YOOSOMA 8
Yosiya Eetta ni Apatthani Ooloka
Niireke vannoovilani opaka itthu sooloka?— Atthu anceene annoona ovila. Biibiliya onihimya wira aahikhala mmiravo aitthaniwa Yosiya oonale ovila opaka itthu sooloka. Masi owo eetta ni apatthani ooloka yaawo yaamukhaliherya. Nrowe noone ele eniixutta ahu sa Yosiya vamosa ni apatthani awe.
Paapawe awe Yosiya, aari Amoni, mwene oYuda. Amoni aari ootakhala, ni aarumeela amuluku eethiru. Nuumala Amoni okhwa, Yosiya aahikhala mwene oYuda. Masi owo aarina iyaakha 8 paahi! Munoonela sai, niireke Yosiya aari mutthu ootakhala ntoko paapawe?— Nnaari!
Sofoniya aahaalopola atthu wira ehiwiiweleleke amuluku owootha
Okhuma enamwane awe, Yosiya aanimwiiwelela Yehova. Nto owo aahipaka opatthani ni atthu yaale yamphenta Yehova. Awo yaahimukhaliherya Yosiya opaka itthu sooloka. Tani yaari apatthani awe?
Mpatthani awe mmosa aitthaniwa Sofoniya. Profeta owo aahaaleela aYuda wira saamwaakhumelela itthu sootakhala akhala wira yaarowa owiiwelela amuluku eethiru. Yosiya aahimwiiwelela Sofoniya ni aahimurumeela Yehova, ohiya ilatarato.
Mpatthani awe mukina aitthaniwa Yeremiya. Iyaakha sa Yosiya saamuttharana ni iyaakha sa Yeremiya. Awosa yannuwale muttetthe mmosaru ni yaari apatthani ooloka. Tivonto, nuumala Yosiya okhwa, Yeremiya aahilepa nsipo nooniherya oriipiwa wawe murima mwaha wa okhwa wa Yosiya. Yeremiya ni Yosiya yaanikhaliheryana opaka itthu sooloka ni omwiiwelela Yehova.
Yosiya ni Yeremiya yaanikhaliheryana opaka itthu sooloka
Exeeni muniixutta anyu sa ntakiheryo na Yosiya?— Okhuma onamwane awe, Yosiya aanipaka itthu sooloka. Owo aanisuwela wira aahaana opatthanaka ni atthu yamphenta Yehova. Nto nyuwo muhaana waathanlaka atthu animphenta Yehova ni anrowa wookhaliheryani opaka itthu sooloka.
