Mwaha 96: Yesu Onaavoniha Aretta
VAAVO Yesu vaneetta awe mulaponi, owo onnaavoniha aretta. Ihapari sa mitikiniho iya sinnihimmwa mmittettheni ni ipooma mu mpantta wotheene. Siiso atthu annimuruuhela yaale ari oorakala ni oohoona ni ahiniiwa, ni anceene akina yaawo aniwereiwa. Nto Yesu onnaavoniha otheene aya.
Vano soovira iyaakha soovikanaka tthaaru nuumala Yohani ombatiza Yesu. Nto Yesu onaaleela arummwa awe wira moohipisa owo onrowa oYerusalemu, weiwo onrowa awe wiiviwa, nuumala vo ovenya mwaalipa-ookhwa. Okathi yoowo, Yesu onnivikaniha waavoniha aretta.
Nihiku nimosaa Yesu oniixuttiha nihiku na eSaabadu. ESaabadu nihiku noomumula na aYuda. Muthiyana oninweha anyu va onikhala owereiwaka vanceene. Mu iyaakha 18 owo eetta ekhupakhupa, ni khaawerya weemela mowookololowa. Siiso Yesu onimwiixaatherya matata awe, nto owo onnipacerya weemela. Owo onnivonihiwa!
Ela enniwiiriha ahooleli a itiini okhala oonanariwa. ‘Aakhala mahiku mathanuu na mosaa mwa yaawo nnitthuneya ahu ovara muteko,’ mmosaa a yaawo onnikhuwelela muttitthi. ‘Awo tari mahiku oorwa ovoniha, ohiya eSaabadu!’
Masi Yesu onaakhula wira: ‘Alopwana nyuwo ootakhala. Khuta mmosaa a nyuwo onoomutaphula buuru awe ni omukuxa wira owurye maasi va eSaabadu. Siiso khivaatthuneya wa muthiyana ola oohaawa, yoowo okhanle oowereiwa mu iyaakha 18, okhala oovonihiwa nihiku na eSaabadu?’ Waakhula wa Yesu onniwiiriha alopwana ala ootakhala okhala oowuuliwa muruu.
Vattuli vaya Yesu ni arummwa awe aneetta mukwaha arowaka oYerusalemu. Vaavo vanimala aya ophiya otaa wa epooma ya oYerikhoo, anasimola anli ahinoona anniiwa wira Yesu onnivira. Siiso awo annikhuwela ariki: ‘Yesu, nikhaliheryeni!’
Yesu onniwiitthana alopwana awo ahinoona, ni onaakoha oriki: ‘Nyuwo muniphavela wira kipake exeeni wa nyuwo?’ Awo anihimya so: ‘Pwiya, mwiirihe wi meitho ahu atthukuwe.’ Yesu onnikwannya meitho aya, nto niinanoru awo anniwerya woona! Nyuwo munnisuwela nthowa naya Yesu vanipaka awe miiriira iya sotheene sootikiniha? Nthowa noowi onnaaphenta atthu ni oniphavela wira awosa akhalane ororomela wa owo. Siiso-nto nnoowerya okhala oosuwelexa wira vaavo vanilamulela awe ntoko Mwene, khuuvo mulaponi onrowa owereiwaka-tho.
Mateyo 15:30, 31; Luka 13:10-17; Mateyo 20:29-34.
Makoho
- Yesu onipaka exeeni vaavo vaneetta awe mulaponi?
- Yesu onaaleela exeeni arummwa awe, nuumala ovira iyaakha tthaaru vattuli va obatiziwa?
- Atthu awo valataratoni va tanii, ni exeeni Yesu enimwiiriha awe muthiyana owo?
- Nthowa xeeni Yesu waakhula wawe ovaanyiha wa ahooleli a itiini oniwiiriha aya wuuliwa muruu?
- Vaavo Yesu ni arummwa awe vanaattamela aya oYerikhoo, Yesu oniwiiriha exeeni anasimola anli ahinoona?
- Nthowa xeeni Yesu vanipaka awe mitikiniho?
Makoho oowuncererya
- Mmusome Mateyo 15:30, 31.
Wooniheriwa xeeni wootikiniha wa ikuruu sa Yehova wuupululiwe ni Yesu, ni moota xeeni yaatthuneya aya ovara wiiwexexa wahu wa yeele Yehova eleihenrya awe voohimya sa elapo esyaa? (Sal 37:29; Yes 33:24)
- Mmusome Luka 13:10-17.
Mwaha wa Yesu opaka mitikiniho sawe sikina sowooneyexa nihiku na eSaabadu, muthinto xeeni wa otaphuwa woonihenrya awe yoowo onrowa awe waaruuhela apinaatamu okathi wa Olamulelo awe wa Iyaakha Ekonto Emosaa? (Luk 13:10-13; Sal 46:10; Mat 12:8; aKol 2:16, 17; Wis 21:1-4)
- Mmusome Mateyo 20:29-34.
Moota xeeni yoohimmwa ela enooniherya aya wira Yesu khonaatteliwe miteko vahaawerya awe waakhaliherya atthu, nto exeeni ninwerya ahu wiixutta mwa yeela? (Otum 15:7; Yak 2:15, 16; 1 Yoh 3:17)
You May Also Like
YESU TI EPHIRO, EKEEKHAI NI EKUMI
Owerya Xeeni Yesu Aapakana Awe Miiriirya?
Axinnawe Yesu yoona wira Yesu aaroovahuwa.
