Okathi murummwa Yohani aari awe mukhatteya esisiro ya oPatmo, Yesu aahimooniherya itthu 16 saarowa okhumelela muhoolo. Sowoonihiwa iyo saahooniherya moota nsina na Yehova naarowa aya otteelihiwa, Omwene awe orwa, ni moota yootthuna awe yaarowa aya wiiraneya valaponi ntoko wiirimu.

Mwa yowoonihiwa emosa, Yohani aahinweha Yehova oryeene veehiceni vawe yowaarya wiirimu, ni orukureriwe ene ni axitokweene 24, yaawanre ikuwo sootteela ni ikhara sa eweero mmuruni mwaya. Veehiceni-vo saanikhuma itari ni overunya ni okukutteya. Axitokweene awo 24 yaahuurama ohoolo wa Yehova ni yaanimukokhorela. Mwa yowoonihiwa ekina, Yohani aahiweha muttitthi muulupale wa atthu a maloko otheene, malavulelo otheene, yaawo yaamukokhorela Yehova. Mwaapwittipwitthi, yoowo ori Yesu, aanaalyiha ni waahoola muro wa maasi a okumi. Moottharelana, mwa yowoonihiwa ekina, Yesu aahipacerya olamulela ntoko Mwene a Omwene wa wiirimu, hoothe ni axitokweene 24. Nuumala-vo, Yohani aahinweha Yesu owanaka ni enowa yuulupale, eyo piiyo, Satana ni malaikha awe ootakhala. Yesu aahimoomola Satana ni malaikha awe wiirimu khiwoomolela valaponi.

 Nuumala-vo, Yohani aahimoona mwaapwittipwitthi ni atthu 144.000 yeemenle ene oMwaako Siyoni. Nave-tho aahiweha nlaikha nivavaka nirukureryaka elapo ni naaleelaka atthu wira emooveke Muluku ni envuwiheke.

Moottharelana, Yohani aahoona ewaniwaka ekhotto ya Armagedoni. Ewaniwaka siiso, aahimoona Yesu ni malaikha awe oxinttale ene olumwenku wootakhala wa Satana. Yowoonihiwa yookiserya, Yohani aahoona wiiwanana woomalela eriyari ya malaikha wiirimu ni atthu a valaponi. Satana ni otheene yaale yaamutthara yaahiiviwa. Atthu otheene a wiirimu ni a valaponi yaanitteeliha nsina na Yehova ni yaanimukokhorela yoowo paahi.