Asaa kawotettay Xoossaara olettiyo wurssetta olay Armmageedoona olaa geetettees. He kawotettatinne etawu exatiyaageeti Xoossawu azazettennan ixxiyoogan, ha wodiyankka aara eqettoosona. (Mazamure 2:2) Asa kawotetta ubbay Armmageedoona olan xayana.—Daaneela 2:44.

 “Armmageedoona” giyo qaalay Geeshsha Maxaafan Ajjuutaa 16:16n xallan deꞌees. ‘Saꞌaa kawoti ubbay Ibraawettuwan Armmageedoona giyo sohuwan Ubbaappe Wolqqaama Xoossaa gita gallassan’ olaayyo shiiqanawu deꞌiyoogaa Ajjuutaa maxaafan deꞌiya hiraagay yootees.—Ajjuutaa 16:14.

 Armmageedoona olan olettanay oonee? Yesuus Kiristtoosi saluwan deꞌiya olanchchata kaalettiyoogan Xoossaa morkketa muleera xayssana. (Ajjuutaa 19:11-16, 19-21) He morkketi, Xoossaa ixxiyaageetanne A bonchchennaageeta.—Hizqqeela 39:7.

 Armmageedoona olay deꞌanay Giddo Arshsho xallaanee? CHii. Armmageedoona olay kumetta saꞌan deꞌana.—Ermmaasa 25:32-34; Hizqqeela 39:17-20.

 Armmageedoona giyo qaalay Ibraawettuwan issi issitoo, “Har–Mageedon” geetettees. Hegee, “Magiddo Deriyaa” giyoogaa. Magiddoy beni Israaꞌeela biittan deꞌiya katamatuppe issuwaa. Keehi wolqqaama olati he sohuwan olettidoogaa taarikee yootees. He olatuppe amaridaageeti Geeshsha Maxaafankka deꞌoosona. (Daannata 5:19, 20; 2 Kawotu Maxaafaa 9:27; 23:29) SHin, Armmageedooni tumuppe Magiddo heeran deꞌiya sohuwaa qonccissiyaaba gidenna. He sohuwan, ha wodiyan gita deree baawa; qassi Armmageedoona olaa wode Xoossaara olettiya morkketussi he sohoy gidenna. SHin Armmageedoona olaa wode, saꞌan deꞌiya kawotettati ubbay Xoossaara olettanawu shiiqana.

 Armmageedoona olaa wode aybi hananee? Xoossay Armmageedoona olaa wode ba wolqqaa bessanawu ay goꞌettanaakko nuuni erennaba gidikkonne, I kase goꞌettidoogaadan shachchaa, biittaa qaattaa, wolqqaama iraa, eexxiya tamaa, diinniya, wolqqanttaanne harggiyaa malabaa goꞌettana danddayees. (Iyyooba 38:22, 23; Hizqqeela 38:19, 22; Imbbaaqooma 3:10, 11; Zakkaariyaasa 14:12) He wode Xoossaa morkketuppe amaridaageeti shabbirettidi, issoy issuwaa worana. SHin etaara olettiiddi deꞌiyaagee Xoossaa gidiyoogaa eti akeekana.—Hizqqeela 38:21, 23; Zakkaariyaasa 14:13.

 Armmageedoona olay saꞌaa muleera xayssanee? Akkay, xayssenna. Ayssi giikko, nuuni merinawu deꞌanaadan Xoossay saꞌaa medhdhiis. (Mazamure 37:29; 96:10; Eranchchaa 1:4) Xoossaa ashkkaratuppe ‘zaway baynna daroti’ attanawu deꞌiyo gishshawu, Armmageedoona olay asa ubbaa muleera xayssenna.—Ajjuutaa 7:9, 14; Mazamure 37:34.

 Issi issitoo, Geeshsha Maxaafan ‘saꞌaa’ geetettida qaalay Xoossaayyo azazettennaageeta qonccissees. (1 Yohaannisa 2:15-17) Yaatiyo gishshawu, Armmageedoona olay ‘wodiya wurssettaa’ qonccissees.—Maatiyoosa 24:3.

 Armmageedoona olay doommanay awudee? Armmageedoona olaappe kase doommana gita waayiya xeelliyaagan Yesuusi yootido wode hagaadan giis: “He gallassaanne he saatiyaa Aawaa xalaalaappe attin, harai atto saluwan de7iya kiitanchchata gidin, woi tana Na7aa gidinkka ooninne eriyaabi baawa.” (Maatiyoosa 24:21, 36) SHin Armmageedoona olay doommanay, Yesuusi beettenna hanotan qoncciyo wodiyaana gidiyoogaa Geeshsha Maxaafay yootees. He wodee 1914n doommiis.—Maatiyoosa 24:3.