Miteko 19:1-41
19 Okathi Apolo aari awe oKorinto, Paulo aahivira mittetthe soorakamela ophareya, khuphiya wEefeso. Weiwo, aahaaphwanya awiixutti akina,
2 onaakoha wira: “Okathi mwaapacenrye anyu waamini, mwaahaakhela munepa woowaarya?” Awo yaahimwaakhula ariki: “Khanitonko wiiwa wira wookhala munepa woowaarya”.
3 Nto Paulo aahaakoha-tho wira: “Mpatisiwe ni opatiso xeeni?” Awo yaakhunle so: “Opatiso wa Yohani”.
4 Paulo aahaaleela wira: “Yohani aapatisa atthu ntoko ethoonyeryo ya orukunuxa waya murima. Nave aanaaleela atthu wira amwaaminiki ole aarwa ohoolo wawe, eyo piiyo, Yesu”.
5 Vaiwale aya siiso, awo yaahipatisiwa mwa nsina na Pwiya Yesu.
6 Okathi Paulo aawiixaathenrye awe matata, awo yaahaakhela munepa woowaarya, anapacerya olavula mattaava oovirikana ni yaanilavula iprofesia.
7 Yaari alopwana 12.
8 Paulo aahiviriha miyeeri miraru orowaka musinagoga,* onalavula ohoovaka etthu, nave aanilavula myaha ni aaneererya owiiriha atthu awo okupali Omwene wa Muluku.
9 Masi atthu akina yaahuumiha mirima saya, ahinaphavela waamini. Awo yaaniveeha ephiro ya Apwiya, ohoolo wa muttitthi wa atthu. Tivo, Paulo aahaahiya atthu ale ni aahaakuxa awiixutti. Nto khula nihiku, aanilavula myaha exikola ya Tirano.
10 Paulo aahiixuttiha exikola eyo iyaakha piili. Siiso, atthu otheene yaakhala eprovinsia ya wAsia, ayuda ni akereku, yaahiiwa moolumo a Pwiya.
11 Muluku aanipaka miiriirya suulupale omurumeelaka Paulo.
12 Mwa ntakiheryo, atthu yaanikuxa maleeso ni ikuwo sa Paulo anaaroihela aretta, nto aretta awo yaanipenuwa, nave malaikha ootakhala yaanaahiya.
13 Masi ayuda akina yaawo yeetteetta khula opuro yoomolaka malaikha ootakhala, yaaheererya woomola malaikha awo aromolaka nsina na Pwiya Yesu. Awo yaanihimya wira: “Ni nsina na Yesu, yoowo Paulo onimulaleya awe, kinoorumani wira mukhume”.
14 Nave anamwane axilopwana 7 a mukhulupale a anamukuttho muyuda, yoowo aihaniwa Sikewa, yaanipaka eyo.
15 Nto nlaikha nootakhala nahaahimeerya wira: “Miyo kinnimusuwela Yesu ni Paulo, ankhi nyuwo mwa pani?”
16 Vano, mulopwana ole aavariwe ni nlaikha nootakhala, aahaatuphela alopwana awo, owanana, nto aahaawerya otheene aya. Siiso, alopwana awo yaahikhuma empa eyo etthyawasaka, ahiwanre etthu, ni avulanle ene.
17 Atthu otheene yaakhala wEefeso, eyo piiyo, ayuda ni akereku, yaahisuwela etthu eyo. Nto otheene aya yaahoova, nave nsina na Pwiya Yesu, naanitepa ovuwihiwa.
18 Atthu anceene yaaminni, yaahirwa anahimya ohoolo wa atthu otheene miteko yaavara aya.
19 Tthiri, atthu anceene yaawo yaapaka maxintta, yaahiruuha iliivuru saya, anapaha ohoolo wa atthu otheene. Musurukhu wa iliivuru iyo, waahiphiyerya 50.000 wa eparatha.
20 Siiso, ni owerya wa Yehova, nuulumo nawe naanitepa omwara-mwareya ni okhalana ikuru.
21 Nuumala okhumelela itthu iya, Paulo aahuupuwela orowa oYerusalemu, oviraka oMasedonia ni wAkhaya. Owo aahihimya wira: “Karowa oYerusalemu, nave-tho kihaana orowa oRoma”.
22 Nto aahaaruma alopwana anli yaamukhaliherya wira arowe oMasedonia. Awo yaari Timootheyo ni Erasto. Masi Paulo aahihala okathi vakhaani eprovinsia ya wAsia.
23 Siiso, waahikhumelela onyakulihana wuulupale mwaha wa ephiro ya Apwiya.
24 Mulopwana mmosa aihaniwa Demeetrio, aanipaka itemplo saamukhaani sa eparatha, saalikana ni etemplo ya Arteemi. Owo aanaaphwanyiha musurukhu munceene ale aavarana awe muteko.
25 Nto, Demeetrio owo aahaathukumanya ale aavarana awe muteko, vamosa ni atthu akina yaavara muteko mmosa-ru, onahimya wira: “Apatthani, nyuwo moosuwela oratteene wira nakoso ola onniniphwanyiha musurukhu.
26 Nyuwo munnoona ni munniiwa wira Paulo onnaakupaliha atthu anceene, ni onniwiiriha okhalana muupuwelo mukina, ohimyaka wira amuluku anipakiwa ni matata, khahiyo amuluku eekeekhai. Eyo kheniiraneya wEefeso paahi, masi-tho enniiraneya eprovinsia yotheene ya wAsia.
27 Ohiya-vo, kinnoova wira atthu anrowa oveehaka muteko ahu. Nave kinnoova wira atthu anrowa woonaka ohikhala etthu etemplo ya muluku ahu muulupale Arteemi. Hata atthu otheene a edistritu ya wAsia ni a olumwenku wotheene amukokhorelaka, ovuwa wawe onoomala”.
28 Nuumala wiiwa eyo, alopwana awo yaahinanariwa vanceene, anakhuwela ariki: “Muulupale ti Arteemi, muluku a wEefeso!”
29 Nto epooma yotheene yaahisareya onyakulihana. Otheene aya yaahitthimaka ekelaka oteaturuni, ampurulaka Gaio ni Aristarko, yaawo yaari a oMasedonia. Awo yaari apatthani a Paulo yeettana awe vamosa.
30 Paulo aaniphavela okela oteaturuni, waari atthu ale, masi awiixutti yaahimukhoottiherya.
31 Hata alipa yaalokiherya ifesta ni axooku, yaawo yaari apatthani a Paulo, yaahimulopola wira ohikele oteaturuni.
32 Okathi owo, muttitthi wa atthu waahaakanyereya: atthu akina yaakhuwela etthu emosa, masi akina etthu ekinaku. Nave, atthu anceene khiyaasuwela etthu ene yaathukumaneliwe.
33 Akina yaahimuleela Alexandre wira ohimye etthu, okhala wira ayuda yaahimukakhela ohoolo. Nto Alexandre aahivaha esinaale ni ntata wira muttitthi wa atthu omaale, maana aaphavela otthokiherya etthu ele.
34 Masi okathi atthu awo yaasuwenle aya wira aari muyuda, otheene aya yaahikhuwela ni nsu nimosa-ru, etthu yoowiiraka iwoora piili, ariki: “Muulupale ti Arteemi, muluku a wEefeso!”
35 Vano, mukhulupale* a epooma, aahiwerya omaaliha muttitthi ole wa atthu, onahimya wira: “Nyuwo atthu a wEefeso, ti pani ohinsuwela wira wEefeso ti epooma enisuka etemplo ya muluku muulupale Arteemi, ni elatarato emonre wiirimu?
36 Tthiri khaavo mutthu onivaanya itthu iya. Tivo, mmaale ni muhiire etthu yoololo.
37 Nyuwo muhaaruuha alopwana ala, yaawo ahikhanle alatarau a itemplo, nnakhala ahinveehale muluku ahu Arteemi.
38 Siiso, vakhala wira Demeetrio ni akhwaawe anivarana awe muteko aakhalana mulattu ni mutthu, ahaavo mapuro aniphukiwa milattu, ni aakhala makuvernatoro.* Nto, aroihaneke mapuro yaawo.
39 Masi akhala wira muniphavela etthu ekina ovikana ela, ehaana ophukiwa etthariheliwaka nlamulo.
40 Mweekeekhai, vannoopiha hiyo-tho wootheriwa okhala atthu amurukunuwenle kuvernu mwaha wa etthu ekhumelenle olelo. Tthiri khiivo etthu nikhanle ahu ohimya mwaha wa muttitthi ola woowaakanyereya”.
41 Vaamalinhe awe olavula, aahaamwarya atthu ale.
Inoota
^ Nwehe Moolumo Ootthokiheriwa.
^ Aahiiso, “mulipa-oolepa”.
^ Kuvernatoro muroma aalamulela eprovinsia emosa. Nwehe Moolumo Ootthokiheriwa.
