Ti vooloka okhalana apatthani wira nitthekuleke hoothe okathi woohakalaliha ni anikhaliheryeke okathi wa mixankiho. Masi Biibiliya onninlopola wira khahiyo wira khula mutthu mpatthani ooloka. Etthu xeeni enrowa wookhaliheryani okhalana apatthani ooloka? Nkahaya muupuwele makoho anittharelana.

1. Apatthani munaathanla anyu anrowa wookhaliheryani sai aahiiso woophwanyihani maxakha?

Vaavo ninviriha ahu okathi niri ene ni mutthu naarumeelaka aredes sociais aahiiso niri ene hoothe ni mutthu owo, nnoopacerya opaka itthu mutthu owo onipaka awe. Itthu iyo pooti okhala sooloka aahiiso soohiloka. Tivonto Biibiliya onihimya awe wira: “Onetta n’asuweli onokhala musuweli: onetta n’alolo [atthu ahinimphenta Yehova] onophwanya otakhaliwa”. (Miruku 13:20) Apatthani animurumeela ni animphenta Yehova pooti onikhaliherya ohihiya olipiha ompatthani ahu ni Yehova ni opaka soothanla sooloka. Masi apatthani ahinimurumeela ni ahinimphenta Yehova pooti oniiriha ohiya omukokhorela Yehova. Tivonto Biibiliya onnitumererya awe waathanla mwa miruku apatthani ahu! Okathi apatthani ahu animphenta aya Muluku, eyo enniniphwanyiha mireerelo hiyo ni apatthani ahu. Nakhalana apatthani animphenta Muluku, nnoowerya ‘olipihana ni okhaliheryana mukina ni mukhwaawe’.—1 aTesalonika 5:11.

2. Apatthani munaathanla anyu anrowa omuhakalaliha sai Yehova aahiiso omuriipiha murima?

Yehova onnaathanla mwa miruku apatthani awe. Owo ‘onnipatthana n’atthu òloka’. (Miruku 3:32) Yehova aarowa woonela sai akhala wira ninnaathanla apatthani ahinimphenta? Tthiri aamuriipiwa murima vanceene! (Mmusome Yakobo 4:4.) Masi akhala wira ninnikhootta weetta ni atthu oohiloka, nnaathanla apatthani animphenta Yehova, eyo enoomuhakalaliha vanceene Yehova ni onoonithanla okhala apatthani awe.—Esalimo 15:1-4.

 MWIIXUTTE ITTHU SIKINA

4. Apatthani ahu pooti okhala a iyaakha soovirikana

Biibiliya onnaalavula alopwana anli a nloko na aisarayeli a khalai, mmosa iihaniwa Davidi mukina iihaniwa Yonathani. Vano Yonathani aari mwaana a mwene ni aari muulupale onvikana Davidi. Hata vaari siiso, awo yaahikhala apatthani aalupale. Mmusome 1 Samuweli 18:1, nuumala-vo mwaakhule nikoho ninttharelana:

• Xeeni vahinreerela aya apatthani ahu okhala a iyaakha ntoko sawihu ni arina makhalelo ahu?

Mmusome aRoma 1:11, 12, nuumala-vo mwaakhule nikoho ninttharelana:

• Apatthani animphenta Yehova, anlipihana sai mukina ni mukhwaawe?

Wira moone moota mutthu mmosa amphwannye awe mpatthani opuro aahaalipelela awe, nwehe EVIIDIYU, nuumala-vo mwaakhule makoho.

• Eviidiyu niwenhe ahu, xeeni anamuyari awe Akil yaaxanka aya mwaha wa apatthani awe a oxikola?

• Etthu xeeni yaamwiirinhe Akil opatthana ni amiravo ale?

• Akil aawenrye sai oxintta omeekha?

 5. Moota wookhalana apatthani ooloka

 IPONTO SUULUPALE

Okathi nnaathanla ahu apatthani mwa miruku, ninniphwanya mireerelo ni ninnimusiveliha Yehova.

Wuuluula

• Xeeni Yehova onivaha awe efaita enamuna nnaathanla ahu apatthani?

• Apatthani xeeni ninreerela ahu waasyaka?

• Munrowa owerya sai okhalana apatthani ekeekhai?