AYuda yaanimwiira Paasikha khula eyaakha nihiku 14 mweeri wa Nisani. Eyo yaaniwuupuxerya moota Yehova aawooponle awe wEjiitu okathi yaari aya ipottha ni aaroiha Elapo Yooleiheriwa. Eyaakha ya 33 EC, Yesu ni arummwa awe yaahimwiira Paasikha esaala ya vasulu oYerusalemu. Wanikisa wa eyoolya ele, Yesu aahihimya so: ‘Mmosa a nyuwo onookivariha’. Arummwa yaahiriipiwa murima vanceene, ni yaahimukoha Yesu wira: ‘Ti pani owo?’ Yesu aahiwaakhula wira: ‘Mutthu ene ti yoowo oninvaha aka ephaawu ela’. Nuumala-vo, aahimeya ephaawu khunvaha Yuda Isikaryoti. Okathi ene yoowo Yuda aahikhuma esaala ele.

Yesu aahipaka nivekelo, aahikawanya ephaawu ele ni aahaavaha arummwa. Yesu aahihimya so: ‘Mukhuureke ephaawu ela. Ela enithoonyerya erutthu aka enrowa ovahiwa mwaha wa nyuwo’. Nuumala-vo aahikuxa eviinyu ni aahivekelela ni aahaavaha arummwa awe khuhimya so: ‘Nwuryeke eviinyu ela. Ela enithoonyerya ephome aka yeeyo enrowa oyeehiwa wira sileveleliwe itampi. Kinoohimeeryani wira nyuwo munrowa okhala mamwene ni miyo wiirimu. Khula eyaakha muhaana opaka ela mukuupuwelaka miyo’. Awiixutti a Yesu annivikaniha othukumana khula eyaakha wira yuupuwelele niira  nlo. Olelo-va, niira nlo nniitthaniwa Yoolya ya Ohiyu ya Apwiya.

Nuumala olya, arummwa yaahivaanyihana ephavelaka omusuwela ti pani aari muulupale. Masi Yesu aahaaleela wira: ‘Ole ori muulupale eriyari anyu tuule oniixoona ntoko mwaana, yoowo ohinooneliwa vatthu’.

‘Nyuwo mwa apatthani aka. Kinnooleelani itthu sotheene aTiithi ankiruma aya wooleelani. Moohipisa kinoorowa wa aTiithi wiirimu. Nyuwo munoohala valaponi vaava, atthu anoosuwela wira mwa awiixutti aka mwaaphentanaka. Mphentaneke siisaale miyo kinoophentaakani’.

Nuumala-vo, Yesu aahilompa onvekelaka Yehova wira aakhapelele awiixutti awe otheene. Yena aahinvekela Yehova wira aakhaliherye otheene wira avareke muteko mowiiraana. Nave aahivekela wira nsina na Yehova nitteelihiwe. Nuumala-vo Yesu ni awiixutti awe yaahimwiipela Yehova isipo ni yaahikhumela vate. Waanaattamela okathi wira Yesu ovariwe.