Yoobi 5:1-27
5 “Xontte mwiihane! Niireke ookhala onrowa owaakhulani?
Nlaikha xeeni noowaarya ninrowa anyu wiihana wiira nookhaliheryeni?
2 Onanariwa onnimwiiva mulolo,Nave nrima ninnimwiiva mutthu onikupali khula etthu.
3 Miyo konweha mulolo itthu simweettelaka saana,Masi niinaano-ru, opuro onikhala awe onnitakhalihiwa.
4 Anaawe khavareleleiye,Awo anninyakattiwa vamukhora va epooma, ohikhanle mutthu oniwoopola.
5 Atthu avoliwe etala, annoolya etthu enihepha awe,Annikuxa eriyari ya miiwa,Nave mireerelo sawe ni sa anaawe sinnikuxiwa.
6 Okhala wiira oxanka khonikhuma vantthupini,Nave maxakha khanikhuma vatthayani.
7 Mutthu oniyariwa para ohaawa,Siisaale malumi a mooro anivavela aya osulu.
8 Kaari mwa miyo kammuxonttela Muluku,Kammuleela mulattu aka,
9 Yoowo onipaka itthu suulupalexa ni soovila wiiwexexa,Ni itthu sinceene sootikiniha.
10 Yoowo onrupihela epula mulaponi,Ni onruuha maasi annaaniha imatta.
11 Owo onnimweemexa mutthu oohaawa,Nave onnimoopola ole okhulumunwe.
12 Owo onnaahonona apalano a alavilavi,Wiira matata aya ahiweryeke ovara sinuupuwela aya.
13 Owo onnaavara asuweli ni olavilavi aya,Wiira apalano aya aheette saana.
14 Awo aarukureriwa epiphi nlelo ori ene othana,Nave annaapapela othana okhalaka ntoko ohiyu.
15 Owo onniwoopola mwaano mwa atakhali, eyano yeeyo enkhala ntoko espaata,*Onnimoopola mutthu oohaawa mmatatani mwa mutthu oowerya,
16 Wiira mutthu oowiiyeviha okhalane nlipelelo,Masi eyano ya mutthu ootakhala enniwaliwa.
17 Mwiiwe! Oohakalala ti yoole onittaruxiwa ni Muluku;Tivonto muhikhootte ottaruxiwa ni Muluku Oowerya Sootheene!
18 Owo onnooniha owereya, masi onnitthukwa nikhwatta nlo;Onnivulaliha, masi onnivoliha ni matata awe.
19 Onrowa owoopolani ihasara thanu namosa,Hata ehasara ya neethanu nenli, khenrowa wookumiheryani mixankiho.
20 Okathi wa etala, onrowa owoopolani wiira muhikhwe,Nave okathi wa ekhotto, onoowoopolani owerya wa espaata.
21 Muluku onoowoopolani nlumi ninwereya ntoko murepettho,Nyuwo khamunrowa woova okathi enrowa aya okhumelela ehasara.
22 Nyuwo khamunrowa woovaka mwaha wa otakhala aahiiso etala,Nave khamunrowa owoovaka axinama ootakhala a mutakhwani.
23 Maluku a mutakhwani khanrowa wooxankihani,*Nave inama soowoopiha sa mutakhwani sinrowa okhalaka ni nyuwo ni murettele.
24 Munookhalana murettele mutentani* mwanyu,Okathi munrowa anyu ovareryaka inama sanyu, khiivo enrowa orimeela.
25 Munrowa otteeliwaka murima ni anamwane anceene,Nave osuulu anyu onimwaatta ntoko malaxi ari mulaponi.
26 Nyuwo munrowa okhwa nlelo murina ene ikuru,Ntoko mavisi a etiriku enihemphwa okathi aya.
27 Mwiiwe! Hiyo noovarerya etthu ela, noona wiira ti siiso.
Nwiriyane ni mweemererye”.
Inoota
^ Aahiiso, “xoowa”.
^ Aahiiso, “anoopaka nivarihano (animwiiwanana) ni nyuwo”.
^ Aahiiso, “muheemani”.
