Miteko 4:1-37
4 Pedru ni Yohani nlelo alavulaka ni atthu ale, yaahirwa anamukuttho, ni muhooleli a mutemplo ni asaduki.
2 Awo yaahinanariwa vanceene, okhala wira arummwa yaaniwiixuttiha atthu ni yaanilaleya ohoolo wa atthu otheene, wira Yesu oohihimuxiwa mookhwaani.
3 Nto, yaahinvara Pedru ni Yohani, yaatthukwela, mpakha mmeeloni mwaya, maana vaahiila.
4 Masi, atthu anceene yaiwale moolumo awo, yaahaamini. Siiso, nummuru na atthu yaaminni naari etthu yoowiiraka alopwana 5.000.
5 Mmeeloni mwaya, anamalamulela, makhulupale a ayuda, alipa-oowiixuttiha Nlamulo, yaahithukumana oYerusalemu,
6 vamosa ni mukhulupale a anamukuttho Hanaaxi, ni Kaifa, ni Yohani, ni Alexandre, ni amusi otheene a mukhulupale a anamukuttho.
7 Awo yaahimweemexa Pedru ni Yohani eriyari aya, anapacerya waakoha ariki: “Itthu iya, munipaka ni owerya wawani aahiiso ni nsina nawani?”
8 Vano Pedru, osareyale ene munepa woowaarya, aahiwaakhula iiraka:
“Nyuwo anamalamulela a atthu ni makhulupale a ayuda,
9 niireke muniphavela osuwela etthu yooloka nimwiirenle ahu mulopwana ola oorakala, ni moota okhalihiwe awe saana?
10 Vano, nyuwo ni atthu otheene a wIsarayeli musuwele etthu ela: mulopwana ola oopenuxiwa mwa nsina na Yesu Kristu, munazarethi. Mwaha wa yoowo, mulopwana ola oheemela ohoolo wanyu okhalihiwe ene saana. Yesu owo, ti yoole omukhomenle anyu vamwirini wa nihaaxeryo,* masi Muluku oomuhihimuxa.
11 Yesu owo, ti ‘nluku nyuwo alipa-ooteka empa mwaakhontte anyu, nenlo nikhalihiwe nluku nuulupale na alisenso’.*
12 Nave-tho, khuuvo onwerya onoopola, okhala wira khanikhanle nsina nikina mulaponi, Muluku othanlale awe eriyari ya atthu wira noopoliwe”.
13 Okathi yoonale aya olipa murima wa Pedru ni Yohani, ni osuwela wira yaari atthu yahaasomme* ni yaari atthu pure, awo yaahitikinihiwa vanceene. Nto, yaahuupuwela wira Pedru ni Yohani yaaneetta ni Yesu.
14 Siiso, khiyaawenrye omwaakhula etthu Pedru ni Yohani, okhala wira mutthu ole aapenuxiwe, aari vaavale.
15 Tivo, yaahaaruma okhuma oSineedrio,* anapacerya ovaanela yaawo-ru,
16 ariki: “Ninrowa owiiriha exeeni alopwana ala? Tthiri, atthu otheene anikhala oYerusalemu, annisuwela wira mwiiriirya ola muulupale wiiraneyale ni yaawo, nave hiyo khaninwerya ovaanya.
17 Nto wira etthu ela ehitepe wuulaana, nrowe niwoopopihe ni naahimeerye wira ehitthikele-tho olavula ni mutthu, erumeelaka nsina nla”.
18 Nuumala-vo, yaahiwiitthana, yaahimeerya wira: “Muhilavule-tho etthu nnakhala wiixuttiha murumeelaka nsina na Yesu”.
19 Siiso, Pedru ni Yohani yaahiwaakhula, yiiraka: “Mutthokelele oratteene mmansinyu, yaari etthu ya xariya vamaithoni va Muluku, owiiwelelani nyuwo, ohiya omwiiwelela Muluku.
20 Masi hiyo, khaninwerya ohiya olavula itthu noonale ahu ni niiwale ahu”.
21 Tivo, nuumala weererya owoopopiha-tho, awo yaahaataphula, okhala wira khiyaaphwannye mulattu wira yaahukhumu. Nave-tho yaaniwoova atthu, maana atthu otheene yaaninvuwiha Muluku, mwaha wa etthu yaakhumelenle.
22 Ohiya-vo, mulopwana ole aapenuxiwe mwa mwiiriirya ola, aarina iyaakha sinivikana 40.
23 Nuumala otaphuliwa, awiixutti ale anli yaahirowa opuro yaari awiixutti akina, yaaleela ele makhulupale a anamukuttho ni makhulupale a ayuda yaahimenrye aya.
24 Vaiwale aya etthu eyo, otheene ale yaari opuro ole, yaahinvekela Muluku moowiiraana, ariki:
“Pwiya Muulupalexa, ti nyuwo mpattunxe erimu, elapo, ephareya ni itthu sotheene sinikhala mapuro awo,
25 nave murumeelaka munepa anyu woowaarya, moohimya, ni moolumo a murumeyi anyu Davidi, muhavinre ahu, wira: ‘Xeeni atthu a maloko annanariwa aya, nave xeeni atthu anuupuwela aya itthu seethiru?
26 Mamwene a mulaponi aalikana, nave anamalamulela aathukumana poromosa, wira awane ni Yehova ni ole omuthanlale awe’.*
27 Mweekeekhai, Herodi vamosa ni Ponsio Pilato, ni atthu a maloko, ni atthu a wIsarayeli, yaahithukumana poromosa epooma yeela wira awane ni Yesu, murumeyi anyu oowaarya, yoowo omuthanlale anyu.
28 Awo yaahithukumana wira apake etthu mwaahimmye anyu vahinatthi. Itthu iyo sihiiraneya okhala wira mookhalana owerya, ni mwaha woowi ennivarihana ni yoolakela anyu.
29 Xontte Yehova, nwiriyane onoopopiha waya, ni munikhaliherye hiyo, arumeyi anyu, wira nihihiyererye olavula moolumo anyu, nihoovaka etthu.
30 Okathi omosa-ru, munnirumeela ikuru sanyu wira mwaapenuxe atthu, nave munnipaka miiriirya ni miteko sootikiniha, murumeelaka nsina na murumeyi anyu oowaarya, Yesu”.
31 Vano, nuumala omuxonttela Muluku,* opuro ole yaathukumanne aya waahittikinyeya, nave otheene aya yaahisareya munepa woowaarya, analaleya moolumo a Muluku, ahoovaka etthu.
32 Nave-tho, muttitthi wa atthu otheene yaaminni, waarina muupuwelo mmosa-ru.* Khuuvo aahimya wira mireerelo aarina awe saari sawawe paahi, masi yaanikawana itthu sotheene.
33 Nave arummwa yaanivaha oratteene onamoona wa ohihimuxiwa wa Pwiya Yesu, ni yaahisareya oreera murima wuulupale wa Muluku.
34 Tthiri, khuuvo mutthu aathoiwa etthu, okhala wira ale yaarina imatta aahiiso ipa, yaanitumiha nto musurukhu ene yaaniruuha,
35 anaavahererya arummwa. Nuumala-vo, khula mutthu aanivahiwa etthu yaamuthowa.
36 Vano, Yosefe, yoowo-tho arummwa yaamwiihana aya Baarnaba, (nsina nenlo nintaphulela “ole onaalipiha akina”), aari mulevi aayariwe elapo ya oKiipero,
37 aahikhalana ematta awe, khutumiha, nto musurukhu ene aahaavahererya arummwa.
Inoota
^ Nwehe Moolumo Ootthokiheriwa.
^ Aahiiso, “mathipelo”.
^ Eyo piiyo, khiyaasomme ixikola sa marabi; khentaphulela wira khiyaasuwela osoma.
^ Nwehe Moolumo Ootthokiheriwa.
^ Aahiiso, “Kristu awe”.
^ Aahiiso, “onvekela Muluku ni nthiti”.
^ Ekereku, “murima mmosa-ru”.
