ufayttidaakko qoppana danddayay? Eti Alꞌꞌaazarassi isha, dabbo, lagge woykko shooro gidikkonne, i hayqqidoogaa eroosona. SHin eti siiqiyo bitanee ba huuphen eta giddon hekko eqiis! Hegee mulekka hananaba milatennan aggana danddayees. Daroti ufayttidi Alꞌꞌaazara qoommidoogee qoncce. Hegee hayquwaa bolli gakkida ayba ufayssiya xoonoo!

9, 10. (a) Yesuusi Alꞌꞌaazara denttanau i goꞌettido wolqqaa Pulttoy oonakko waatidi qonccissidee? (b) Geeshsha Maxaafan xaafettida dendduwaa taariketa nabbabiyoogau amarida goꞌꞌati aybee aybee?

⁹ Yesuusi ha maalaalissiyaabaa ba wolqqan oottanaagaa yootibeenna. Alꞌꞌaazari kiyanaadan xeesanaappe kase woossido woosan, dendduwaayyo Pulttoy Yihoowa gidiyoogaa qonccisiis. (Yohaanisa 11:41, 42) Yihooway ba wolqqaa hegaadan goꞌettidoy he wode xalla gidenna. Alꞌꞌaazara denddoy Xoossaa Qaalan xaafettida, hegaa mala maalaalissiya uddufun denddotuppe  issuwaa. a He xaafettida taariketa nabbabiyoogeenne xannaꞌꞌiyoogee ufayssiyaaba. Denddidaageetu giddon yelagatinne cimati, attumaageetinne maccaageeti, qassi Israaꞌeeletinne Israaꞌeele gidennaageeti deꞌiyo gishshau, Xoossay asaappe asaa shaakkennaagaa nuna tamaarissees. Qassi ha taariketun qonccidabay ayba ufayssiyaabee! Leemisuwau, Yesuusi issi yelaga naꞌiyo hayquwaappe denttido wode, i aawaynne aayyiya ‘keehi daro garamettidosona.’ (Marqoosa 5:42) Ee, Yihooway etassi mulekka dogettana danddayenna ufayssiyaabaa oottiis.

¹⁰ Yesuusi hayquwaappe denttidoogeeti, wurssettan hayqqidoogee qoncce. Hegee, eta i denttidoogau goꞌꞌi baawa giyoogee? Mulekka hegaadan gidenna. Geeshsha Maxaafan xaafettida ha taariketi keehi koshshiya tumaa boxooxisoosonanne nuussi hidootay deꞌanaadan oottoosona.

DENDDUWAA TAARIKETUPPE TAMAARIYOOGAA

11. Alꞌꞌaazara dendduwaa yootiya taarikee, Eranchchaa 9:5n xaafettida tumaa waatidi boxooxisii?

¹¹ Geeshsha Maxaafay, hayqqidaageeti ‘aybanne erennaagaa’ yootees. Eti awaaninne deꞌokkona; hanettiyaabaykka etau siyettenna. Alꞌꞌaazara taarikee hegaa tumaa boxooxisees. Alꞌꞌaazari denddidi asaayyo saluwaabaa garamissiyaaba yootidee? Woykko eexxiya siꞌooliyaa tamaabaa yashissiyaabaa yootidee? CHii. Geeshsha Maxaafay, Alꞌꞌaazari hegaa malabaa haasayidoogaa yoottenna. Hayqqidi takkido oyddu gallasatun, i ‘aybanne erenna.’ (Eranchchaa 9:5) Alꞌꞌaazari hayquwan xiskkidi takkiis.—Yohaannisa 11:11.

12. Alꞌꞌaazari tumuppe denddidoogaa nuuni ammanana danddayiyoy aybissee?

¹² Alꞌꞌaazara taarikee, denddoy tumubappe attin hayse gidennaagaakka tamaarissees. Yesuusi Alꞌꞌaazara denttishin bantta ayfiyan beꞌida cora markkati deꞌoosona. Ubba Yesuusa ixxiya haymaanootiyaa kaalettiya asatikka, he maalaalissiya oosuwaa kashi erokko gibookkona. Hegaappe eti: “Ha bitanee [Yesuusi]  daro wolqqaama malaataa oottiyo gishshau, ai oottanee?” yaagidosona. (Yohaannisa 11:47) Daro asay, Alꞌꞌaazari denddidaagaa beꞌanau biis. Hegaappe denddidaagan, ubba etappe daroti Yesuusan ammanidosona. Eti Yesuusi Xoossay kiittin yiidoogau, Alꞌꞌaazari paxa deꞌiya naqaasha gidiyoogaa akeekidosona. Hegee keehippe wolqqaama naqaasha gidiyo gishshau, Ayhuda haymaanootiyaa kaalettiya wozanay zozzido asati, Yesuusanne Alꞌꞌaazara naaꞌꞌaakka woranau maqettidosona.—Yohaannisa 11:53; 12:9-11.

13. Yihooway hayqqidaageeta tumuppe denttanaagaa nuuni ammananaadan oottiyaabi aybi deꞌii?

¹³ Denddoy tumuppe hananaba gidiyoogaa ammaniyoogee bessennabee? CHii, Yesuusi, “duufuwan de7⁠iyaageeti” issi gallassi denddanaagaa tamaarissido gishshau, ammanana bessiyaaba. (Yohaannisa 5:28) Deꞌuwan deꞌiyaaba ubbaa Medhdhidaagee Yihoowa. Yaatin, i deꞌuwaa zaarettidi immanaagee ammananau metiyaabee? Hegee, Yihooway hassayiyoobaara keehippe gayttidoogee qoncce. Hayqqida nu siiqota i hassayana danddayii? Qoodidi wurssanau metiya daro xoolintteti saluwan deꞌoosona; shin i eta ubbaassi sunttaa kessiis! (Isiyaasa 40:26) Yaatiyo gishshau, nuuni siiqiyo hayqqidaageetubaa ubbabaa Yihooway hassayees; i etassi zaarettidi deꞌuwaa immanau danddayees.

14, 15. Iyyooba haasayan leemisettidoogaadan, Hayqqidaageetussi zaarettidi deꞌuwaa immiyoogan Yihoowassi aybi siyettii?

¹⁴ Gidoshin, hayqqidaageeta denttiyoogan Yihoowassi aybi siyettii? Geeshsha Maxaafay i hayqqidaageeta denttanau amottiyoogaa tamaarissees. Ammanettida bitanee Iyyoobi: “Issi asi haiqqikko, simmidi paxanee?” yaagidi oychchiis. Iyyoobi bana Xoossay hassayiyo wodee gakkanaashin, duufuwan naagiyo hanotaabaa yootiiddi deꞌees. I Yihoowassi: “Neeni medhdhido tanakka be7anau neeni laamotiyo wode, neeni tana xeesana; xeesin taani neeyyo koyana” yaagiis.—Iyyooba 14:13-15.

¹⁵ Ane qoppa! Yihooway hayqqidaageetussi zaarettidi deꞌuwaa immanau tumuppe laamotees. Yihoowayyo hegaadan siyettiyoogaa eriyoogee wozanappe ufayssiyaaba gidennee? SHin  sinttappe yaana he dendduwaabaa woygana danddayiyoo? Denddanaageeti oonee? Eti awan denddanee?

‘DUUFUWAN DEꞌIYAAGEETA’

16. Hayqqidaageeti ayba mala hanotan deꞌanau denddanee?

¹⁶ Geeshsha Maxaafay denddida asatubaa yootiyoobay, sinttanaa dendduwaabaa darobaa tamaarissees. Hagan saꞌan, hayquwaappe denddida asati zaarettidi bantta siiqiyoogeetuura deꞌidosona. Sinttanaa denddoykka hegaa mala—shin hegaappekka keehi loꞌꞌoba gidana. Nuuni SHemppuwaa 3n tamaaridoogaadan, Xoossaa halchchoy kumetta saꞌay gannate gidanaadaana. Yaatiyo gishshau, hayqqidaageeti denddanay olay, danoynne sahoy kumido saꞌaana gidenna. Etassi, ha saꞌan ufayssaaninne sarotettan merinau deꞌana danddayiyo injjee deꞌana.

17. Denddoy ay keena aaho gidanee?

¹⁷ Denddanaageeti oonee? Yesuusi, “duufuwan de7⁠iyaageeti [“ubbay,” NW] a [Yesuusa] cenggurssaa . . . siyidi . . . duufuwaappe gaxi kiyana” yaagiis. (Yohaannisa 5:28, 29) Hegaadankka Ajjuutaa 20:13y: “Abbai ba giddon de7⁠iya haiqqidaageeta immiis; haiqoinne Si7⁠oolee bantta giddon de7⁠iya haiqqidaageeta immidosona” yaagees. “Si7⁠oolee” asaa naatu ubbaa duufuwaa malaatees. (Gujo Timirttiyaa sinttaa 212-13 xeella.) Ha ubba asaa duufoy mela gidana. Yan shemppiya biilooniyan qoodettiyaageeti ubbay zaarettidi deꞌana. Kiitettida PHauloosi: “Asai ubbai, worddoikka xilloikka haiquwaappe denddana” yaagiis. (Oosuwaa 24:15) Hegau birshshettay aybee?

18. Dendduwaa demmana ‘xillotun’ qoodettiyaageeti awugeetee? Ha hidootay nena ne huuphe waatidi bochchana danddayii?

¹⁸ Yesuusi saꞌaa yaanaappe kase deꞌida, etabaa nuuni Geeshsha Maxaafan nabbabido daro asati, ‘Xillota’ geetettiyaageetuura qoodettoosona. Noha, Abrahaama, Saaro, Muusa, Uruto, Asttironne hara darota qoppana danddayaasa. Xoossaa bolli mino ammanoy deꞌiyo ha asatuppe amaridaageetubay Ibaraawe Maxaafan 11⁠tta shemppuwan odettiis. SHin, nu wodiyan hayqqiya Yihoowa asatikka ‘xillotuura’ qoodettoosona. Dendduwaa hidootaa wolqqan, nuuni hayqoy kaalettiyo ayba yashshaappekka laꞌa kiyana danddayoos.—Ibraawe 2:15.

19. ‘Worddoti’ oonee? Yihooway ba kehatettan eti ayba injjiyaa demmanaadan oottanee?

 ¹⁹ Yihoowabaa aynne eribeenna gishshau, ayyo haggaazibeenna woykko azazettibeenna ubba asatubaashin, woygana danddayiyoo? Ha biilooniyan qoodettiya ‘worddoti’ dogettidi attokkona. Etikka denddidi, tumu Xoossaabaa tamaariyoonne ayyo haggaaziyo wodiyaa demmana. Issi shaꞌu laytta wodiyan, hayqqidaageeti denddidi, saꞌan Yihoowayyo ammanettidaageetuura issippe haggaaziyo injjiyaa demmana. Hegee keehippe ufayssiya wode gidana. Geeshsha Maxaafay Pirdda Gallassaa yaagiyo wodee hegaa. b

20. Gaannabee aybee? Yan yegettiyaageeti oonee?

²⁰ Hegaa yaagiyoogee, hayqqida asay ubbay denddana yaagiyoogee? CHii, gidenna. Geeshsha Maxaafay hayqqidaageetuppe amaridaageeti “Gaannabiyan” deꞌiyoogaa yootees. (Luqaasa 12:5) Gaannabiyaa giyo qaalay, beni wode Yerusalaame katamaappe gaxan buuraa oliyo sohuwaa sunttaappe eketiis. Hayqqidabinne buuray hegan xuugettees. Ahay hegan olettiyo asata Ayhudati, moogoynne denddoy bessennabadan xeelloosona. Yaatiyo gishshau, Gaannabee merinaa xayuwaassi loꞌꞌo leemiso. Paxatunne hayqqidaageetu bolli pirddiyoogan Yesuusi oottiyoobi deꞌiyaabaa gidikkonne, waanna Daannay Yihoowa. (Oosuwaa 10:42) I iitatanne laamettanau koyennaageeta giidi pirddidoogeeta mulekka denttenna.

SALUWAA DENDUWAA

21, 22. (a) Hara ayba qommo denddoy deꞌii? (b) Ayyaana deꞌuwau denddida koyroy oonee?

²¹ Geeshsha Maxaafay, saluwan ayyaana mereta gididi deꞌanau denddiyo hara qommo dendduwaabaakka yootees. (Ajjuutaa 20:6) Geeshsha Maxaafay, hegau leemiso gidiya, polettida issi denddo xallaa yootees; hegeekka Yesuus Kiristtoosa dendduwaa.

²² Yesuusa asay woridoogaappe guyyiyan, Yihooway Ba ammanettida Naꞌay duufuwan attanaadan coꞌꞌu giidi xeellibeenna.  (Mazamure 16:10; Oosuwaa 13:34, 35) Xoossay Yesuusa denttidaba gidikkonne asa ootti denttibeenna. Kiristtoosi: “Asatettan haiqqiis; shin ayyaanan paxiis” giidi kiitettida PHeexiroosi qonccissiis. (1 PHeexiroosa 3:18) Hegee tumukka keehippe maalaalissiyaaba. Yesuusi zaarettidikka wolqqaama ayyaana deꞌuwaa demmiis! (1 Qoronttoosa 15:3-6) Hegaa mala bonchcho dendduwan denddiyoogan Yesuusi koyro. (Yohaannisa 3:13) SHin i wurssetta gidenna.

23, 24. Yesuusabaa gidida ‘amarida dorssa wude’ gidiyaageeti oonee? Eta qooday aappunee?

²³ Yesuusi mata wodiyan saluwaa simmidi baanaagaa eridi, bana kaalliya ammanettidaageetussi i etassi yan ‘sohuwaa giigissanaagaa’ yootiis. (Yohaannisa 14:2) Yesuusi saluwaa biyaageeta ba ‘amarida dorssa wude’ giidi xeesiis. (Luqaasa 12:32) Haratuura geeddarissi xeelliyo wode, guuta gidida ha ammanettida Kiristtaanetu citan deꞌanaageeti aappunee? Ajjuutaa 14:1n deꞌiyaagaadan kiitettida Yohaannisi: “Taani be7aas. Be7⁠ite, Dorssai [Yesuus Kirsttoosi] Xiyoone Deriyaa bolli eqqiis. A sunttainne a Aawaa sunttai som77⁠uwan xaafettido, issi xeetanne oitamanne oiddu sha7⁠u asati aara issippe de7⁠oosona” yaagiis.

²⁴ Yesuusi kiittido ammanettidaageeta gujjin, ha 144,000⁠u Kiristtaaneti saluwaa deꞌuwau denddoosona. Eti denddiyoy awudee? Hegee polettanay Kiristtoosi qoncciyo wode gidiyoogaa kiitettida PHauloosi xaafiis. (1 Qoronttoosa 15:23) Neeni SHemppuwaa 9n tamaaranaagaadan, nuuni haꞌꞌi he wodiyan deꞌoos. Hegaa gishshau, ha wodiyan 144,000⁠tuppe attida amaridaageeti hayqqiyo wode sohuwaara saluwan deꞌanau denddoosona. (1 Qoronttoosa 15:51-55) Asaa naatuppe keehi darotussi qassi, sinttappe Gannate saꞌan deꞌanau denddana hidootay deꞌees.

25. Kaalliya shemppuwan ay tamaaranee?

²⁵ Ee, Yihooway nu morkkiyaa, hayquwaa xoonanaagee attenna; hayqoy merinau xayana! (Isiyaasa 25:8) Gidikkonne, ‘Saluwaa deꞌuwau denddiyaageeti yan ay oottanee?’ gaada neeni qoppennan aggakka. Eti saluwan issi maalaalissiya Kawotettaa aysuwan shaahettana. Nuuni he aysuwaabaa kaalliya shemppuwan gujjidi tamaarana.

[Tohossa qofaa]

GEESHSHA MAXAAFAY TAMAARISSIYOOBAA

▪ Geeshsha Maxaafay hayquwaappe denddidaageetubaa yootiyoogee nuussi ammanettiyo hidootay deꞌanaadan oottees.—Yohaannisa 11:39-44.

▪ Yihooway hayqqidaageetussi zaarettidi deꞌuwaa immanau amottees.—Iyyooba 14:13-15.

▪ Duufuwan deꞌiya asaa naati ubbay denddana. —Yohaannisa 5:28, 29.

[Oyshaa]

 [Sinttaa 69n diya misiliyaa]

Eelaasi issi amꞌꞌee naꞌaa hayquwaappe denttiis. —1 Kawotu 17:17-24

[Sinttaa 69n diya misiliyaa]

Yesuusi kiittido PHeexiroosi Kiristtaane maccaasiyo Dorqqo hayquwaappe denttiis.—Oosuwaa 9:36-42

[Sinttaa 69n diya misiliyaa]

Alaꞌꞌaazari denddidoogan asay daroppe ufayttiis. —John 11:38-44

 [Sinttaa 75n diya misiliyaa]

Hayqqidaageeti Gannatiyan denddidi, bantta siiqiyoogeetuura zaarettidi gayttana