Yohani 6:1-71
6 Nuumala itthu iya, Yesu aahilapuwela ekhopela ekina ya ephareya ya oGalileya, aahiiso oTiberiyade.
2 Muttitthi muulupale wa atthu waanimutthara, okhala wira yaaniweha miiriirya aapaka awe, aapenuxaka aretta.
3 Vano Yesu aahiwela vamwaako, okilaathi weiwo ni awiixutti awe.
4 Nto efesta ya ayuda, yeeyo yiihaniwa Paasikha, yaanaattamela.
5 Okathi Yesu aavenxale awe maitho, aahiweha muttitthi muulupale wa atthu orwaaka vaari awe. Nto aahimukoha Filipe oriki: “Ninrowa othuma vai iphaawu, wira atthu ala otheene akhuure?”
6 Masi, Yesu aahihimya eyo wira osuwele etthu Filipe uupuwela awe. Tthiri Yesu aanisuwela etthu aarowa awe opaka.
7 Filipe aahimwaakhula wira: “Hata nrowaka othuma iphaawu sa itenaario* 200, khasimphiyerya. Nave pooti nikawanyaka iphaawu iyo ipetaaso saamukhaani, nlelo khisaarowa ophiyerya”.
8 Mwiixutti awe mukina, aihaniwa Andreya, munnawe Simoni Pedru, aahimuhimeerya Yesu wira:
9 “Ookhala-va mmiravo mmosa orina iphaawu thanu ni ihopa piili saamukhaani. Niireke sinimwaaphiyerya atthu oowaatta siisa?”
10 Yesu aahihimya wira: “Mwaaleele atthu akilaathi”. Nipuro nle khiyaareere malaxi. Nto atthu awo yaahikilaathi. Muttitthi ole, yaahikhala alopwana oowiiraka 5.000.
11 Yesu aahikuxa iphaawu, nuumala onvekela Muluku, aahaakawela atthu yaakilanthi vaavale. Nave aahipaka etthu emosa-ru ni ihopa saamukhaani, nto awo yaahikhuura mpakha ovona.
12 Nuumala atthu ale olya mpakha ovona, Yesu aahaaleela awiixutti awe wira: “Muttottele ipetaaso sihanle,* wira ehihononeye etthu”.
13 Siiso, awiixutti yaahittottela, khusarya ittanka* 12 sa ipetaaso saahanle sa* iphaawu iye thanu, nuumala atthu olya mpakha ovona.
14 Okathi atthu yaawenhe aya mwiiriirya aapanke awe, yaahipacerya ohimya wira: “Tthiri ola Profeta aakela orwa moolumwenkuni”.
15 Yesu aasuwenle awe wira atthu yaaphavela omukhanyererya okhala mwene aya, aahirowa-tho omwaako mekhawe.
16 Vailale aya, awiixutti yaahirowa ophareya,
17 awela ekalawa, analapuwela ekhopela ekina ya ephareya, erowaka oKafarnawu. Vano vaahiriipa, nave Yesu iira nlelo ohirwaale okumana naawo.
18 Nave-tho, ephareya yaaninyakula, okhala wira yaanoopa epheyo yuulupale.
19 Masi, nuumala weettiha ekalawa eyo ikiloomo 5 aahiiso 6,* yaahimoona Yesu eettaka vasulu va maasi a mphareya, aattamelaka ekalawa, nto awo yaahoova vanceene.
20 Masi Yesu aahaaleela wira: “Ti miyo, muhoove!”
21 Awo yaahihakalala omukuxa mukalawani mwaya. Niinaano-ru, ekalawa yaahiphiya okhopela, opuro yaarowa aya.
22 Mmeeloni mwaya, muttitthi wa atthu waahanle ekhopela ekina ya ephareya, waahoona wira yaahanle ekalawa emosa paahi yaamukhaani. Atthu ale yaahisuwela wira Yesu khaaronwe mukalawani ni awiixutti, masi awiixutti awe yaaronwe mekhaya.
23 Vano ikalawa sikina, saakhuma oTiberiyade, saahiphiya nipuro nenlo atthu yaakhunre aya iphaawu, nuumala Pwiya onvekela Muluku.
24 Okathi atthu awo yoonale aya wira Yesu khaakhanle opuro ole, nnakhala awiixutti awe, yaahikela mukalawani mwaya, anarowa oKafarnawu, amwaavyaka Yesu.
25 Nuumala omphwanya ekhopela ekina ya ephareya, yaahimukoha wira: “Rabi,* mphiyale silini nno?”
26 Yesu aahiwaakhula oriki: “Kinooleelani ekeekhai wira, nyuwo khahiyo munikaavya mwaha wa miiriirya moonale anyu, masi munikaavya mwaha wa iphaawu mukhuurale anyu mpakha ovona.
27 Muhivareke muteko mwaha wa yoolya enintta, masi mwaha wa yoolya enikhala, enivaha okumi woohimala, yeeyo Mwaana a mutthu, onrowa awe woovahani. Mweekeekhai, mwaneene Muluku, Tiithi, oomuhela ekanyeryo awe enooniherya wira onnimweemererya”.
28 Vano atthu ale yaahimukoha ariki: “Muteko xeeni nikhanle ahu oovara wira neemereriwe ni Muluku?”
29 Yesu aahiwaakhula wira: “Muteko okhanle anyu onvarela Muluku tuula: mooniheryeke wira munnimwaamini ole omurumme awe”.
30 Nto awo yaahimukoha ariki: “Mwiiriirya xeeni munrowa anyu opaka, wira noone ni nookupalini? Muteko xeeni munivara anyu?
31 Amuhavinre ahu, yaahilya emana moothakoni, ntoko silempwale aya wira: ‘Owo aahaavaha ephaawu yaakhuma wiirimu wira akhuure’”.
32 Yesu aahaahimeerya wira: “Kinooleelani ekeekhai wira, Moise khoovanheni ephaawu enikhuma wiirimu, masi Tiithi aka toovanheni ephaawu yeekeekhai, yeeyo enikhuma wiirimu.
33 Tthiri ephaawu Muluku onivaha awe, tuule okhurunwe wiirimu, ni onaavaha okumi atthu”.*
34 Awo yaahimuleela wira: “Pwiya, okathi wotheene munivaheke ephaawu eyo”.
35 Yesu aahaahimeerya wira: “Miyo ka ephaawu ya okumi. Ole onirwa wa miyo, khonrowa ovoliwa-tho etala, nave ole onikaamini, khonrowa ovoliwa-tho ntthona.
36 Masi miyo kihoohimeeryani wira, nyuwo mookiweha, hata vari siiso, khamunikikupali.
37 Otheene ale Tiithi okivanhe awe animoorwa wa miyo, nto miyo nkinikhala-khala kimukhoottaka ole onikirweela.
38 Tthiri, miyo nkikhurunwe wiirimu wira kipakeke kiniphavela aka, masi kirwenle opaka oniphavela awe ole okirumme.
39 Etthu oniphavela awe ole okirumme tiila: ohikirimeele nnakhala mmosa wa ale okivanhe awe, masi wira kaahihimuxe nihiku nookiserya.
40 Tthiri, oniphavela awe Tiithi aka tiila: ole onimweemererya Mwaana ni omwaamini yoowo, okhalane okumi woohimala, nave kinoomuhihimuxa nihiku nookiserya”.
41 Vano, ayuda yaahipacerya omwaapa okhala wira aahilavula oriki: “Miyo ka ephaawu enikhuma wiirimu”.
42 Nto awo yaahipacerya okohana ariki: “Ola khahiyo Yesu, mwaana a Yosefe, yoowo apapawe ni amamawe nnaasuwela ahu? Xeeni ohimyaka wira: ‘Miyo kinikhuma wiirimu’?”
43 Yesu aahiwaakhula oriki: “Muhiye okaapa.
44 Khuuvo mutthu oniwerya orwa wa miyo, vahikhanle wira kiruuheliwe ni Tiithi, yoowo okirumme. Nave miyo kinoomuhihimuxa mutthu owo nihiku nookiserya.
45 Ela ti etthu elempwale ni Maprofeta: ‘Awo anrowa wiixuttihiwa ni Yehova’. Otheene ale animwiiwa Tiithi ni yiixuttihiwe ni yoowo, annoorwa wa miyo.
46 Khuuvo otonko omoona Tiithi. Omonne paahi tuule okhumme wa Muluku; yoowo paahi tomonne Tiithi.
47 Kinooleelani ekeekhai wira, ole onikupali onoophwanya okumi woohimala.
48 “Miyo ka ephaawu ya okumi.
49 Amuhavinre anyu yaahilya emana moothakoni, masi ahookhwa.
50 Ela ti ephaawu enikhuma wiirimu, wira otheene ale anikhuura, ahikhwe.
51 Miyo ka ephaawu ekumi, yeeyo ekhumme wiirimu. Akhala wira mutthu onookhuura ephaawu ela, onookhala mukumi mahiku otheene. Mweekeekhai, ephaawu enivaha aka ti erutthu aka wira atthu anikhala valaponi aphwanye okumi”.
52 Vano ayuda yaahipacerya onyakulihana, ariki: “Vaniweryaneya sai mulopwana ola onivaha erutthu awe wira nikhuure?”
53 Tivo, Yesu aahaahimeerya wira: “Kinooleelani ekeekhai wira, mwaahikhuure-ru erutthu ya Mwaana a mutthu, ni mwaahiwurye-ru ephome awe, khamunrowa ophwanya okumi.*
54 Ole onikhuura erutthu aka ni oniwurya ephome aka, onoophwanya okumi woohimala, nave miyo kinrowa omuhihimuxa nihiku nookiserya.
55 Tthiri, erutthu aka, ti yoolya yeekeekhai, nave ephome aka, ti yoowurya yeekeekhai.
56 Ole onikhuura erutthu aka ni oniwurya ephome aka, onniiraana ni miyo, nave miyo kinniiraana nuuwo.
57 Siisaale miyo kinikhala aka mwaha wa Tiithi, yoowo ori mukumi ni okirumme, siiso-tho, ole onikhuura erutthu aka, onookhala mukumi mwaha wa miyo.
58 Ela ti ephaawu enikhuma wiirimu. Ephaawu ela, khenlikana ni ele amuhavinre anyu yaakhuurale aya, masi khukhwa. Akhala wira mutthu onookhuura ephaawu ela, onookhala mukumi mahiku otheene”.
59 Yesu aahilavula itthu iya, okathi aixuttiha awe musinagoga,* oKafarnawu.
60 Okathi yaiwale eyo, awiixutti anceene yaahihimya wira: “Moolumo ala toovila otthara. Ti pani oniwerya owiriyana?”
61 Masi okathi Yesu aasuwenle awe wira awiixutti awe yaanivaanyihana mwaha wa moolumo ale, aahaakoha oriki: “Niireke etthu ela enniwiirihani ohiya waamini?*
62 Nto, ankhi mwanweha Mwaana a mutthu, owelaka opuro aari awe khalai?
63 Munepa woowaarya tonivaha okumi, vano erutthu kherina efaita. Moolumo koohimenryaakani anikhuma wa munepa woowaarya ni annivaha okumi.
64 Masi aakhala akina a nyuwo ahinikupali”. Tthiri okhuma woopaceryani, Yesu aanaasuwela ale yahaakupali ni aanimusuwela ole aarowa onvariha.
65 Yesu aahihimya-tho wira: “Tivo kinoohimeeryakani wira, khuuvo onwerya orwa wa miyo, vahikhanle wira Tiithi tophavenle okiruuhela”.
66 Mwaha wa yeeyo, awiixutti awe anceene yaahitthikela itthu yaahiyale aya ottuli, nave yaahihiya weetta nuuwo.
67 Siiso Yesu aahaakoha arummwa 12, wira: “Niireke ni nyuwo muniphavela orowa?”
68 Simoni Pedru aahimwaakhula oriki: “Pwiya, ninrowa omutthara pani? Ti nyuwo murina moolumo a okumi woohimala.
69 Hiyo nookupali ni noosuwela wira nyuwo mwa murumeyi Oowaarya a Muluku”.
70 Yesu aahaaleela wira: “Kiira kihoothanlani nyuwo arummwa 12? Masi mmosa a nyuwo, mulipa-oowootherya”.*
71 Tthiri, Yesu aamuhimya Yuda, mwaana a Simoni Isikaryoti, maana owo taarowa onvariha, hata ori ene mmosa a arummwa 12.
Inoota
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Aahiiso, “mapattuxa ahanle”.
^ Aahiiso, “isestu”.
^ Aahiiso, “mapattuxa yaahanle a”.
^ Ekereku, “Istaatio 25 aahiiso 30”. Estaatio emosa, yaarina imeeturu 185.
^ Aahiiso, “Mwiixuttihi”.
^ Ekereku, “olumwenku”.
^ Ekereku, “khamurina okumi mwa nyuwo”.
^ Nwehe Moolumo Ootthokiheriwa. Aahiiso, woonasa wene: “opuro yaathukumana aya atthu anceene”.
^ Ekereku, “Niireke ela ennookwattulihani?”
^ Aahiiso, “diabo”.
