Ikwaha piili vasumanani, Anamoona a Yehova annithukumana wira amukokhorele Muluku mapuro aniihaniwa Empa ya Omwene. Etthu xeeni enipakiwa mmithukumanoni? Xeeni vari aya vooloka nyuwo orowela mithukumano iyo?

•  Etthu xeeni eniiraneya Empa ya Omwene?

•  Xeeni vari aya vooloka orowela mithukumano?

•  Ele amiravo akina anihimya aya

 Empa ya Omwene, opuro atthu anithukumana aya wira yiixutte moota Biibiliya onnikhaliherya awe khula nihiku. Mithukumano iyo nyuwo pooti:

•   wiixutta ekeekhai voohimya sa Muluku.

•   osuwela etthu eniiriha wiiraneya itthu sooxankiha olelo-va.

•   okhala mutthu ooloka.

•    waaphwanya apatthani ooloka.

 Nyuwo mwaanisuwela? Mapuro Anamoona a Yehova anithukumana aya wira apake mithukumano aniihaniwa Ipa sa Omwene mwaha woowi Omwene wa Muluku mwaha onimakela othokoreriwa mapuro awo.​—Matheyo 6:​9, 10; 24:14; Luka 4:​43.

 Itthu munrowa anyu wiixutta sinimookhaliheryani. Malakiheryo a mBiibiliyani anithokoreriwa mithukumano sa Anamoona a Yehova animookhaliheryani okhalana “ankhili”. (Miruku 4:5) Eyo enooniherya wira Biibiliya pooti wookhaliheryani opaka soothanla sooloka mookumini mwanyu. Nave pooti wookhaliheryani osuwela waakhuliwa wa makoho ootthuneya, ohela muhina makoho ntoko ala:

•   Tiivi eri yoolakela ya okumi?

•   Niireke Muluku tonikumiherya mixankiho sahu?

•   Exeeni eniiraneya mutthu akhwa?

 Myaha sikina sinithokoreriwa mithukumano sa wanikisa wa esumana sinihela muhina myaha iya:

•   Xeeni Vari Aya Vooloka Otthara Malakiheryo a mBiibiliyani?

•   Ninrowa Ophwanya Woowi Nikhaliheryo Okathi wa Mixankiho?

•   Olelo-va, Omwene wa Muluku Onipaka Exeeni?

 “Nihiku nimosa, mutthu kaasomana aka oxikola aahirwa omithukumanoni. Owo aakilaathale ni amusi aka, nto naahimooliha eliivuru ahu. Nuumala-vo, aahikileela wira aahisiveliwa vanceene ni ikomentaario atthu akina yaavaha aya. Nave aahimmye wira okerexa wawe khaarina iliivuru ntoko hiyo nrina ahu”.​—Brenda.

 Nyuwo mwaanisuwela? Empa ya Omwene, khenivirihiwa ephace wala eparatho ovekiwaka musurukhu.

 Atthu akina animoolipihani. Biibiliya onihimya wira etthu ekina eniwiiriha maKristau othukumana ori ‘olipihana mukina ni mukhwaawe’. (aHeeberi 10:24, 25) Okhala ni atthu anihela soophavela sa Muluku ni sa atthu akina nipuro noopacerya, onninikhaliherya vanceene olumwenku ola wootakhala.

 “Hata kikhulumunwe ene vanceene nuumala ovara muteko nihiku notheene, atthu a Empa ya Omwene anookilipiha vanceene. Kintthikela owaani kihakalanle ene vanceene ni oolikana ene ovilela nihiku ninttharelana”.​—Elisa.

 Nyuwo mwaanisuwela? Olumwenku wotheene sookhala miloko sa Anamoona a Yehova sinivikana 120.000 sinithukumana Ipa sa Omwene sinivikana 60.000. Khula mwaakha, olumwenku wotheene sinnitekiwa Ipa sa Omwene sinivikana 1.500 wira athukumaneke atthu anceene. *