Miteko 17:1-34
17 Paulo ni Sila yaahivira muttetthe wa wAnfiipoli ni wApolonia, khuphiya oTesaloonika, weiwo yaari esinagoga* ya ayuda.
2 Vano, ntoko aalimalenle awe, Paulo aahikela musinagoga* mwaya. Nto aahiviriha isaabadu tthaaru eereryaka waakhaliherya wiiwexexa Soolempwa,
3 aatthokiheryaka ni owooniheryaka Soolempwa, wira Kristu aahaana ohaawa, okhwa ni ohihimuxiwa mookhwaani. Paulo aahihimya wira: “Yesu ti Kristu, yoowo kinoolaleeryaakani”.
4 Siiso, atthu akina yaahaamini, ni yaahikhala vamosa ni Paulo ni Sila. Nave, akereku anceene yaamukokhorela Muluku ni athiyana anceene oottittimiheya, yaahaamini.
5 Nto ayuda yaahisareya nrima, ni yaahaathukumanya atthu ootakhala murima, yaawo yeettakasa mmerkaatu. Nuumala-vo, yaahikumiherya onyakulihana epooma ele. Yaahikela empa ya Yasoni, amphavelaka Paulo ni Sila wira yaaroihe waari muttitthi wa atthu ootakhala.
6 Masi okhala wira khiyaaphwannye, yaahimpurula Yasoni ni anna akina, yaaroihaka wa anamalamulela a epooma, akhuwelaka wira: “Alopwana yaale anikumiherya onyakulihana mapuro otheene, nave-tho aaphiya nno.
7 Yasoni oowaakhela vatthokoni vawe. Alopwana ala otheene, annivirikanya malamulo a Seesari, ahimyaka wira ookhala mwene mukina, oniiriwa Yesu”.
8 Vaiwale aya moolumo awo, anamalamulela a epooma vamosa ni muttitthi wa atthu, yaahituthuwa.
9 Nuumala Yasoni ni anna oliva musurukhu waavekeliwa wira ataphuliwe, awo yaahaataphula anaahiya arowaka.
10 Ohiyu ene yoowo, axinna yaahimuruma Paulo ni Sila, wira avenye voohipisa, arowaseke oBereya. Vaaphiyale aya, yaahikela musinagoga* mwa ayuda.
11 Vano, ayuda a oBereya yaari atthu yaaphavela wiixutta vanceene, waavikana ale a oTesaloonika, okhala wira ale a oBereya yaaniphavela vanceene waakhela nuulumo na Muluku. Nave-tho, khula nihiku yaanitokosa oratteene Soolempwa, wira yoone vakhala wira itthu yaiwale aya, saari seekeekhai.
12 Tivo, atthu anceene yaahaamini, nave-tho athiyana akereku anceene oottittimiheya vamosa ni alopwana akina, yaahaamini.
13 Okathi ayuda a oTesaloonika yaiwale aya wira Paulo aanaalaleerya-tho nuulumo na Muluku atthu a oBereya, awo yaahirowa weiwo waawoka* atthu wira yaarukunuwele.
14 Niinaano-ru, axinna yaahimuleela Paulo wira oroweke ophareya, vamosa ni anna akina. Masi Sila ni Timootheyo yaahihala weiwo.
15 Ale yaamuhoola Paulo, yaahirowa mpakha wAthena. Vano awo yaahitthika, nuumala Paulo waahimeerya wira yamuleele Sila ni Timootheyo wira arowase yakumane ni Paulo voohipisa.
16 Okathi Paulo aamulipelela awe Sila ni Timootheyo wAthena, owo aahinanariwa vanceene, voonale awe wira epooma ele yaahisareya amuluku eethiru.
17 Siiso, aahipacerya owiixuttiha ayuda musinagoga,* vamosa ni atthu akina yaamukokhorela Muluku. Nave-tho khula nihiku, aaniwiixuttiha atthu aaphwanya awe omerkaatu, owiirihaka wuupuwelela etthu aahimya awe.
18 Masi atthu akina, yaawo yaatthara soowiixuttiha sa Epikuro* ni Sitoiko,* yaanivaanyihana ni Paulo. Akina yaahimya so: “Namukhwa-anepa ola oolavulasa, onihimya-ni?” Nave-tho akina yaahimya wira: “Onikhala ntoko onaalaleya amuluku a ilapo sikina”. Awo yaahimya siiso, okhala wira Paulo aalaleya ihapari sooreera sa Yesu ni ohihimuxiwa wa alipa-ookhwa.
19 Siiso, awo yaahimuroiha Paulo wAreopago,* anamukoha wira: “Mookhala oonileela etiini ela esya munihimya anyu?
20 Maana muniixuttiha itthu nihitonko ahu wiiwa. Nto hiyo nimphavela osuwela etthu enitaphulela aya itthu iyo”.
21 Tthiri, atthu otheene a wAthena vamosa ni ale yaaxukurya epooma ele, yaaniviriha okathi yahaavara aya etthu, alavulaka aahiiso awiriyanaka itthu isya.
22 Vano, Paulo aaheemela eriyari ya wAreopago,* onalavula wira: “Nyuwo atthu a wAthena, kinnoona wira mwa itthu sotheene, nyuwo munnivarexexa etiini. Noolikanyihani ni atthu akina, nyuwo munnitepexa owoova amuluku.
23 Mwa ntakiheryo, okathi keettaaka, kiwehawehaka oratteene itthu munikokhorela anyu, komphwanya altaari mmosa olempwe so: ‘Altaari a Muluku Ohinimusuwela ahu’. Tivo, ele munikokhorela anyu muhisuwelaka, ti yeeyo kinoolaleeryaakani.
24 Muluku opattunxe olumwenku wotheene ni itthu sotheene siri memmo, yoowo ori Pwiya a erimu ni elapo, khonikhala mutemplo etekiwe ni matata a atthu.
25 Nnakhala khonilipelela okhaliheriwa ni atthu, okhala wira khiivo enimuthowa. Owo tonaavaha atthu iphumu, okumi ni itthu sotheene.
26 Nave, mwa mutthu mmosa, Muluku ohaakumiherya atthu a maloko otheene, wira akhaleke elapo yotheene ya vathi. Owo oohela okathi, ni oovaha mikano sa mapuro apinaatamu yaarowa aya okhalaka.
27 Muluku oniphavela wira atthu amwaavyeke, yaapapeleke ni amphwanye. Tthiri, owo ori vakhiviru wa khula mmosa a hiyo.
28 Mwaha wa yoowo, hiyo nookhalana okumi, ninneetta, ni nookhala, siisaale ntoko alipa-oolepa a muttetthe anyu ola, anihimya aya wira: ‘Nave-tho hiyo na anamwane awe’.
29 “Tivonto, okhala wira na anamwane a Muluku, nihuupuweleke wira Muluku owo onlikana ni elatarato ya eweero, aahiiso ya eparatha, nnakhala ya nluku, seiyo sinuupuweliwa ni sinipakiwa ni apinaatamu.
30 Ekeekhai wira khalai, Muluku aanaahiya atthu apakaka itthu iyo mwaha woohisuwela, masi vano owo onnaaleela atthu otheene anikhala mapuro otheene, wira arukunuxe murima.
31 Muluku oothanla nihiku onrowa awe waaphukela mwa xariya atthu otheene anikhala mulaponi, omurumeelaka mulopwana omuthanlale awe. Vano, oomuhihimuxa mulopwana owo, wira owooniherye atthu otheene wira nihiku nlo nnoophiya tthiri”.
32 Nto, okathi atthu yaiwale aya oromoliwaka ohihimuxiwa wa alipa-ookhwa, akina yaahipacerya omutheya, nto akina yaahimya wira: “Hiyo ninrowa woowiriyanani-tho okathi mukina”.
33 Tivo, Paulo aahikhuma opuro ole.
34 Hata vari siiso, atthu akina yaahaamini, anakhala vamosa nuuwo. Mulopwana mmosa aaminni, aari Dionisio, yoowo aari mulipa-oophuka milattu a etripunaale ya wAreopago.* Aahikhala-tho muthiyana aihaniwa Daamari. Nave, yaahikhala-tho atthu akina.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “waathupya”.
^ Nwehe Moolumo Ootthokiheriwa.
^ Ale yaatthara soowiixuttiha sa Epikuro, khiyaakupali ohihimuxiwa wa alipa-ookhwa. Nave yaixuttiha wira atthu yaahaana opuha vanceene okumi aya, maana okumi ti wookhuveya.
^ Ale yaatthara soowiixuttiha sa Sitoiko, yaixuttiha wira atthu ahaana ottharaka muupuwelo aya, ni ahicaleke ohaawa nnakhala ohakalala. Nave-tho, khiyaakupali ohihimuxiwa wa alipa-ookhwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
