Wiisuupulula 8:1-13
8 Okathi aahunle awe ekanyeryo ya neethanu nenli, wiirimu waahimaaleleya etthu yoowiiraka minutu 30.
2 Nave kaahiweha malaikha 7 yeemenle ene ohoolo wa Muluku, nto Muluku aahivaha malaikha awo malope 7.
3 Naahirwa nlaikha nikina, nikunxe ene muhasa wa eweero waapahiwa erupani, neemela ohoolo wa altaari. Nlaikha nlo, naahivahiwa erupani yinceene wira napahe valtaari a eweero, yoowo aari ohoolo wa ehice, okathi omosa-ru yaawiriyaniwa aya mavekelo a ale oororomeleya.*
4 Vano, mwiixi wa erupani nlaikha naapanhe aya, vamosa ni mavekelo a ale oororomeleya,* saahiwela wa Muluku.
5 Nuumala-vo, nlaikha nlo naahikuxa muhasa wa eweero, naahisariha mooro waari valtaari, khurihela mulaponi. Niinaano-ru, waahikhumelela overunya, ni okukutteya, ni etari, ni etetere.
6 Nto, malaikha 7, yaawo yaarina malope 7, yaahiilokiherya wira yoope malope aya.
7 Nlaikha noopacerya naahoopa nlope naya. Nuumala-vo, mulaponi yaahimorela maralala ni mooro waatakaaheriwe ni ephome. Nto, waahipahiwa mpantta wa neeraru wa elapo, khupahiwa-tho mpantta wa neeraru wa miri, nave yaahipahiwa malaxi otheene.
8 Nlaikha na nenli naahoopa nlope naya. Etthu yaalikana ni mwaako muulupale waapatta mooro, yaahiriheliwa mphareya. Nto mpantta wa neeraru wa ephareya, waahithatuwa ephome.
9 Nave, mpantta wa neeraru wa soopattuxiwa sikumi sa mphareya saahikhwa, ni mpantta wa neeraru wa apakiti yaahihononeya.
10 Nlaikha na neeraru naahoopa nlope naya. Vano, etheneeri yuulupale yaapatta ntoko muthuko, yaahimora wiirimu, khumorela mpantta wa neeraru wa miro ni mapuro aniphattuwa maasi.
11 Nsina na etheneeri eyo ti Owaawa.* Nave mpantta wa neeraru wa maasi yaahikhala oowaawa, nto atthu anceene yaahikhwa mwaha wa maasi awo, okhala wira maasi awo yaahikhalihiwa oowaawa.
12 Nlaikha na neexexe naahoopa nlope naya. Nto waahimaniwa mpantta wa neeraru wa nsuwa, mpantta wa neeraru wa mweeri, ni mpantta wa neeraru wa itheneeri, wira mpantta wa neeraru wa itthu iyo okhale wooriipela, ni ohikhale okokola mpantta wa neeraru wa othana ni mpantta wa neeraru wa ohiyu.
13 Nto kaahinweha ni kaahimwiiwa murumaasi aavava osulu-sulu, okhuwelaka ni nsu noowiiwanyeya, oriki: “Aatakhaliwa! Aatakhaliwa! Aatakhaliwa ale anikhala mulaponi, mwaha wa malope anihala oruma, yaawo ahanle vakhaani woopiwa ni malaikha mararu!”
Inoota
^ Ekereku, “ale oowaarya”.
^ Ekereku, “ale oowaarya”.
^ Onihimmwa mwiri orina esenya yoowaawa ni eveneno.
