Mahiku ala, soohimmwa sinnimwaramwareya moowaakuveya orumeeliwaka jornal, radio, tv ni interneti. Masi ale animukokhorela Muluku a ekeekhai annikhalana ephoole wira ahimwaryamwarye soohimmwa iyo sowoothiwa hata moohilakela. (Esa 31:6; Okh 23:1) Waaleela atthu akina itthu nihinsuwela ahu saana pooti waakumiherya maxakha. Vakhala wira nnimwaanyiherya vaareerelaka waaleela atthu akina wala nnaari yoohimmwa eyo, niikoheke so:

• ‘Niireke yoohimmwa ela ti yoororomeleya?’ Woonasa wene mutthu ooleelaleni khonsuwela itthu sotheene sa mwaha owo. Ohiya-vo soohimmwa iyo sinniturukeya khula okathi sinihimmwa aya ni mutthu mukina. Nto, ale arina iparakha mmulokoni ahaana okhalana ephoole yuulupale ni itthu analeelaya atthu akina

• ‘Kahimya vale etthu ela atthu akina anrowa omoonelaka sai munna owo?’ Akhala wira etthu mwiiwale anyu enoohonona nsina na mutthu mukina wala omuulihiha muru, vaamureerela ohaaleela atthu akina.—Mir 18:8; aFi 4:8

• ‘Niireke ehapari ela ti ya ekeekhai?’ Mukhalaneke ephoole okathi muniiwa anyu soohimmwa wala sowiiraneya sinkhala ntoko ti sa ekeekhai

NWEHE EVIIDIYU ENI: KINROWA OWERYA SAI OHIYA WAAPA? NUUMALA-VO MWAAKHULEKE MAKOHO ALA ANITTHARELANA:

• Moovarihana ni Miruku 12:18, moolumo ahu anlikanyihiwa ni xeeni?

• Moovarihana ni aFilipi 2:4 naalavuleke sai atthu akina?

• Exeeni ninrowa ahu opaka akhala wira okathi ninvaanela ahu ninnipacerya omulavula moohiloka mutthu mukina?

• Makoho xeeni ninreerela ahu wuupuwelela, nihinatthi opacerya waalavula moohiloka atthu akina?