Niireke Muluku Onikhala Mapuro Otheene?
Waakhula wa Biibiliya
Muluku onniweha itthu sotheene ni onnipaka ele oniphavela awe. (Miruku 15:3; aHeeberi 4:13) Masi Biibiliya khoniixuttiha wira Muluku onikhala mapuro otheene okathi omosaru. Ohiya-vo, owo onihimya wira ori ntoko mutthu orina opuro onikhala awe.
Mukhalelo wa Muluku: Muluku ti munepa. (Yohani 4:24) Eyo enooniherya wira apinaatamu khaniwerya onweha. (Yohani 1:18) Sowoonihiwa sa Muluku silempwale mBiibiliyani, okathi wotheene sinnooniherya wira ookhalana opuro onikhala awe. Owo khonikhala mapuro otheene.—Yesaya 6:1, 2; Wiisuupulula 4:2, 3, 8.
Muluku ookhalana opuro onikhala awe: Okhala wira Muluku ti munepa, owo onikhala nipuro apinaatamu ahinwerya aya woona. Masi nipuro nno ti neekeekhai, maana Muluku onikhala “wirimu”. (1 Mamwene 8:30) Biibiliya onnihimya okathi “malaikha a wirimu yalimalenlyaya othukumana wa Muluku”, * ela enooniherya wira Muluku khonikhala mapuro otheene.—Yobi 1:6.
Akhala wira Muluku khonikhala mapuro otheene, kiireke onnikikhapelela?
Aayo. Muluku onnaakhapelela atthu otheene. Nnaamwi Muluku okhalaka wiirimu, owo onnaaweha ni onnaakhapelela atthu anikhala valaponi, yaawo anipaka itthu sooloka wira amusiveliheke. (1 Mamwene 8:39; 2 Wahala 16:9) Nwehe inamuna vakhaani Yehova onooniherya awe wira onnaavaha efaita ni waakhapelela atthu otheene animukokhorela:
Okathi munivekela anyu: Yehova onniwiriyana mavekelo anyu okathi munilavula anyu.—2 Wahala 18:31.
Okathi munixanka anyu wala oriipiwa murima: “Apwiya ankhala vakhiviru n’ale òtemwa: anniwòpola alipa-òwojeya”.—Esalimo 34:19.
Okathi muniphavela anyu malakiheryo: Yehova ‘onimovahani miruku’ orumeelaka Nuulumo nawe Biibiliya.—Esalimo 32:8.
Itthu sowoothiwa voohimya sa opuro Muluku onikhala awe
Itthu Sowoothiwa: Muluku onikhala opuro wotheene.
Ekeekhai: Muluku khonikhala valaponi nnakhala nipuro nikina nnooneya. (1 Mamwene 8:27) Ekeekhai wira itheneeri ni soopattuxiwa sikina ‘sinnilaleya ovuwa wa Muluku’. (Esalimo 19:2) Masi Muluku khonikhala mapuro opattunxe awe valaponi ntoko siisaale mutthu onipintari ekwaaturu ohinikhala awe ekwaaturu opintanri awe. Masi hata vari siiso, ekwaaturu eyo ennooniherya mikhalelo sa mutthu opintanri. Mwa enamuna emosaru, itthu sinooneya Muluku opattunxe awe ‘sinninsuweliha’ mikhalelo sawe ntoko owerya, ankhili ni ophenta.—aRoma 1:20.
Itthu Sowoothiwa: Muluku ohaana okhala mapuro otheene wira osuweleke itthu sotheene siniiraneya ni okhala oowerya sotheene.
Ekeekhai: Munepa wowaarya wala ikuru sa Muluku sinnivara muteko. Nto orumeelaka munepa awe wowaarya, Muluku onniweha ni onnipaka khula etthu ni khula opuro hata ohikhanle opuro ene yoowo.—Esalimo 139:7.
Itthu Sowoothiwa: Esalimo 139:8 ennooniherya wira Muluku onikhala mapuro otheene maana enihimya so: “Kawelá wirimu, nyuwo muri weiwo: kakhuruwela elapo y’alipa-òkhwa, nyuwo munkhala weiwo”.
Ekeekhai: Eversiikulu ela kheniphavela ohimya wira Muluku onikhala mapuro otheene. Masi eversiikulu ele eri ntoko epoesia eniphavela ohimya wira Yehova onninikhaliherya moohicikha opuro nri ahu.
^ Ntoko Biibiliya onihimya awe, Yehova nsina na Muluku.
You May Also Like
WAAKHULIWA WA MAKOHO A MBIIBILIYANI
Munepa Woowaarya Exeeni?
Sookhala itthu sinimwiiriha Biibiliya ohimya wira munepa woowaarya “matata” a Muluku.
ONISUWELA
Nvekele Oxukuriwa
Muthokoorerye nikoho na mBiibiliyani, aahiiso mwiixutte itthu sinceene voohimya sa Anamoona a Yehova.