EPANTTE 2
Anamalaleerya a Omwene—Annimwarya-mwarya Ihapari Sooreera Molumwenkuni
NIIRE vano nyuwo munimwiitthokiha wira murowe olaleerya vasiisu nihiku nimphumurya anyu muteko wa mulaponi. Munnoona ovila vakhaani, mwaha wookhulumuwa. Nave murima anyu onniphavela ophumurya vasiisu! Masi nyuwo munninvekela Yehova wira ookhaliheryeni nto khiyakhuma. Nyuwo munilaleerya ni murokora mmosa owunnuwela masi oororomeleya; ovilela wawe mixankiho ni oreerela wawe murima onnivara murima anyu. Okathi onilaleerya anyu khuta enupa, munnuupuwela wira anninyu ni arokora olumwenku wotheene anilaleya ihapari imosaru, arumeelaka iliivuru imosaru, nave otheene anivahiwa malakiheryo mamosaru. Nuumala otthikela owaani, nyuwo munikhala oolipa. Nto munnixukhurela mwaha woohikilaathi owaani!
Mahiku ala, olaleerya ekeekhai tori muteko muulupale wa Omwene wa Muluku. Yesu aahihimya vahinatthi wira muteko woolaleerya waarowa otepa wunnuwa mahiku ala ookiserya. (Math. 24:14) Nto eprofesia awe eyo yiiranen’ye sai? Epantte ela ya nenli ninrowa waavarerya atthu, inamuna sirumenle aya, ni ikaruma siri sootepexa otthuneya mmuteko wa maKristau yoowo onaakhaliherya atthu imilyau sene mulaponi, woona Omwene wa Muluku okhala etthu yeekeekhai.
EPANTTE ELA
MURU 6
Atthu Anilaleerya—Anamalaleerya Anniivahererya Vootthunaya Waya
Exeeni yamwiiriha Yesu ororomela wira yaamukhala atthu yaarowa omukhaliheryaka okathi wa mahiku ookiserya? Munrowa wooniherya sai wira munnipweha nipuro noopacerya Omwene?
MURU 7
Inamuna sa Olaleerya—Orumeela Khula Enamuna ya Olaleerya
Muthokorerye moota arumeyi a Muluku saamananiha aya oreerihela ni orumeela iteknologia wira awerye waalaleerya atthu anceene ihapari sooreera, ohinatthi ophiya wanikisa.
MURU 8
Ikaruma Soolaleeryana—Okumiherya Iliivuru wa Atthu a Ilapo Sotheene
Moota xeeni muteko ahu wootaphulela onooniherya aya wira Yesu tonnikhaliherya? Itthu xeeni voohimya sa iliivuru sahu sinooniherya wira wookhala tthiri Omwene?
MURU 9
Mireerelo sa Muteko Woolaleerya—‘Mihokorokho sa Mmatta Sottokottha Wira Sihemphweke’
Yesu aahiwiixuttiha arummwa awe iponto piili sootthuneya voohimya sa ohepha wuulupale wa omunepani. Moota xeeni iponto iye sinnikhaliherya aya hiyo olelo-va?
