Yesuusa wodiyan neeni Galiilan deꞌidabadan qoppa. Daasiyaa Baalaa bonchchanawu Yerusalaame baadasa. Goynuwawu haaho biittaappe yiida daroti kataman kumidosona. Neeni Yihoowawu yarshshuwaa yarshshanawu koyadasa. Yaatiyo gishshawu, deeshshaa goochchada katamaa ogiyan deꞌiya cora asaa giddoora kanttada beeta maqidasiyaa gakkanawu biyoogaa doommaasa. Neeni yaa gakkiyo wode, yarshshanawu biida haratikka beeta maqidasiyan kumidosona. Ne yarshshuwaa qeesiyawu immiyo kayay wurssettan nena gakkiis. He wodiyan, he asaa giddon woy qassi kataman deꞌiya ne ishaa neeni naaqqidobaa hassayadasa. He wode neeni oottana koshshiyaabaa Yesuusi yootiis. (Maatiyoosa 5:24 nabbaba.) Yesuusi yootidoogaadan ne naaqqido ne ishaara waanidi sigettuuteetii? Hagaappe garssan xaafettida ubban likke zaaruwan malaataa wotta.

NEENI OOTTANA KOSHSHIYAABAA:

• Ne ishay yiillotanaadan oottidabay deꞌikko A haasayissa

• Ne ishay bessenna yiillo yiillotidabadan neeni qoppikko woy qassi ikka mooridaba gidikko A suurissanawu mala

• Ne ishay bawu siyettidabaa yootiyo wode danddayan ezgga, qassi neeni wurssa akeekana xayikkonne awu siyettidabawu woy neeni akeekennan oottobay kaalettidobawu wozanappe mooraas ga

NE ISHAY OOTTANA KOSHSHIYAABAA:

• Nena I waati naaqqidaakko gubaaꞌiyan deꞌiya haratussi yootidi eti maaddanaadan oychcho

• Nena amassalidi, ne mooruwaa wurssi yooto, qassi neeni mooraas gaanaadan naago

• Neeni A haasayissanawu ay keena nena kawushshananne xalana koshshidaakko I akeeko, qassi wozanappe coo atto go

Nuuni ha wodiyan goynuwan mehiyaa yarshshana xayikkonne, nu ishaara sigettiyoogee Yihoowa ufayssiya ogiyan ayyo goynniyoogaara gayttidaba gidiyoogaa xeelliyaagan Yesuusi ay tamaarissidee?