Miruku 8:1-36
8 Niireke ankhili khanikhuwela?
Niireke miruku khasinikhuwela?
2 Munimwiiwa nsu na ankhili mapuro oorakamela osulu,Mphironi ni mapuro sinivalaana iphiro.
3 Waattamela mikhora siniroiha opooma,Vamukhora,Nave ankhili awo khanihiya okhuwela vanceene:
4 “Kinniwiihanani nyuwo atthu;Kinniwiihana atthu ootheene ni nsu noorunya.
5 Nyuwo muhinisuwela itthu sinceene, mwiixutte okhala mutthu a ankhili;Nyuwo alolo, mukhalane murima woosuwela.
6 Nwiriyane, okhala wiira etthu enihimya aka ti ya faita,Eyano aka ennilavula ekeekhai.
7 Eyano aka ennilaleya ekeekhai vathi-vathi,Ni enninyokha moolumo oowoototha.
8 Moolumo ootheene anikhuma mwaano mwaka, teekeekhai.
Khaavo a yaawo ari ootakhala aahiiso oowootha.
9 Moolumo ootheene toowiiwanyeya para ale arina ankhili,Ni tooloka para ale arina osuwela.
10 Mweemererye ottaruxa waka ohiya eparatha,Mweemererye osuwela waka ohiya eweero yooreerexa,
11 Ankhili tooloka ovikana maluku oowaaryexa;Khiivo etthu ekina yooloka ekhanle oolikanyihiwa ni miruku.
12 Miyo ankhili, kinikhala vamosa ni miruku;Koophwanya osuwela ni wuupuwela saana.
13 Omoova Yehova ontaphulela onyokha itthu sootakhala.
Miyo kinninyokha wiisoona, wiixinnuwiha, ephiro yootakhala ni moolumo ootakhala.
14 Kookhalana miruku sooloka ni ankhili anivareleya muteko;Osuwela ni owerya ti wawaka.
15 Mwaha wa miyo, mamwene annilamulela,Nave makhulupale anneettela malamulo a xariya.
16 Mwaha wa miyo, makhulupale annilamulela,Nave atthu oovuwa anniphuka ni exariya.
17 Kinnaaphenta ale anikiphenta,Nave ale anikiphavela anookiphwanya.
18 Kookhalana itthu sa faita ni ovuwa,Mihakhu* sihinimala ni exariya.
19 Etthu enivaha aka ti yooloka ovikana eweero, aayo, ovikana eweero yooreerexa,Nave etthu kinikumiherya aka ti yooloka ovikana eparatha yooreerexa.
20 Kineettihiwa ni itthu sooloka,Nave okathi wootheene kinipaka itthu sa xariya.
21 Kinnaavaha etthu yoohiyeriwa ya faita ale anikiphenta,Nave kinnisariha opuro aya sinisukiwa mireerelo.
22 Miyo kipacenrye opattuxiwa ni Yehova,Mwa itthu sootheene opattunxe awe khalai.
23 Okhuma khalai owo ookivaha opuro woottittimiheya,Okhuma woopaceryani, ehinatthi opattuxiwa elapo.
24 Iphareya sihinatthi okhala,Ni sihinatthi okhala miro sinvira maasi, miyo kiira kikhanle ene.
25 Miyaako sihinatthi opattuxiwa,Ni mattumuxa ahinatthi okhala, miyo kiira kikhanle ene,
26 Ohinatthi opattuxa elapo ni imatta saya,Nnakhala ohinatthi opattuxa etthaya.
27 Okathi aapanke awe erimu, miyo kaari vaavo.Okathi aahenle awe mukano eriyari ya erimu ni ephareya,
28 Okathi aapweha awe meeku osulu,Okathi aapanke awe mapuro oowiixerya aniphattuwa maasi,
29 Okathi aapanke awe ephareya,Wiira maasi aya ahivikaneke mukano aahenle awe,Okathi aapanke awe alisenso a elapo,
30 Miyo kaavara muteko nuuwo ntoko namuteko onivara saana.
Khula nihiku, miyo kaanimuhakalaliha vanceene.Okathi wootheene kaanitteeliwa murima ohoolo wawe.
31 Kaanitteeliwa murima vanceene ni elapo aapattunxe awe wiira ekhaliweke,Nave yaatepexa okisivela yaari apinaatamu.
32 Vano, anaaka, mukiwiriyane.Tthiri, oohakalala taale aneettela iphiro saka.
33 Nwiriyane ottaruxa waka wiira mukhalane ankhili,Nave muhikhootte eyo.
34 Oohakalala ti mutthu yoole onkiwiriyana,Mwaha woopeherya oxaka vamukhora vaka khula nihiku,Nave mwaha woolipelela vamukhora va empa aka.
35 Ole onikiphwanya, onoophwanya okumi,Nave Yehova onoomweemererya.
36 Masi ale anikithanya, anniikumiherya maxakha,Ale anikinyokha, anithanla okhwa”.
Inoota
^ Aahiiso, “Soohiyeriwa sa efaita”.
