Yesu aahikhala okathi vakhaani “ekhopela ekina ya muró Yordani”, muttetthe wa oPereya. (Yohani 10:40) Vano Yesu aahikhuma orowaka oYerusalemu mpantta onkhuma epheyo.

Khahiyo wira Yesu aari mekhawe. Owo aari ni awiixutti awe ni “muttitthi mulupale w’atthu”, waahela muhina alipa-ooliviha mpoosito ni anatampi. (Luka 14:25; 15:1) Nave, yaahikhala aFarisi ni alipa-oolepa, yaawo yanvaanyiha Yesu mwaha wa itthu aahimya awe ni aapaka awe. Awo yaahaana wuupuwela itthu sinceene, maana yaahimwiiwa Yesu opakaka nlikanyiho na epwittipwitthi yaarimenle, mwaana aarimenle, thaaciri ni Laazaro.​—Luka 15:2; 16:14.

Yesu aahilavula ni awiixutti awe, woonasa wene nlelo owuupuwelaka ale yanveeha ni omunyohola. Nto aahilavula itthu sikina iixuttihale awe ori ene oGalileya.

Mwa ntakiheryo, Yesu aahimmye so: “Khivanweryaneya ohikhala itthu sinahapuxa atthu ephiro yorera: vano òtakhaliwa mutth’ule onahapuxa akhw’awe. . . . Mwipasope! Akhalá mukhw’inyu onotthekelani, mmuttaruxe. Attharuwá, mmulevelele. Òvehani imara thanu na pili nihiku nimosá, khurwa-tho imara thanu na pili siso wohimeryani wira: ‘Kottharruwa’, muhana omulevelela”. (Luka 17:1-4) Masu ala ookiserya a Yesu yaahimuupuxerya Pedru nikoho aapanke awe, akhala wira aahaana olevelela ikwaha 7.​—Matheyo 18:21.

Niireke awiixutti yanwerya wiiwelela masu a Yesu? Okathi yanvekenle aya Yesu wira “munjererye wamini wahu”, Yesu aahaalipiherya oriki: “Mwàrina wamini ntoko epyó ya murale [mostarda], mwanwerya wirala mwiri ule mulupale wira: ‘Wìphele-vo, orowe waiphatteye mphareya!’, mwiri uwo wanwiwelelani”. (Luka 17:5, 6) Tthiri, yaarina waamini vakhaani, yanwerya opaka itthu suulupale.

Yesu aahivikaniha owiixuttiha otthuneya waya wiiyeviha ni okhalana moonelo wooloka. Nto aahaaleela awiixutti awe wira: “T’ani a nyuwo onìra akhalanne murumeyi awe alimaka, walá alyihaka inama, ahokolowaka omatta, anamuhimerya wira: ‘Murwé va, mwakuveke, mukilathi vamesa’? Nnari! Onopajerya omuhimerya wira: ‘Mwetetele yolya, nware nlaya norera, mukirumele kilyaka, kiwuryaka. Numalá, mulyeke, nwuryeke nyuwo’. Pwiy’owo ohana omuxukhuru murumeyi awe, mana òhira sarummwawe? Nnari! Siso-tho nyuwo: mwavará miteko sothene sirummwanyu, mwireke: ‘Hiyo n’àrumeyí pahi: nivanré miteko sarinahu ovara’”.​—Luka 17:7-10.

Khula murumeyi a Muluku ohaana osuwela otthuneya waya ohela nipuro noopacerya Omwene wa Muluku. Ohiya-vo, khula mmosa ohaana wuupuwela eparakha erina awe ya omukokhorela Muluku ntoko mutthu a vatthokoni.

Onikhala wira moohipisa, nuumala Yesu olavula masu ala, yaahiphiya anamuhupi yaarummwale ni Maria ni Martha. Awo yaari axirokorawe Laazaro, yaawo yaakhala oBethania wa oYudeya. Muhupi owo waahimya wira: “Pwiya! Mpatthan’inyu onowereiwa”.—Yohani 11:1-3.

Nnaamwi aaleeliwe wira mpatthani awe khaareere owereiwa, Yesu khaahiyale ovara miteko sawe mwaha wooriipiwa murima. Masi, aahimmye so: “Erett’eyo khinruha okhwa: nto enothonyerya ovuwa wa Muluku, wira avuwihiwe-tho Mwana a Muluku, mwaha wa yeyo”. Yaahivira mahiku manli Yesu ori ene opuro ole, nto aahaaleela awiixutti awe wira: “Nrowé, nihokolowelé-tho oYudeya”. Vano yaahimukoha wira: “Pwiya, mahiku ene yala aYuda yaniphavela wopwexakasani ni maluku: vano muntthuna orowa-tho weiwo?”​—Yohani 11:4, 7, 8.

Yesu aahiwaakhula wira: “Othana khukhalanne iwora mulokó ni pili [12]? Mutthu èttaka othana, onnikulukupha [onnixerema] ixa, mana onnona warya onimwalela elapo. Vano, èttaka ohiyu, onnikela vexani, okhala wira khuvo warya mwa yowo”. (Yohani 11:9, 10) Woonasa  wene, Yesu aaphavela ohimya wira okathi aavahiwa awe ni Muluku wira ovare muteko awe woolaleerya khiwaamanle. Nto, Yesu aaniphavela orumeela oratteene okathi waahanle.

Yesu aahincererya oriki: “Mpatthan’ihu Lázaro, onorupa: vano kinrowa onvenxa”. Okhala wira awiixutti ale yoona wira Laazaro aamurupa ikhove ni anvenya, awo yaahimuleela Yesu wira: “Pwiya! Akhalá wira onorupa, onovona [onovenya]!” Yesu aahaaleela mooluluwanya awiixutti awe wira: “Lázaro ohòkhwa .  . . Vano, nrowé wa yowo”.​—Yohani 11:11-15.

Tome aahisuwela wira Yesu pooti wiiviwa oYudeya, nto ophavelaka omulipiha, aahaatumererya atthareli akhwaawe wira: “Ni hiyo nrowé, nakhwé vamosá n’Apwiya!”​—Yohani 11:16.