Miruku 6:1-35
6 Mwanaka, mwaamukophenle ene mukhwiinyu,Mwanvanhe ene ntata* mutthu muhimmusuwela anyu,
2 Mwaamorenle ene vantaphani, mwaha wa etthu muleihenrye anyu,Mwaavariwe ene ni ntapha mwaha wa moolumo anyu,
3 Mwanaka, etthu mukhanle anyu oopaka wiira moopowe,Mwaha wa omorela mmatatani mwa mukhwiinyu, tiila:
Mwiiyevihe ni mwaakuveke omuxonttela mukhwiinyu.
4 Muhirupe nnakhala muhiwale maitho anyu,Muhinatthi opaka eyo.
5 Mwiitaphule ntoko naahe onoopowa mmatatani mwa mulipa-ooxaya,Ntoko mwaapalame onitthyawa mmatatani mwa mulipa onaavara axipalame.
6 Nyuwo mulipa-oonyoonyiwa, mwiixutte etthu ni eneneele;Nwehe iphiro saya wiira mukhalane ankhili.
7 Hata ehirina kumantanti, hata mukhulupale nnakhala namalamulela,
8 Eyo ennilokiherya yoolya aya okathi wa elimwe,Ennittottela yoolya aya okathi woohepha.
9 Nyuwo mulipa-oonyoonyiwa, munrowa wumpaathiki mpakha silini?
Munrowa ovenya silini opuro munirupa anyu?
10 Mwarupa vakhaani, mwaphwanya ikhove vakhaani,Mwaikhuraana vakhaani mphavelaka omumula,*
11 Ohaawa wanyu onimoorwa ntoko latarau,Nave othoiwa wanyu, onimoorwa ntoko mulopwana okunxe ikaruma sa ekhotto.
12 Mutthu ootakhala ni ohirina efaita, onilavula itthu soowoothiwa okathi wootheene.
13 Owo onninyopola niitho, onnivaha esinaale ni nnawu ni onnivaha esinaale ni ikatha.
14 Mwaha wa murima awe wootakhala,Okathi wootheene onnimpakela palano itthu sootakhala ni onnikumiherya ohiiwanana.
15 Tivo enoomukhumelela ehasara mootutuxerya;Moowaakuveya onoopwetexiwa, nave khiivo etthu enrowa okhoottiherya wiiraneya eyo.
16 Sookhala itthu 6 Yehova oninyokha awe;Aayo, sookhala itthu 7 onithanya awe:
17 Maitho oowiisoona, nlumi noowootha, matata animwiiva mutthu ohitthenke etthu,
18 Murima oniphavela opaka itthu sootakhala, inawu sintthimakela opaka itthu sootakhala,
19 Namoona onilavula itthu soowootha,Ni atthu ootheene anikumiherya ohiiwanana ni axinnaya.
20 Mwanaka, mwiiweleleke yooruma ya paapa anyu,Nave muhihiye malakiheryo a* maama anyu.
21 Okathi wootheene muheleke vamurimani vanyu.Mutthukeleleke muxikoni mwanyu.
22 Okathi munrowa anyu weettaka, sinimoohoolakani;Okathi munrowa anyu wumpaathiki, sinimooweha-wehakani;Nave okathi munrowa anyu ovenyaka, sinoowiixuttihakani.
23 Yooruma enlikana ni muthuko,Nlamulo ninlikana ni waarya,Nave opwapweliwa ni ottaruxiwa ti ephiro eniroiha wookumini.
24 Iyo sinoowaakiheryani muthiyana ootakhala,Sinoowaakiheryani nlumi nooweepesa na muthiyana onrupihana voohiloka.*
25 Vamurimani vanyu muhiphaveleke oreera wawe,Nnakhala muhihapuxiwe ni maitho awe oosamula,
26 Maana muthiyana namararuwa,* onnimwiiriha mulopwana ohalana epetaaso emosa ya ephaawu,Masi muthiyana ootheliwa ni mulopwana mukina, onnixaya okumi wooloka wa mulopwana mukina.
27 Niireke ookhala mutthu onihela mooro vapeeto vawe, ohinapaha ikuwo sawe?
28 Aahiiso, niireke ookhala mutthu onwerya weetta vasulu va mooro, ohinavya inawu sawe?
29 Eyo ti etthu eniiraneya ni mulopwana onrupa ni muthiyana a mulopwana mukina.Ole onrupa ni muthiyana owo, onoohukhummwa.
30 Latarau khoniirihiwa etthu,Akhala wiira oniiya mwaha woovoliwa etala.
31 Hata vari siiso, avariwa owo onooliverya ikwaha 7 itthu sootheene iiyale awe;Nave onoovahererya itthu sootheene sa faita orina awe vatthokoni vawe.
32 Ole oniraruwa ni muthiyana, khorina mweettelo wooloka;*Ole onipaka eyo onniikumiherya maxakha.
33 Owo onrowa wiivulaliha paahi ni onrowa othanyiwaka.Nave okathi wootheene, onrowa wuuliwaka muru.
34 Ehace ennimwiiriha mulopwana oothela onanariwa vanceene;Owo khonrowa omoriwa ikharari nihiku na wunla ikuhu.
35 Owo khonrowa weemererya oliviwa.Khonrowa omukhurunuwa murima, hata munvahaka etthu ya musurukhu munceene.
Inoota
^ Eyo piiyo, mwaiwananne ene etthu.
^ Aahiiso, “ophumurya”.
^ Aahiiso, “nlamulo na”.
^ Eheeperi, “ muthiyana a elapo ekina”. Nwehe Miruku 2:16.
^ Onihimmwa muthiyana onirupihiwa ni mulopwana ophavelaka musurukhu.
^ Eheeperi, “khorina murima”.
