Nlikanyiho Yesu aapanke awe na mwaana aarimenle, naahaana waatikiniha alipa-ooliviha mpoosito, alipa-oolepa ni aFarisi yaari opuro ole, wira Muluku onnaalevelela anatampi anittharuwa. (Luka 15:1-7, 11) Vano Yesu aahilavula ni awiixutti awe. Owo aahirumeela nlikanyiho nikina na thaaciri yoowo oonale wira murumeyi awe khaapanke itthu mwa miruku.

Yesu aahimmye wira murumeyi ole aahootheriwa ohonona mireerelo sa pwiya awe. Nto pwiya awe aahihimya wira ammoomola murumeyi ole. Vano murumeyi ole aahiikoha wira: “Mwanene onokikumiha muteko awe. Vano kìré exeni? Olima, nkinwerya. Oveka, okùliha muru”. Nto aahoona etthu yoopaka, oriki: “Kosuwela entthunaka wira, wi atthu ekàkhele owannyeya kòmoliwa vamutekoni-va”. Moowaakuveya aahiwiitthana atthu ale yaakomphe, onaakoha wira: “Mmukophenle kavi pwiy’aka?”​—Luka 16:3-5.

Mulopwana oopacerya aahimwaakhula wira: “Kikomphe miyapu miloko mulokó sa makhura”. Saari iliituru 2.200 sa makhura. Woonasa wene, mulipa-ookopha ole aahikhalana ematta yuulupale ya olivera aahiiso aatumiha makhura. Vano murumeyi ole aahimuleela wira: “Kuxani epaphelo anyu ila: mwàkuveke, mukilathi, mulepé miloko mithanu [50 aahiiso iliituru 1.100]”.​—Luka 16:6.

Murumeyi ole aahimukoha mulopwana mukina wira: “Khi nyuwo mukomphe kavi?” Owo aahaakhula wira: “Kikomphe miphimo miloko mulokó sa trigu”. Eyo piiyo, iliituru 22.000. Vano murumeyi ole aahimuleela mulipa-ookopha wira: “Kuxani epaphelo anyu ila: mulepé miloko mithanu na miraru [80]”. Owo aahivukula vanceene.​—Luka 16:7.

Nlelo murumeyi ole taavahiwe muritti wa okhapelela mihakhu sa pwiya awe. Nto aahikhalana ehakhi ya ovukula itthu pwiya awe aakopheliwe awe. Mwaha woovukula itthu saakomphwale, murumeyi ole aahaapaka apatthani wira amukhaliheryeke nuumala woomoliwa muteko.

Nuuvira okathi, pwiya awe aahisuwela etthu yiiraneyale. Ele murumeyi ole aapanke awe yaahimpwatiha pwiya awe. Nnaamwi vaari siiso, owo aahitikinihiwa ni aahimuttottopela murumeyi “òhiroromeleya” okhala wira “ahìra etthu ya miruku”. Yesu aahincererya oriki: “Atthu a vathí-va annikhalelana ankhili vowavikana atthu òwamini”.​—Luka 16:8.

Yesu khahiyo wira aapwapwenle olavilavi wa murumeyi ole, nnakhala khaatumererya atthu wiiya okathi animweetta aya nakoso. Nto etthu xeeni aaphavela awe wiixuttiha? Yesu aahaatumererya awiixutti awe wira: “Muhakhu wotakhala wa vathí, mwiphavelelaneke apatthani, wira, owo womalelani, apatthan’inyu awo ewakheleleni mpani mohimala”. (Luka 16:9) Tthiri, Yesu iixuttiha otthuneya waya oweha itthu sikhanle  ookhumelela muhoolo ni opaka itthu mwa miruku. Arumeyi a Muluku aahiiso “atthu òwamini” ahaana orumeela mihakhu saya mwa miruku, yuupuwelelaka ekumi yoohimala muhoolo.

Yehova Muluku paahi ni Mwanawe, taniwerya omwaakhela mutthu Momweneni wa wiirimu aahiiso Mparayiisu valaponi. Nihaana waapaka ompatthani atthu awo, nrumeelaka mihakhu sahu wira nikhaliherye Omwene. Vaavo eweero, eparatha ni mihakhu sikina sinrowa aya onimalela, okumi ahu woohimala muhoolo nnoovahiwa.

Nave Yesu aahimmye wira atthu anikhapelela mihakhu aahiiso itthu sa werutthuni moororomeleya, anoowerya okhapelela moororomeleya itthu sootepa otthuneya. Vano Yesu aahihimya wira: “Mwahikhale òroromeleya ni muhakhu wotakhala, t’ani ontthuna owinnyani muhakhu w’ekekhai [ntoko itthu sa Omwene]?”​—Luka 16:11.

Yesu aahiwooniherya awiixutti awe wira yaahaana wiimananiha vanceene, akhala wira yaaniphavela ‘wakheliwa mpani mohimala’. Khivaniweryaneya mutthu okhala murumeyi eekeekhai a Muluku, okathi omosaru, onakhala epottha ya itthu soohixariya aahiiso mihakhu. Vano, Yesu aahimaliha oriki: “Khavo namuteko onwerya warumela mapwiya manli: mana onomunyokha mmosá, amphenteke mukina pahi; walá onomurumela mmosá, amuthanyeke mukina. Khamunwerya omurumela Muluku vamosá ni musurukhu”.​—Luka 16:9, 13.