Xammaqiya Yohaannisi Xoossay kiittin hananabaa yootiyaagaa. (Luqaasa 1:76) I Yesuusi yelettanaappe guuttaa kasetidi yelettiis. I Masiyawu woy Kiristtoosawu ogiyaa giigissanaadan Xoossay A azaziis. Yohaannisi ba mala Ayhudati Xoossaakko simmanaadan etawu Xoossaa kiitaa yootiis.—Marqqoosa 1:1-4; Luqaasa 1:13, 16, 17.

 Yohaannisi yootidobay Naazireete Yesuusi qaala gelido Masiyaa gidiyoogaa suure wozanay deꞌiyoogeeti akeekanaadan maaddiis. (Maatiyoosa 11:10) Yohaannisi I yootiyoobaa siyiyaageeti bantta nagaraappe simmanaadaaninne hegaa bessanawu xammaqettanaadan minttidi yootiis. (Luqaasa 3:3-6) Yohaannisi daro asaa xammaqido gishshawu xammaqiya Yohaannisa geetettees. Yohaannisi xammaqido ubbaappe aadhdhiya xinqqatee Yesuusa xammaqidoogaa. a—Marqqoosa 1:9

Ha huuphe yohuwan

•  Xammaqiya Yohaannisa haratuppe dumma oottiyaabay aybee?

•  Xammaqiya Yohaannisa yelidaageeti oonee?

•  Xammaqiya Yohaannisa worissiday oonee?

•  Xammaqiya Yohaannisinne Yesuusi issoy issuwaara eqettiyoonaa?

•  Yohaannisa geetetti xeegettiya aappun asati Geeshsha Maxaafan deꞌiyoonaa?

 I oottana geetettidi kasetidi odettidabaa: Yohaannisi sabbakiyo oosuwa oottidoogee, Yihooway kiittido urabaa xeelliyaagan odettida hiraagay polettanaadan oottiis. (Milkkiyaasa 3:1; Maatiyoosa 3:1-3) I ba mala Ayhudati Xoossaa Yihooway kiittin yiida Yesuus Kiristtoosabaa ammananaadan maaddiyoogan, Yihoowassi ‘asaa giigissana’ geetettidi kasetidi odettiday A gidiyoogaa bessiis.—Luqaasa 1:17.

 A taarikiyaa: Yesuusi hagaadan giis: “Xammaqiya Yohaannisappe aadhdhiya ooninne de7ibeenna; shin saluwaa kawotettan ubbaappe laafiyaageekka appe aadhdhana.” (Maatiyoosa 11:11) Yohaannisi hananabaa yootiyaagaa xalla gidennan, abay kasetidi odettido ‘kiitettidaagaa’ gidiyo gishshawu, appe kase deꞌida Xoossaa ashkkaratun appe aadhdhiyaabi baa gaana danddayoos. Qassi, Yohaannisi Xoossaa Kawotettan kawo gidana danddayennaagaa Yesuusi yootidobay bessees. b Ha ammanettidi hananabaa yootidaagee asay saluwaa baanaadan Kiristtoosi hanotaa injjeyanaappe kase hayqqiis. (Ibraawe 10:19, 20) Gidikkonne, Yohaannisawu Xoossaa Kawotettaa haaruwan gannate saꞌan merinawu deꞌiyo hidootay deꞌees.—Mazamure 37:29; Luqaasa 23:43.

 Yohaannisa yelidaageeti Zakkaariyaasanne Elssaabeexo giyo aqo laggeta. Zakkaariyaasi Ayhuda qeese. Yohaannisi maalaalissiya ogiyan yelettiis; ayssi giikko, A aayyiyaa mayne woy naꞌa yelana danddayukku. Qassi, akka Zakkaariyaasikka “daro cimidosona.”—Luqaasa 1:5-7, 13.

 Kawuwaa Heeroodis Anttiphaasi Yohaannisa qooriyaa muucissiis. I hegaadan oottidoy A keettaayyiyaa Heeroodiyaada I yaatanaadan ba naꞌen A oyshissido gishshataassa. Geella Ayhuda asa gidana danddayiya Heeroodisi O machchiyoogee, Ayhudatu higgiyan danddayettennaba gidiyoogaa I Heeroodisawu yootido gishshawu, A Yohaannisa keehi ixxawusu.—Maatiyoosa 14:1-12; Marqqoosa 6:16-19.

 Eti issoy issuwaara eqettoosona giyo qofay Geeshsha Maxaafay yootiyooba gidenna. (Yohaannisa 3:25-30) Yohaannisi Masiyawu ogiyaa giigissiyoogee ba aawatetta gidiyoogaa qoncciyan yootiisippe attin aara eqettibeenna. Yohaannisi hagaadan giis: “Israa7eela asau a qonccissanaassi haattan xammaqaidda yaas.” I gujjidikka, Yesuusi “Xoossaa Na7aa gididoogaa” yootiis. (Yohaannisa 1:26-34) Yaatiyo gishshawu, Yohaannisi Yesuusa haggaazuwaabaa siyidi keehi ufayttiis.