Ixo haasayay, ixuwappe denddidaagan danobaa oottiyogee, zariyan dummatido gishsha xallawu harata qohiyogeenne olay ha wodiyan oduwan darotoo siyiyoba.

•   “Israaꞌeelanne Gaaza olaa gaasuwaninne danobaynne ixoy daranaadan oottiya asaa gaasuwan, ha wodiyan sooshal miidiyan ixo haasayay awudeegaappenne aaruwan dariis.”—Zi Niwu York Taymis, Hidaare 15, 2023.

•   “Xiqimita 7​ppe simmin ixoy, ixo haasayaynne ixuwappe denddidaagan danobaa oottiyogee alamiyan kaseegaappe aaruwan keehi dariis.”—Deeniis Franssisa, Kawotettatu Issippetettaa Jeneral Assembbiliya Prezddanttiya, Hidaare 3, 2023.

 Ixo haasayay, danobaynne olay oorattaba gidenna. Geeshsha Maxaafay “marzze qaalata wonddafiyaa zubbiyaadan dukkanau [giigissidanne]” olaynne danobay daranaadan oottida beni wode deꞌida asatubaa yootees. (Mazamure 64:3; 120:7; 140:1) Gidikkokka, ha wodiyan deꞌiya ixoy issi keehi koshshiyabaa qonccissees.

 Ha wodiyan ixoy darido naaꞌꞌu gaasuwa Geeshsha Maxaafay qonccissees.

1.  1. Geeshsha Maxaafay “daro asaa siiqoy irxxana” wodiya kasetidi yootiis. (Maatiyosa 24:12) Daroti siiqoy gidennan, ixoy daranaadan oottiya eeshshaa bessoosona.—2 Ximootiyoosa 3:1-5.

2.  2. Seexaanaa Dabloosi ha wodiyan ixoy keehi daranaadan oottiis. Geeshsha Maxaafay “ha mule sa7aikka xalahe halaqan [haarettiyogaa]” yootees.—1 Yohaannisa 5:19; Ajjuutaa 12:9, 12.

 Gidikkokka, ixuwawu gaaso gididabata Xoossay mata wode muleera xayssanaagaakka Geeshsha Maxaafay qonccissees. Ubbaappe aaruwan, ixuwa gaasuwan gakkida waaye ubbaa I xayssana. Geeshsha Maxaafay hagaadan giidi hidootaa yootees:

•   “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:4.