Yohani 4:1-54
4 Nuumala-vo, awo yaahaahimeerya afarisi wira Yesu aahikhalana awiixutti anceene ni aanaapatisa atthu anceene onvikana Yohani. Okathi Yesu* aasuwenle awe eyo,
2 (nnaamwi Yesu mwaneene, ahaapatisa atthu, masi awiixutti awe ti yaapatisa)
3 aahikhuma oYudeya, onarowa-tho oGalileya.
4 Masi Yesu aahaana ovira oSamariya.
5 Owo aahiphiya epooma ya oSamariya, yaihaniwa Sikari, waattamela ematta Yakobe anvahale awe mwanawe, Yosefe.
6 Yaahikhala weiwo ehime ya Yakobe. Vano Yesu, okhulumunwe ene mwaha wa mukwaha eettale awe, aahikilaathi veehimeni* vaavo. Yaari etthu yoowiiraka 12 oora.*
7 Muthiyana mmosa a oSamariya aahirwa orika maasi. Nto Yesu aahinvekela wira: “Mukivahe maasi oowurya”.
8 (Awiixutti awe yiira aronwe ene opooma, othuma yoolya.)
9 Vano muthiyana ole musamariya, aahimukoha Yesu wira: “Vaniiraneya sai nyuwo, muri ene muyuda, munakivekela maasi miyo, muthiyana musamariya?” (Okhala wira ayuda ni asamariya khiyaiwanana.)
10 Yesu aahimwaakhula wira: “Nyuwo khamunisuwela yoovaha Muluku onoovahaaweni, nave khamunimusuwela ole oniwiirelani wira, ‘Mukivahe maasi oowurya’. Mwaamusuwenle, mwaamunvekela, nto owo aamoovahani maasi a okumi”.
11 Muthiyana ole aahimwiirela Yesu wira: “Pwiya, ehime ela khereere wiixa, nave nyuwo khamurina epalti yoorikana maasi. Nto munikumiha vai maasi awo a okumi?
12 Niireke nyuwo ti muulupale onvikana muhavinre ahu Yakobe? Owo tonihiyenrye ehime ela. Nave, owo vamosa ni anaawe ni inama sawe, yaawurya vaava”.
13 Yesu aahimwaakhula oriki: “Otheene ale anrowa owurya maasi ala, anoovoliwa-tho ntthona.
14 Nto ole onrowa owurya maasi kinrowa aka onvaha, khonivoliwa-tho ntthona. Vano maasi kinrowa aka onvaha, anrowa olikanaka ni nipuro nimphattuwa maasi mwa yoowo, aninvaha okumi woohimala”.
15 Muthiyana ole aahimuhimeerya Yesu wira: “Pwiya, mukivahe maasi awo, wira kihivoliwe-tho ntthona, nnakhala kihitthikele-tho orwa opuro ola, orika maasi”.
16 Yesu aahimwiirela: “Murowe, mwawiihane aiyanyu, murwaane vaava”.
17 Muthiyana ole aahimuhimeerya wira: “Miyo nkirina iyaka”. Yesu aahimuleela wira: “Moohimya saana muriki, ‘Miyo nkirina iyaka’.
18 Tthiri, nyuwo mwaahitheliwa ni alopwana athanu, vano mulopwana onikhalana anyu, khahiyo iyanyu. Tivo, moohimya ekeekhai”.
19 Muthiyana ole aahimuhimeerya Yesu wira: “Pwiya, kinoona wira mwa profeta.
20 Amuhavinre ahu, yaamukokhorela Muluku vamwaako vaava, masi nyuwo ayuda munihimya wira atthu ahaana omukokhorela Muluku oYerusalemu”.
21 Yesu aahimuhimeerya wira: “Nyuwo muthiyana, mukikupali. Enoophiya ewoora ehinrowa anyu omukokhorela Muluku vamwaako vaava, nnakhala oYerusalemu.
22 Nyuwo khamunimusuwela ole onimukokhorela anyu. Masi hiyo ninnimusuwela ole onimukokhorela ahu, okhala wira woopowa onikhuma wa* ayuda.
23 Masi, enoophiya ewoora, tthiri ewoora ene yoophiya, ale animukokhorela Muluku mwa enamuna yooloka, anrowa aya omukokhorelaka Muluku yeettihiwaka ni munepa woowaarya ni ekeekhai. Muluku onnaaphavela atthu siisa wira amukokhoreleke.
24 Muluku ti Munepa,* ale animukokhorela, ahaana omukokhorela yeettihiwaka ni munepa ni ekeekhai”.
25 Muthiyana ole aahimuhimeerya wira: “Koosuwela wira Mesiya onimoorwa, yoowo oniihaniwa Kristu. Arwa vale, onoonileela itthu sotheene”.
26 Yesu aahimuleela wira: “Ti yoomi, kinilavula ni nyuwo”.
27 Okathi ene yoole, awiixutti yaahiphiya. Nto awo yaahitikinihiwa, maana Yesu aalavula ni muthiyana. Masi, khuuvo aamukonhe wira: “Exeeni muniphavela anyu ni muthiyana owo?” aahiiso “Xeeni munilavula anyu ni muthiyana owo?”
28 Nto muthiyana ole aahihiya muno awe wa maasi, onarowa opooma waahimeerya atthu wira:
29 “Nrowe mwamoone mulopwana okilenle itthu sotheene kiirale aka. Khino yoowo khahiyo Kristu?”
30 Atthu awo yaahikhuma opooma, anarowa okumana ni Yesu.
31 Okathi ene yoowo, awiixutti yaanimuthipelela Yesu ariki: “Rabi,* mulyeeke”.
32 Masi Yesu aahaahimeerya wira: “Kookhalana etthu yoolya, nyuwo muhinisuwela anyu”.
33 Siiso, awiixutti yaahikohana ariki: “Niireke toko ookhala omuruhenle etthu yoolya?”
34 Yesu aahaaleela wira: “Yoolya aka opaka ele eniphavela awe ole okirumme, ni omaliherya muteko awe.
35 Nyuwo munihimya wira, sihanle miyeeri mixexe wira ophiye okathi woohepha. Nto miyo kinooleelani wira, nwehe imatta, maana ipyo soolikana wira sihemphwe. Vano,
36 mulipa-oohepha onniliviwa ni onnithukumanya mihokorokho. Nto mihokorokho sene, taale anrowa waakhela okumi woohimala, wira mulipa-oowaala ni mulipa-oohepha atteeliweke murima vamosa.
37 Tthiri, masu ala teekeekhai, yaawo ani: Mmosa mulipa-oowaala, mukina, mulipa-oohepha.
38 Miyo kihoorumani ohepha etthu muhaalale anyu. Nave muhaakhela itthu sooreera sa muteko wa atthu akina”.
39 Asamariya anceene a epooma ele yaahimwaamini Yesu, mwaha wa moolumo muthiyana ole aahimmye awe wira: “Owo ookileela itthu sotheene kiirale aka”.
40 Vano asamariya awo yaaronwe okumana ni Yesu, yaahinvekela wira okhale ni yaawo. Nto Yesu aahikhala weiwo mahiku manli.
41 Siiso, atthu anceene yaahimukupali Yesu mwaha wa masu awe,
42 nave yaahimuhimeerya muthiyana ole wira: “Hiyo khahiyo ninkupali mwaha wa masu anyu paahi, maana noomwiiwa mmansihu. Nave noosuwela tthiri wira owo ti moopoli a olumwenku”.
43 Nuuvira mahiku manli, aahikhuma onarowa oGalileya.
44 Vano Yesu mwaneene aahikhalela onamoona wira profeta khonittittimihiwa muttetthe awe.
45 Okathi Yesu aaphiyale awe oGalileya, atthu a oGalileya yaahimwaakhela, okhala wira yaahoona itthu sotheene Yesu aapanke awe oYerusalemu okathi wa efesta. Tthiri, atthu awo yaahirowa efesta eyo.
46 Yesu aahirowa-tho oKana wa oGalileya, weiwo aatatunxe awe maasi, khukhala eviinyu. Muttetthe owo, aahikhala namakhaliherya a mwene, aarina mwanawe mwaamulopwana aawereiwa oKafarnawu.
47 Okathi aiwale awe wira Yesu aahikhuma oYudeya orowaka oGalileya, aahirowa okumana nuuwo, khunvekela wira okhuruwele oKafarnawu wira ampenuxe mwanawe, maana aahanle okhwa.
48 Yesu aahimuleela wira: “Vahikhanle wira moonale miiriirya* ni sootikiniha, nyuwosa khamunikhala-khala mukupaliki”.
49 Namakhaliherya ole a mwene, aahimuhimeerya Yesu wira: “Pwiya, nrowe, mwanaka ohinatthi okhwa”.
50 Yesu aahimuleela wira: “Muroweke. Mwaninyu mukumi”. Mulopwana ole aahikupali moolumo Yesu aamulenle awe, onarowa.
51 Nto eettaka mphironi, arumeyi awe yaahirwa okumana nuuwo, anamuleela wira mwanawe aahikhala mukumi.
52 Nto owo aahaakoha ewoora ene mwanawe aakhanle awe saana. Awo yaahimwaakhula ariki: “Efeepere* emuhiyale nsana, 13 oora”.*
53 Paapa ole aahisuwela wira, yaari ewoora ene yeele Yesu aamulenle awe oriki: “Mwaninyu mukumi”. Siiso, owo ni atthu otheene a vatthokoni vawe, yaahimwaamini Yesu.
54 Ola waari mwiiriirya wa nenli Yesu aapanke awe, okathi aatthika awe oYudeya orowaka oGalileya.
Inoota
^ Ekereku, “Pwiya”.
^ Aahiiso, “vaniphattuwa maasi”.
^ Ekereku, “ewoora ya neethanu namosa [nuumala nsuwa okhuma]”.
^ Aahiiso, “onipacerya ni”.
^ Aahiiso, “Muluku khonooneya”.
^ Aahiiso, “Mwiixuttihi”.
^ Ekereku, “ithoonyeryo”.
^ Aahiiso, “ettekuxa”.
^ Ekereku, “ewoora ya neethanu nenli [nuumala nsuwa okhuma]”.
