1, 2. Nikoho xeeni ninreerela anyu wiikoha, ni xeeni nryaaya nootthuneya?

YOOSOMA anyu ya Biibiliya, ehookhaliheryani woona wira atthu anceene anihimya omukokhorela Muluku anniixuttiha aahiiso annipaka itthu seiye Muluku oninyokha awe. (2 aKorinto 6:17) Ti nthowa naya Yehova vanniruma awe wira nikhume etiini yoowootha, niire so, “oBabilonia Wulupale”. (Wisupulula 18:2, 4) Nto nyuwo munrowa opaka exeeni? Khuta mmosa a hiyo nihaana othanla yoopaka, nave nihaana wiikoha so: ‘Kiireke kiniphavela omukokhorela Muluku mwa enamuna enimusivela, aahiiso mwa enamuna kilimalenle aka ni enikisivela?’

² Akhala wira moohiya aahiiso okhuma etiini yoowootha, moopaka etthu yooloka. Masi pooti wira sookhala sowiira ni soolema sikina nlelo sirina anyu sa etiini yoowootha. Vano, nrowe nthokorerye sowiira ni soolema iyo, nave niwehe nthowa naya vantthuneya aya okhalana moonelo mmosaru orina awe Yehova.

3. (a) Xeeni atthu akina anoona aya ovila ohirumeela ilatarato okathi animukokhorela aya Muluku? (b) Biibiliya onihimya exeeni mutthu omukokhorela Muluku orumeelaka ilatarato?

³ Mwa iyaakha sinceene, atthu akina annirumeela ilatarato, nave annipaka iyoowa aahiiso ixilompa vate vaya wira amukokhorele Muluku. Akhala wira nyuwo munipaka etthu emosaru, pooti oxankiheya aahiiso ohikupali wira vanniweryaneya omukokhorela Muluku muhirumeelaka ilatarato. Masi muupuweleke wira Yehova tonniixuttiha moota woomukokhorela.  Moowiiwanyeya Biibiliya onihimya wira Yehova khoniphavela orumeela ilatarato okathi onimukokhorela ahu.​—Mmusome Okhuma 20:4, 5; Esalimo 115:4-8; Yesaya 42:8; 1 Yohani 5:21.

4. (a) Xeeni vahinreerela aya waakokhorela amuhavinre ahu? (b) Xeeni Yehova aakhoottihenrye awe arumeyi awe weererya olavula ni alipa-ookhwa?

⁴ Atthu anceene anniviriha okathi munceene wira yaahakalalihe amuhavinre aya akhwiiye. Nave-tho annaakokhorela. Masi nihiixutta wira atthu akhwiiye khaniwerya onikhaliherya nnakhala onihaaxa. Awo kharina okumi. Ti vootakhala weererya ovaanela ni alipa-ookhwa, nnaamwi atthu yuupuwelaka wira anilavula ni alipa-ookhwa, masi ekeekhai ti yoowi anilavula ni minepa sootakhala. Ti nthowa naya, Yehova aarumme awe aIsarayeli wira aheererye olavulana alipa-ookhwa nnakhala wiirela mpantta onammunepani.​—Otumererya 18:10-12; nwehe Enoota 26 ni 31.

5. Exeeni enrowa wookhaliheryani ohiya okokhorela ilatarato ni amuhavinre anyu wira mmukokhorele Muluku paahi?

⁵ Exeeni enrowa wookhaliheryani ohiya okokhorela ilatarato ni amuhavinre anyu wira mmukokhoreleke Muluku paahi? Muhaana omusoma Biibiliya ni wuupuwelela moota Yehova onoonela awe itthu iyo. Yehova onithokorerya itthu iyo okhala soohiirya aahiiso soohiloka. (Otumererya 27:15) Munvekeleke Yehova khuta nihiku wira ookhaliheryeni woona itthu iyo ntoko sinoonela awe ni wira mmukokhoreleke mwa enamuna enimusivela. (Yesaya 55:9) Tthiri mukupaliki wira Yehova onimookhaliheryani omaliha itthu sinivarihana ni okokhorela wowootha.

6. Xeeni vahalaka othanliwa nihiku na 25 a Dezembro, wira nuupuweleliweke oyariwa wa Yesu?

⁶ Natali niira nootepa ovuwa olumwenku wotheene, nto  atthu akina anoona wira anuupuwelela oyariwa wa Yesu. Masi Natali onivarihana ni okokhorela wowootha. Eliivuru emosa enihimya wira yaari efesta ya epakau aRoma yuupuwelela aya oyariwa wa nsuwa nihiku na 25 a Dezembro. Ahooleli a itiini yaaphavela wira atthu anceene yahaarina etiini aahiiso mapakau akhale maKristau, nto nnaamwi Yesu ahaayariwe 25 a Dezembro, yaahithanla nihiku nna wira yuupuweleleke oyariwa wa Yesu. (Luka 2:8-12) Masi awiixutti a Yesu khiyaamwiira Natali. Eliivuru emosa enitthokiherya wira iyaakha 200 nuumala Yesu oyariwa, “khuuvo aasuwela ni khuuvo aathokorerya nihiku Yesu aayariwa awe”. (Oringens Sagradas de Coisas Profundas) Wuupuwelela niira na Natali nipacenrye iyaakha imiya sinceene nuumala Yesu okhala valaponi.

7. Xeeni maKristau eekeekhai ahimmulya aya Natali?

⁷ Atthu anceene annisuwela wira Natali opacenrye ni mapakau ni soolema saya, ntoko ifesta sa ovaha-nana itthu. Mwa ntakiheryo, wInglaterra ni mipantta sikina sa wAmerica, waahikhala okathi waakhoottihiwa aya omulya Natali maana atthu yaahisuwela wira Natali opacenrye ni mapakau. Nto khula mutthu aamulya Natali anihukhummwa. Masi nuuvira okathi atthu yaahitthikela-tho omulya Natali. Xeeni maKristau eekeekhai ahimmulya aya Natali? Mwaha woowi aniphavela omuhakalaliha Muluku mwa itthu sotheene sinipaka aya.

8, 9. Xeeni maKristau oopacerya yahuupuwelela aya nihiku naayariwa mutthu?

⁸ Niira nikina noovuwa olelo-va ti wuupuwelela nihiku mutthu oyariwa awe. Niireke maKristau ahaana wuupuwelela nihiku ayariwa aya? Niira na wuupuwelela nihiku mutthu oyariwa awe ninromoliwa mBiibiliyani, naapakiwe ni atthu  yahaamukokhorela Yehova. (Maphattuwelo 40:20; Marko 6:21) Nave niira na wuupuwelela nihiku mutthu oyariwa awe naapakiwa moophavela waattittimiha amuluku eethiru. Ti nthowa naya maKristau oopacerya “yoona aya okhala yoolema ya amalapo aahiiso mapakau wuupuwelela nihiku na oyariwa wa khuta mutthu”.​—The World Book Encyclopedia.

⁹ Atthu a oRoma ni oGresia yaakupali wira nihiku mutthu aayariwa awe ookhala munepa waakhala vaavo, ni yaakupali wira munepa owo waarowa omwaakiheryaka mutthu owo okumi awe wotheene. Eliivuru The Lore of Birthdays enihimya wira: “Munepa owo waanivarihana mootikiniha ni muluku a wuupuwelela nihiku naayariwa awe mutthu owo”.

10. Xeeni maKristau olelo-va ahinuupuwelela aya nihiku nooyariwa?

¹⁰ Niireke munoona wira Yehova onnisiveliwa niira ninvarihana ni etiini yoowootha? (Yesaya 65:11, 12) Nnaari. Ti nthowa naya nihinuupuwelela ahu nihiku niyarinwa ahu aahiiso niira ninvarihana ni etiini yoowootha.

11. Xeeni atthu akina anitthapela aya nihiku na iferiado? Masi etthu xeeni eri yootepa otthuneya wa nyuwo?

¹¹ Nnaamwi atthu akina asuwelaka wira Natali ni iferiado sipacenrye ni mapakau, awo annivikaniha opaka ifesta iyo. Anuupuwela wira mahiku awo annaavaha okathi wira akhaleke ni amusi aya. Ankhi nyuwo munuupuwela siiso? Khahiyo etthu yootthekeya oviriha okathi ni amusi anyu. Yehova tokumihenrye etthoko ni oniphavela wira nikhalaneke wataana wooloka ni amusi ihu. (aÉfeso 3:14, 15) Masi, ompatthani ni Yehova ti wootepa otthuneya ovikana waahakalaliha amusi ihu nipakaka ifesta soohiloka sa itiini sowootha. Ti nthowa naya murummwa Paulo aahimmye awe so: “Mphaveleke othanla itthu sinasivela Apwiya”.​—aÉfeso 5:10.

12. Exeeni yaarowa wiiriha eferiado oheemereriwa ni Yehova?

 ¹² Atthu anceene khanoona otthuneya waya osuwela ipacereryo sa iferiado, masi Yehova khonuupuwela siiso. Okhala wira khonisiveliwa ni iferiado sinikhuma etiini yoowootha aahiiso sinaavuwiha apinaatamu nnakhala sinivuwiha ithoonyeryo sa elapo. Mwa ntakiheryo, atthu a wEjiitu yaanipaka ifesta sinceene sa amuluku oowootha. Nuumala aIsarayeli woopoliwa wEjiitu, awo yaahitthara ifesta sa epakau ahimyaka wira “nirá no wattapela Apwiya!” Masi Yehova aahaahukhumu mwaha woopaka eyo. (Okhuma 32:2-10) Tivonto profeta Yesaya, aahimmye wira: “muhivaré itthu sa mwikho”.​—Mmusome Yesaya 52:11.

13. Vaavo vanithanla anyu ohiya opaka ifesta iya, makoho xeeni munrowa anyu wiikohaka?

¹³ Vaavo vanithanla anyu ohiya opaka ifesta iya, pooti wira munookhalana makoho manceene. Mwa ntakiheryo: Kinrowa opaka exeeni akhala wira ale anivarana aka muteko annikikoha wira: xeeni ohimulyaka Natali? Ankhi mutthu akivaha etthu okathi wa Natali, kinrowa opaka exeeni? Kinrowa opaka exeeni akhala wira ole othelane aka oniphavela wira kimulyeke Natali? Kinrowa waakhaliherya sai anaaka wira ahiriipiwe murima mwaha wa ohimulya Natali aahiiso wuupuwelela nihiku ayariwa aya?

14, 15. Munrowa opaka exeeni akhala wira mutthu ohimya wira nvirihe saana nihiku na eferiado aahiiso onoovahani etthu?

¹⁴ Ti vootthuneya waarumeela ankhili wira musuwele etthu yoopaka aahiiso yoohimya wa khuta mwaha. Mwa ntakiheryo, akhala wira mutthu onihimya wira nvirihe saana nihiku na eferiado, khivanitthuneya ohaacalela. Masi nyuwo pooti ohimya wira: “Kooxukhuru”. Nto akhala wira mutthu oniphavela osuwela mathowa aya, nyuwo pooti othanla omutthokiherya. Masi okathi wotheene, mwaareereleke murima atthu awo ni waattittimiha. Biibiliya onihimya wira:  “Okathi p’ukathi molumo anyu ekhaleke òrera ni owèleliwa ni makha: musuwele omwakhula khula mutthu ntoko vanrerelaya”. (aKolosi 4:6) Pooti waatthokiherya wira munnisiveliwa oviriha okathi mutthekulaka ni a atthu akina, ni waavaha etthu masi khamunipaka eyo okathi wa ifesta wala iferiado.

¹⁵ Sai akhala wira mutthu onoovahani etthu okathi owo? Biibiliya khonivaha elista ya malamulo, masi onihimya wira nivikanihe okhalana yowuupuxerya ya murima yooloka. (1 Timótheyo 1:18, 19) Waaniheryasa ole onoovahani etthu okathi owo khonisuwela wira khamuntthapela iferiado. Aahiiso owo pooti ohimya so: “Miyo koosuwela wira khamuntthapela nihiku na eferiado, masi kiniphavela woovahani etthu ela”. Hata vari siiso, nyuwo munrowa othanla akhala wira munimwaakhela wala nnaari. Nnaamwi nihisuwelaka enrowa anyu opaka, muhaana opaka itthu ni yowuupuxerya ya murima yooloka. Hiyo khanimphavela opaka etthu enrowa ohonona wataana wahu ni Yehova.

16. Munrowa opaka exeeni akhala wira amusi anyu aniphavela wuupuwelela nihiku na eferiado?

¹⁶ Munrowa opaka exeeni akhala wira amusi anyu aniphavela wuupuwelela nihiku na eferiado? Khivantthuneya onyakulihana. Muupuweleke wira awo aakhalana ehakhi ya othanla ele eniphavela aya opaka. Mwaareereleke murima ni waattittimiha ni soothanla saya, ntoko siisaale siniphavela anyu wira awo yoottittimihekeni. (Mmusome Matheyo 7:12.) Munrowa opaka exeeni, akhala wira amusi anyu aniphavela wira nvirihe okathi naawo muupuwelelaka eferiado? Muhinatthi opaka yoothanla anyu, munvekele Yehova wira ookhaliheryeni opaka yoothanla yooloka. Muupuwelele mwaha owo, ni mutokose saana. Muhiliyale wira muniphavela omuhakalaliha Yehova okathi wotheene.

17. Munrowa waakhaliherya sai aniinyu wira ahooneke wira anoopweteiwa vaavo anaweha aya akhwaaya apakaka ifesta mahiku a iferiado?

 ¹⁷ Munrowa waakhaliherya sai aniinyu vaavo anaweha aya akhwaaya apakaka ifesta mahiku a iferiado? Ti vooloka waavya okathi mukina wira mutthekule ni aniinyu. Nave nyuwo pooti waavaha etthu. Masi etthu yootepa otthuneya waavaha aniinyu okathi anyu ni ophenta wanyu.

18. Xeeni vanitthuneya ahu ohicompela mithukumano sa eKristau?

¹⁸ Wira nimuhakalalihe Yehova, nihaana okhuma etiini yoowootha, ni ohiya soolema saya vamosa ni iferiado sinuupuwelela aya. Nave-tho, nihaana weettela okokhorela wekeekhai. Moota xeeni? Enamuna emosa ohicompela mithukumano sa eKristau. (Mmusome aHéberi 10:24, 25.) Omukokhorela Yehova onihela muhina ohicompela mithukumano. (Esalimo 22:22; 122:1) Maana ninnilipihana mukina ni mukhwaawe.​—aRoma 1:12.

19. Xeeni vanitthuneya ahu waalaleerya akina ele eniixutta anyu mBiibiliyani?

¹⁹ Enamuna ekina ya okokhorela wekeekhai ori waalaleerya atthu ele nniixutta ahu mBiibiliyani. Atthu anceene annixanka mwaha wa itthu sootakhala siniiraneya valaponi. Waaniheryasa munnaasuwela atthu anxanka mwaha wa itthu iyo. Nto mwaaleeleke yoolipelela yooloka ya muhoolo. Vaavo vanirowa anyu omithukumanoni sa eKristau, ni waalaleerya atthu akina ikeekhai sa mBiibiliyani, khamunrowa ophavelaka-tho wiirela mpantta etiini yoowootha ni soolema saya. Tthiri mukupaliki wira munrowa ohakalalaka, ni Yehova onrowa wooreelihani vanceene vaavo vanimananiha anyu omukokhorela mwa enamuna yooloka.​—Malakhiya 3:10.