Woonasa wene, Yesu aari oKafarnawu okathi aapwapwenle awe aFarisi. Othana-thanaru nihiku nenne, aahikhuma empa ele orowaka waattamela Ephareya ya oGalileya, waathukumanne muttitthi. Nuumala Yesu okela mukalawani ni opurulela mmaasini, aahipacerya owiixuttiha woohimya sa Omwene wa wiirimu. Yesu aahiwiixuttiha orumeelaka malikanyiho aahiiso matakiheryo. Atthu ale yanwiriyana yaanisuwela itthu sinceene Yesu aahimya awe, nto eyo yahaakhaliherya wiiwexexa saana itthu sa Omwene.

Wanipacerya, Yesu aahilavula sa mulopwana aalale epyo. Epyo ekina yaahimorela mphironi khuthumpwa ni axipalame. Ekina yaahimorela vamasoro-soroni vaahaareere maluku. Okhala wira mitathaari saya khisaithipenle, miri iye saahinyaala ni saahuuma mwaha wa nsuwa. Ekina yaahimorela vamiiwani nuumala omela yaahivuvuriwa ni miiwa iyo. Wanikisa waya, epyo ekina yaahimorela etthaya yooloka. Epyo eyo yaahiima mihokorokho “miloko mulokó [100], ekina miloko mithanu na mosa [60], ekina miloko miraru [30]”.—Matheyo 13:8.

Nlikanyiho nikina aapanke awe, Yesu aahilikanyiha Omwene ni mulopwana aalale ipyo. Vano mulopwana ole orupaka aahiiso ovenyaka, epyo eyo yaaninnuwa “mwanene owo ahisuwelaka”. (Marko 4:27) Ipyo saya sinnimela mpakha wiima mihokorokho seiyo sinrowa ohemphwa.

Nuumala-vo, Yesu aahilavula nlikanyiho na neeraru. Na mulopwana aalale epyo yooloka, masi “ohiyu, atthu othene erupaka” nwanani awe aahirwa waala nthakathaka eriyari ya etrigu. Arumeyi awe yaahimukoha akhala wira vaanireerela ophela nthakathaka. Owo aahiwaakhula wira: “Nnari! Mana mwaphelaka nthakathaka, munophela vamosá ni trigu. Hiyakani sinnuweke vamosá mpakha okathi  w’ohepha. Okathi yowo p’antthunaka wahimerya alipa-òhepha wira: ‘Mpajerye ophela nthakathaka, mutthuké mavisi, mpahé. Vano etrigu, musuke mmuruttuni mwaka’”.​—Matheyo 13:24-30.

Atthu anceene yanwiriyana Yesu yaanisuwela saana muteko woolima. Nave aahilavula etthu yahaareere osuweliwa, enuku ya mostarda. Eyo ennimela enannuwa enakhala mwiri muulupale anarwa axipalame oteka ipuru saya. Olavulaka sa epyo, Yesu aahimmye wira: “Omwene wa wirimu onlikana n’inuku ya murale, mutthu mmosa akuxalyawe, khwàla mmatta mwawe”. (Matheyo 13:31) Masi khahiyo wira Yesu aawiixuttiha makhalelo a miri. Owo aalavula sa moota enuku yaamukhaani eninnuwa aya mootikiniha khukhala mwiri muulupale.

Moottharelana, Yesu aahilavula etthu enisuweliwa ni atthu anceene yanwiriyana. Owo aahilikanyiha Omwene wa wiirimu ni “miropo muthiyana sinkuxawe, khutakanyiha ni miphimo miraru s’otthu, khwetheya”. (Matheyo 13:33) Nnaamwi nihiweryaka woona eferemento nuumala etrigu weetheiwa, eyo ennivara muteko aya. Maana nuuvira okathi enniipelaniha etrigu yotheene nnaamwi vavilaka woona okathi eniipelaniha aya.

Nuumala olavula malikanyiho ala, Yesu aahilaxerya muttitthi ole onarowa opuro aamanke awe. Moohipisa, awiixutti awe yaahimwaattamela wira amukohe ele yaataphulela aya malikanyiho ale.

Awiixutti ale yaahitoko omwiiwa Yesu olavulaka malikanyiho ale, ohiya manceene okathi omosaru. Nto yaahimukoha wira: “Muniwiixuttiherya-ni atthu ni malikanyiho?”—Matheyo 13:10.

Nthowa nimosa, okhala wira aamaleliha iprofesia sa mBiibiliyani. Evangelyo ya Matheyo enihimya so: “Itthu iya sothene Yesu ahahimerya atthu ni malikanyiho: khivo yàhimeryawe ehikhanle ni malikanyiho, wira sìraneye sahimalyawe Muluku ni molumo a profeta wira: ‘Kinrowa olavula ni malikanyiho, kinrowa olaleya itthu sipithihiwe okhuma vapattuxiwaya olumwenku’”.​—Matheyo 13:34, 35; Esalimo 78:2.

Masi yaahikhala etthu ekina yaamwiiriha Yesu orumeela malikanyiho. Aatthuna wooniherya ele yaari vamurimani vaya. Atthu anceene yaanimphavela Yesu mwaha wa itthu sootikiniha aapaka awe. Awo khiyaamona ntoko mutthu aatthuneya wiiweleliwa ntoko Pwiya aahiiso khiyamutthara ni murima wotheene. (Luka 6:46, 47) Awo khiyaaphavela oturuka mweettelo aya. Nave khiyaaphavela weettela soowiixuttiha sa Yesu.

Yesu aahaakhula nikoho na awiixutti awe, oriki: “Tivó vanalavulelaka atthu ni malikanyiho: siso awo hatá yònaka, khanona; yiwaka, khanìwa walá khansuwela. Vano-tho annimaliheriwa wa yawo molumo a profeta Yesaya, anihimya wira: ‘. . . Mirima s’atthu ala sokelela olipa’”.​—Matheyo 13:13-15; Yesaya 6:9, 10.

Eyo khiyaavariheleya muteko wa atthu otheene yanwiriyana Yesu. Owo aatthokihenrye so: “Àreriwa maitho anyu, mana annòna, àreriwa màru anyu, mana annìwa. Kinolèlani ti miyo wira: maprofeta manjene n’anaxariya anjene yahiphavela wona sinònanyu, khuhòna; yahiphavela wiwa sinìwanyu, khuhìwa”.—Matheyo 13:16, 17.

Tthiri arummwa ale 12 ni awiixutti akina yaanaakhelela soowiixuttiha sa Yesu ni murima wotheene. Tivo Yesu aalenle awe wira: “Nyuwo movahiwa osuwela isiri s’Omwene wa wirimu: masi awo khavahiwe”. (Matheyo 13:11) Mwaha woophavela waya osuwela, Yesu aahaatthokiherya  ele yaataphulela aya nlikanyiho nawe na mulipa-oowaala.

Yesu aahimmye wira: “Epyó, masu a Muluku”. (Luka 8:11) Nave, etthaya enthoonyerya mirima sa atthu. Itthu iya ti saarowa waakhaliherya wiiwexexa nlikanyiho na Yesu.

Olavulaka sa epyo yaamorenle mphironi khunyakeliwa, Yesu aahimmye so: “Onnorwa Satana, anakumiha masu mmurimani mwaya, wira ehamini, yopowe”. (Luka 8:12) Olavulaka epyo yaamorenle vamasoro-soroni, Yesu aahimya atthu yaale anaakhela moohakalala masu a Muluku ahinakhalana mitathaari vamurimani vaya. Awo annikhumuwa “waphwanyakaru ohawa n’ulupatthiwa mwaha w’ehapari yorera”. Tthiri “okathi wo wehereriwa”, woonasa wene alupatthiwaka ni amusi aya aahiiso atthu akina, awo annihiya ekeekhai.​—Matheyo 13:21; Luka 8:13.

Ankhi epyo yaamorenle vamiiwani? Yesu aahaaleela awiixutti awe wira aahimya atthu yaale yiiwa moolumo. Masi annixinttiwa “n’itthu sa vathí ni wototha wa muhakhu onnivuvurya masu awo”. (Matheyo 13:22) Awo aakhalana masu vamurimani vaya, masi annivuvuriwa ni itthu iyo ahinaamini.

Etthaya ekina Yesu aalavunle awe yaari yooreera. Eyo yaathoonyerya atthu yaale yiiwa moolumo anaakhelela ni aneettela. Nto exeeni enikhumelela? Awo “annìma mihokorokho”. Nto mwaha wa mikhalelo saya, ntoko wuuluvala aahiiso owereyasiwa, khivaniweryaneya atthu otheene wiima mihokorokho soolikana. Nto akina annikumiherya mihokorokho sinivikana 100, akina sinivikana 60 ni akina sinivikana 30. Mwekeekhai, “ale anìwa masu, enettela ni murima worera ni wowiwelela; siso annìma mihokorokho mwaha wa nthiti naya”.—Luka 8:15.

Masu ala yaahaahakalaliha vanceene awiixutti ale, okhala wira Yesu aahaatthokiherya yootaphulela ya soowiixuttiha sawe! Vano yaahiiwexexa oratteene malikanyiho a Yesu. Owo  aahaakhaliherya wiiwexexa malikanyiho ale wira awo nave yaakhaliheryeke atthu akina. Yesu aahaaleela wira: “Khavo ompattiha muthuko awe, anakhunela ni mwapu, walá oniyathi mukulukutheleni. Atthu anniyathi muthuko nipuro nottukhuwa”. Tivonto, Yesu aahaahimeerya wira: “Ari ni màru òwìwa, yiweke!”—Marko 4:21-23.

Nuumala Yesu waatthokiherya nlikanyiho na mulipa-oowaala, nto awiixutti awe yaaniphavela wiixutta itthu sikina. Nto yaahinvekela wira: “Munitaphulele nlikanyiho na nthakathaka na mmatta”.—Matheyo 13:36.

Okhala wira awiixutti ale yaahimukoha Yesu yootaphulela ya malikanyiho awe, vannooneya wira yaahivirikana ni muttitthi ole waari ophareya. Owehasa wene, atthu ale yaahiiwa malikanyiho a Yesu, masi khiyaaphavela osuwela yootaphulela aya ni moota woovarihela muteko. Nto yaasiveliwa paahi omwiiwa Yesu olavulaka malikanyiho ale. Yesu aahooniherya ovirikana waakhanle eriyari ya atthu ale yanwiriyana ophareya iwe ni awiixutti awe yaawo yaamukoha aphavelaka osuwela.

Yesu aahimmye so: “Mutthokelele sana etthu ila enìwanyu: mweryo onaphimelanyu akhw’inyu, Muluku onrowa wophimelani yowo, ni wunjererya-tho”. (Marko 4:24) Awiixutti ale yaanivaha ephoole vaavo Yesu aalavula awe. Nto eyo yaahimwiiriha Yesu ophavela waakhaliherya aavahaka malakiheryo makina ni waatthokiherya saana. Tivonto, Yesu aahiwaakhula awiixutti awe yaawo yaamukonhe ele yaataphulela aya nlikanyiho na nthakathaka ni etrigu.

Yesu aatthokihenrye wira: “Onàla epyó yorera ti Mwana a mutthu. Ematt’eyo, olumwenkú. Epyó yorera t’ale anettela Omwene wa wirimu. Nthakathaka t’ale animwettela mutakhali. Nwanani onàla epyó eyo yonanara ti Satana yowo. Okathi w’ohepha, ti nihiku n’omala olumwenku. Alipa-òhepha, malaikha òrera”.​—Matheyo 13:37-39.

Nuumala olavula yootaphulela ya khula etthu ya nlikanyiho nawe, Yesu aahihimya yookhumelela aya. Owo aahimmye wira wanikisa wa olumwenku ola, alipa-oohepha, niire so, malaikha anrowa ovalaanya nthakathaka, eyo piiyo, maKristau oowootha ni maKristau ekeekhai, eyo piiyo, “anamwane Òmwene”. Tthiri “anaxariya” anrowa othukumanyiwa ni waarya ntoko nsuwa “Momweneni mw’Atithi aya”. Ankhi ale “animwettela mutakhali”? Awo anrowa “wunla n’olumanyiha maino”, eyo piiyo, opwetexiwa.​—Matheyo 13:41-43.

Moottharelana Yesu aahaaleela awiixutti awe malikanyiho mararu. Noopacerya, owo aahimmye so: “Omwene wa wirimu onlikana ni muhakhu ovithiwe mmatta. Mutthu omphwanya  muhakh’uwo onnivitha-tho nananoru. Vano, atteliwene murima, onnirowa otumiha sothene sirinawe, khuthuma ematt’eyo”.—Matheyo 13:44.

Na nenli, Yesu aahimmye wira: “Omwene wa wirimu onlikana-tho ni mulipa a nakoso, omphavela maluku òwarya òrerexa. Aphwanyá nluku nowarya ni norikexa, onnirowa otumiha sothene sirinawe, khuthuma nluku nlo”.​—Matheyo 13:45, 46.

Malikanyiho ala manli, Yesu aahittittimiherya wira mutthu ohaana wiimananiha wira ophwanye etthu ya faita. Mulipa a nakoso aahitumiha itthu ‘sothene sarinawe’ wira othume nluku nne noowaarya. Vaahaakhweela awiixutti a Yesu wiiwexexa nlikanyiho nne na nluku noowaarya. Nave mulopwana ole aaphwannye mihakhu sivithiwe ene mmatta, aahirowa “otumiha sothene” aarina awe wira othume. Malikanyiho ala manli, alopwana ale yaahiphwanya etthu yaarina efaita yuulupale, nto yaahaana okhapelela saana. Eyo pooti olikanyihiwa ni mutthu onisuwela wira masikhini momunepani. (Matheyo 5:3) Atthu akina yaamwiiwale Yesu olavulaka malikanyiho awo, yaahooniherya wira yaaniphavela wiimananiha wira amalihe etala aya yomunepani ni okhala atthareli eekeekhai a Yesu.​—Matheyo 4:19, 20; 19:27.

Na neeraru, Yesu aahimmye wira Omwene wa wiirimu onlikana ni ntthavi ninvara ihopa sa khula enamuna. (Matheyo 13:47) Okathi ihopa iyo sinthanleliwa aya, sooreera sinniheliwa muthokwani, soohiloka sinniriheliwa otakhwani. Yesu aahimmye wira etthu emosaru enimwiiraneya wanikisa wa olumwenku ola, eyo piiyo, malaikha anrowa waavalaanya anaxariya ni atthu ootakhala murima.

Okathi aalattunle awe awiixutti awe oopacerya wira akhale “atothi àtthu”, Yesu iira ovaraka muteko owo mmukhalelo momunepani. (Marko 1:17) Masi, Yesu aahimmye wira nlikanyiho nawe na ntthavi naarowa ovareleya muteko muhoolo, nihiku “n’omala olumwenku”. (Matheyo 13:49) Tivonto, arummwa ni awiixutti yanwiriyana Yesu yaahoona wira yaanilipelela wiiraneya itthu soohakalaliha.

Atthu yaawiriyanne malikanyiho ale yaahittottela mureerelo munceene. Yesu aahooniherya wira aaniphavela waataphulela “sothene wiphini”. (Marko 4:34) Owo aalikana ni “mwanene etthoko onkumiha mmuhakhuni mwawe sorera sa nanano ni sa khalai”. (Matheyo 13:52) Okathi Yesu iixuttiha awe orumeelaka malikanyiho, owo khaaphavela wooniherya wira onnisuwela wiixuttiha. Masi, owo aaleela awiixutti awe ikeekhai seiyo saalikana ni mihakhu sa faita yuulupale. Tthiri, Yesu aari mwiixuttihi ahaalikana ni atthu akina.