YOOSOMA 46
Xeeni Vari Aya Vooloka Wiivahererya wa Yehova ni Opatisiwa?
Yoothanla yuulupale nikhanle ahu oopaka ori wiivahererya wa Yehova. Mutthu onniivahererya wa Yehova okathi onipaka awe nivekelo omuleiheryaka Yehova wira onrowa omukokhorelaka Yehova paahi okumi awe wootheene ni opaka ele oniphavela awe. (Esalimo 40:9) Nuumala wiivahererya wa Yehova, mutthu pooti opatisiwa. Nto okathi mutthu onipatisiwa awe, onniwooniherya atthu otheene wira ohiivahererya wa Yehova. Tthiri wiivahererya wa Yehova onnirukunuxa okumi wa mutthu owo. Etthu xeeni enimwiiriha mutthu opaka yoothanla eyo yuulupale?
1. Etthu xeeni enimwiiriha mutthu wiivahererya wa Yehova?
Hiyo ninniivahererya wa Yehova mwaha wa omphenta. (1 Yohani 4:10, 19) Biibiliya onihimya wira: “Mumphenteke Yehova Muluku anyu ni murima anyu wotheene, ni okumi anyu wotheene, ni muupuwelo anyu wotheene, ni ikuru sanyu sotheene”. (Marko 12:30) Ninnooniherya wira ninnimphenta Muluku ohiya paahi ni moolumo ahu, masi-tho ni itthu nimpaka ahu. Mwa ntakiheryo, vaavo atthu annamorari anooniherya aya wira anniphentana awo annithanla othelana. Mwa enamuna emosaru, omphenta wahu Yehova onniniiriha wiivahererya wa yena ni opatisiwa.
2. Itthu xeeni Yehova onaavaha awe ale anipatisiwa?
Okathi munipatisiwa anyu, munnipacerya wiirela mpantta emusi yoohakalala ya Yehova. Nto, munooweha moota Muluku onoophentaaweni ni munrowa otepaka okhalana waataana wooloka ni yena. (Mmusome Malakhiya 3:16-18.) Ohiya paahi Yehova okhala Tiithi anyu, nyuwo munookhalana anna ni arokora a olumwenku wotheene, yaawo animphenta vanceene Yehova ni anoophentani vanceene. (Mmusome Marko 10:29, 30.) Ekeekhai wira muhinatthi opatisiwa sookhala itthu munireerela anyu opaka. Nyuwo muhaana omusuwela oratteene Yehova, omphenta ni omwaamini Yesu, yoowo ori Mwaana a Muluku. Nave muhaana wiivahererya wa Yehova. Akhala wira munoopaka itthu iyo, nyuwo pooti opatisiwa ni munookhalana eparakha ya ophwanya okumi woohimala. Nuulumo na Muluku Biibiliya, ninhimya wira: “Opatiso, yoowo oniwoopolani”.—1 Pedru 3:21.
MWIIXUTTE ITTHU SIKINA
Nwehe efaita erina aya wiivahererya wa Yehova ni opatisiwa.
3. Otheene ahu nihaana omuthanla ti pani ninrowa ahu omukokhorelaka
Atthu akina a nloko na aisarayeli a khalai yuupuwela wira omukokhorela Yehova ni okathi omosaru omukokhorela muluku Bayali khahiyo yaari etthu yootakhala. Masi Yehova aahimuruma profeta Eliya waaleela wira yaari etthu yootakhala. Mmusome 1 Mamwene 18:21, nuumala-vo mwaakhule nikoho ninttharelana:
-
Yoothanla xeeni aisarayeli a khalai yaareerela aya opaka?
Ntoko aisarayeli a khalai, hiyo nawe nihaana omuthanla ti pani ninrowa ahu omukokhorelaka. Mmusome Luka 16:13, nuumala-vo mwaakhule makoho anittharelana:
-
Niireke vanniweryaneya omukokhorela Yehova okathi omosaru nnakokhorela itthu sikina?
-
Nnooniherya sai wira noothanla omukokhorela Yehova paahi?
4. Muupuweleleke moota Yehova onoophentaaweni
Yehova oonivaha itthu sinceene sooreera. Itthu xeeni nikhanle ahu onvaha Yehova? Nwehe EVIIDIYU.
Musome Esalimo 104:14, 15 ni 1 Yohani 4:9, 10, nuumala-vo mwaakhule makoho anittharelana:
-
Itthu xeeni Yehova onivanhe awe sinitepa woosivelani?
-
Itthu Yehova onivanhe awe, sihaana owiirihani opaka exeeni?
Niireke mootoko ovahiwa etthu yahaareere woohakalalihani? Tthiri mwaaniphavela omuxukhurela mutthu owo ni murima anyu wootheene. Mmusome Otumererya 16:17, nuumala-vo mwaakhule nikoho ninttharelana:
-
Muupuwelaka itthu sootheene Yehova oovanhaaweni, itthu iyo sihaana owiirihani opaka aahiiso onvaha exeeni?
5. Wiivahererya wa Yehova onniphwanyiha mareeliho manceene
Atthu anceene anuupuwela wira efaama, okhalana muteko oniliviwa musurukhu munceene ni okhalana musurukhu munceene onniphwanyiha ohakalala. Niireke eyo ekeekhai? Nwehe EVIIDIYU, nuumala-vo mwaakhule makoho.
-
Nnaamwi Andrey waamusivela ommana boola, etthu xeeni yaamwiirinhe ohiya ommana boola?
-
Andrey aahiivahererya wa Yehova ohiya ommana boola. Munoona wira yoothanla aapanke awe yaari yooloka? Mwaha wa xeeni?
Ohinatthi okhala mukristau, murummwa Paulo aahikhalana itthu sootheene saarowa omwiiriha okhalana muteko woovuwa. Owo aahiixuttihiwa nlamulo na ayuda ni mwiixuttihi oosuweliwa vanceene. Masi Paulo aahihiya itthu iyo sootheene wira okhale mukristau. Niireke aahithanana mwaha wa yoothanla aapanke awe? Mmusome aFilipi 3:8, nuumala-vo mwaakhule makoho anittharelana:
-
Etthu xeeni yaamwiirinhe murummwa Paulo ohimya wira itthu aapaka awe ohinatthi okhala mukristau saari ntoko “ikokhola”?
-
Itthu xeeni aaphwannye awe nuumala ohiya itthu iyo sootheene?
-
Munoona wira okumi anyu onookhala wooloka akhala wira munoothanla omurumeela Yehova? Etthu xeeni eniwiirihani wuupuwela siiso?
Nuumala okhala mukristau, murummwa Paulo aahiphwanya itthu sinceene ovikana iye aalenve awe
ATTHU AKINA ANIHIMYA WIRA: “Miyo koosuwela wira ela ekeekhai, masi nkimphavela wiivahererya wa Yehova”.
-
Etthu xeeni enookupalihani wira ti vooloka wiivahererya wa Yehova?
IPONTO SUULUPALE
Ophenta onniniiriha wiivahererya wa Yehova ni opatisiwa.
Wuuluula
-
Xeeni vanireerela aya omphenta ni omukokhorela Yehova?
-
Itthu xeeni Yehova onaavaha awe ale anithanla opatisiwa?
-
Niireke munniphavela wiivahererya wa Yehova?
NWEHE ITTHU SIKINA
Nwehe etthu yaamwiirinhe muthiyana mmosa iipa muusika oniihaniwa oopera ni mulopwana ammana boola, wiivahererya wa Yehova.
Amiravo Annikoha—Kinrowa Opaka Exeeni Mookumini Mwaka?—Wuupuweela (6:54)
Nwehe itthu sikina sinrowa wookhaliheryani wiivahererya wa Muluku.
“Xeeni Vanireerela Aya Wiivahererya wa Yehova?” (Owehaweha, 15 a Janero, 2010)
Nwehe eviidiyu ya isipo enooniherya ohakalala aniphwanya aya atthu ale aniivahererya wa Yehova.
Musome mwaha oni: “Mwa Iyaakha Sinceene Kaaniikoha Wira: ‘Xeeni Niri Ahu Valaponi?’” wira nwehe etthu muthiyana mmosa aaheela awe nipuro noopacerya mookumi mwawe.
“Biibiliya Onnirukunuxa Mirima sa Atthu” (Owehaweha, 1 a Novembro, 2012)
