Yehova aahipaka ejardim opuro waitthaniwa Edeni. Ejardim eyo yaahisareya ifilori, miri ni axinama. Nto, Muluku aahikuxa etthaya khumpaka mulopwana oopacerya, Adamu, ni khumwiiseelela mphulani. Munnisuwela etthu yaakhumelenle? Adamu aahikhala mukumi! Yehova aahimuruma Adamu okhapelela ejardim, ni waavaha masina axinama otheene.

Yehova aahimuleela Adamu wira: ‘Mulyeeke mihokorokho sotheene sa miri siri mmatta-mu. Masi ohaavo mwiri mmosa wa vameekhaaya. Muhilye muhokorokho wa mwiri owo. Mwalya vale, munimookhwa’.

Muhoolo mwaya, Yehova aahimmye so: ‘Kinrowa ompaka mutthu wira omukhaliheryeke Adamu’. Yehova aahimwiiriha Adamu ophwanya ikhove suulupale, nto aahikumiha niparari nimosa na Adamu khumpaka  mwaarawe Adamu. Nsina nawe naari Eva. Vano Adamu ni Eva yaahikhala etthoko yoopacerya. Adamu oonenle sai nuumala onweha mwaarawe? Owo aahihakalala vanceene khuhimya so: ‘Mooneke, Yehova oopaka etthu yooloka orumeelaka niparari naka! Tthiri ola onlikana ni miyo’.

Yehova aahaaleela Adamu ni Eva wira yaayareke anamwane mpakha osareya mulaponi. Owo aaphavela wira evareke muteko hoothe mpakha elapo yotheene okhala eparayiisu, wala opuro wooreera ntoko ejardim ya wEdeni. Masi eyo khiyiiraneyale! Nthowa naya? Nnoophwanya waakhuliwa waya muru onittharelana.