Mwaha 20: Dina Onnikela Mmuxankihoni
NYUWO munniwoona yaawo Dina onrowa awe waaxukurya? Owo onrowa owoona aximwali akina anikhala elapo ya oKanani. Ela yaarowa omuhakalaliha Yakobe tiithi awe? Wira mwaakhule nikoho nna, mweererye wuupuwelela yeele Abrahamu ni Isakhi yaapuwela aya voohimya sa athiyana a oKanani.
Niireke wi Abrahamu aaniphavela wira mwanawe Isakhi omuthele mwali a oKanani? Nnaari, owo khaaphavela. Niireke wi Isakhi ni Rebeka yaaniphavela wira mwanaya Yakobe omuthele mwali a oKanani? Nnaari, awo khiyaaphavela. Nyuwo munnisuwela nthowa naya?
Nthowa noowi atthu ala a oKanani yaakokhorela amuluku oowoka. Awo khiyaahiyo atthu ooloka wira akhalee ntoko iyawe aahiiso mwaarawe, ni khiyaahiyo atthu ooloka okhala ntoko apatthani awexa. Siiso nnoowerya osuwelexa wi Yakobe khaasiveliwe wira mwanawe mwaamuthiyana opakee ompatthani ni imwali iya sa oKanani.
Tthiri, Dina aahikela mmuxankihoni. Nyuwo munniwerya omoona mulopwana owo muKanani valataratoni yoowo oninweha Dina? Nsina nawe ti Sikhemi. Nihiku nimosaa vaavo Dina vaarwiiya awe oxukurya, Sikhemi aahimukuxa Dina ni aahimukhanyererya orupana. Ela yaari etthu yootthekeya, okhala wira paahi alopwana ni athiyana oothelana taniphwanelela orupa hoothe. Etthu ela yootakhala yaapanka awe Sikhemi wa Dina yaahikumiherya mixankiho sikina sinceene.
Vaavo axinnawe Dina vaiwalya aya yeele yiiranen’ye, awo yaahinanariwa vanceene. Anli a yaawo, Simeyoni ni Levi, yaahinanarexiwa mpakha okuxa ikatana ni yaahikela mmuttettheni yaavara alopwana awo mowaatutuxerya. Awo ni annaya yaahimwiiva Sikhemi ni alopwana otheene akina. Yakobe aahinanariwa okhala wira an’awe aaxilopwana yaahipaka etthu ela yootakhala.
Muxankiho ola otheene aapacenrye sai? Ela yaahiiraneya okhala wira Dina aahipaka ompatthani ni atthu yaale yahiiwelela malamulo a Muluku. Hiyo khinnirowa ophavela opaka opatthani ntoko owo, khahiyo siiso?
Maphattuwelo 34:1-31.
Makoho
- Nthowa xeeni Abrahamu ni Isakhi vahaaphavela aya wira anaaya athelaneke ni atthu a elapo ya oKanani?
- Aahaakhulela Yakobe wira mwanawe mwaamuthiyana opatthaneke ni aximwali a oKanani?
- Tanii mulopwana ola valataratoni oninweha Dina, ni etthu yootakhala xeeni yaapanke awe?
- Axirokorawe Dina, Simeyoni ni Levi yaapanke exeeni vaavo vaiwalya aya sa ele yiiranen’ye?
- Yakobe aahaakhulela yeele yaapanke awe Simeyoni ni Levi?
- Muxankiho wa emusi yotheene waapacenrye sai?
Makoho oowuncererya
- Musome Maphattuwelo 34:1-31.
Wataana wa Dina ni axithiyana a elapo ya oKanani waari wa nihiku nimosaa? Nkatthokiheryani. (Maph 34:1)
Xeeni Dina vaarina awe mpantta wa nthowa mwa oyeleela mukhalelo awe a ohitoko orupa ni mulopwana? (aGal 6:7)
Moota xeeni olelo amiravo anrowa aya wooniherya wira aahela vamurimani ntakiheryo noolopola na Dina? (Mir 13:20; 1 aKor 15:33; 1 Yoh 5:19)
