Matheyo 15:1-39
15 Afarisi akina ni alipa-oowiixuttiha Nlamulo, yaahirwa akhumaka oYerusalemu. Nto yaahimwaattamela Yesu, anamukoha wira:
2 “Xeeni awiixutti anyu ahinittittimiha aya soolema sa amuhavinre? Mwa ntakiheryo, awo anoolya ahinyanwe”.*
3 Yesu aahiwaakhula oriki: “Xeeni nyuwo muhinittittimiha anyu sooruma sa Muluku, mwaha wa soolema sanyu?
4 Mwa ntakiheryo, Muluku oohimya wira: ‘Mwaattittimiheke apapinyu ni amaminyu’. Nave oohimya wira: ‘Ole onaaveeha* apapawe ni amamawe, ohaana wiiviwa’.
5 Masi nyuwo munihimya wira: ‘Ole onaaleela apapawe aahiiso amamawe wira: “Itthu kaarina aka wookhaliheryani, kooleiherya onvaha Muluku”.
6 Owo khonivekeliwa waattittimiha apapawe’. Tivo, nyuwo muhiiriha nuulumo na Muluku ohikhalana efaita mwaha wa soolema sanyu.
7 Nyuwo anawoothe, Yesaya aahilavula ekeekhai oohimyakani nyuwo, oriki:
8 ‘Atthu ala anikittittimiha ni eyano paahi, masi mirima saya khisikhanle vaavo.
9 Anikikokhorela mahala ene, okhala wira aniixuttiha sooruma sa atthu’”.
10 Vano aahiihana muttitthi ole wa atthu vaari awe, onahimeerya wira: “Mukiwiriyane ni musuwele saana:
11 Etthu enimunanariha mutthu khahiyo ele enikela mwaano mwawe, masi enimunanariha tiile enikhuma mwaano mwawe”.
12 Vano awiixutti awe yaahimwaattamela, anahimya wira: “Moosuwela wira afarisi aaveeheya ni moolumo anyu?”
13 Yesu aahiwaakhula oriki: “Khula mwiri ohaaliwe ni Tiithi aka a wiirimu, onoopheliwa.
14 Mwaahiyeke. Awo atthu ahinoona aniweettiha akina ahinoona. Vano, mulipa-oohoona aamweettihaka mukhwaawe ohinoona, oowanli aya anoomorela mulittini”.
15 Pedru aahinvekela Yesu iiraka: “Munitaphulele nlikanyiho nla”.
16 Yesu aahiira: “Kiireke nyuwo-tho nlelo khamuniiwexexa?
17 Khamunsuwela wira itthu sotheene sinikela mwaano, sinnivira mmirimani, khiyakhumela ota?
18 Veekeekhai, itthu sotheene sinikhuma mwaano, sinikhuma vamurimani. Nto iyo ti itthu sinimunanariha mutthu.
19 Mwa ntakiheryo, vamurimani sinnikhuma miyuupuwelo sootakhala: wiiva, oraruwa, orupihana woohiloka,* wiiya, wootherya ni onveeha Muluku.
20 Iya ti itthu sinimunanariha mutthu. Masi olya ohinyanwe,* khonimunanariha mutthu”.
21 Yesu aahivenya opuro ole, onarowa muttetthe wa oTiro ni oSidoni.
22 Vano, muthiyana mmosa a oFeniisia, aakhuma muttetthe yoole, aahimwaattamela Yesu, onakhuwela oriki: “Pwiya, Mwaana a Davidi, mukimorele ikharari. Mwanaka mwaamuthiyana, onnihaawa vanceene mwaha wa nlaikha nootakhala ninvanre”.
23 Masi Yesu khaamwaakhunle etthu. Nto awiixutti awe yaahimwaattamela enanvekela wira: “Mmuleele muthiyana ola oroweke, maana onimakela wunla onittharaka”.
24 Yesu aahimwaakhula wira: “Muluku okirumme orowa wa atthu a Isarayeli paahi, yaawo ari ntoko ipwittipwitthi sirimenle”.
25 Masi muthiyana ole aahimwaattamela Yesu, uurama ohoolo wawe, onahimya wira: “Pwiya, mukikhaliherye!”
26 Yesu aahimwaakhula wira: “Khivanireerela owaakha anamwane yoolya, onaarihela axaana a alapwa”.
27 Muthiyana owo aahiira: “Aayo, Pwiya. Masi hata axaana a alapwa, annoolya itathela sinimora vameesa va axipwiyaya”.*
28 Nto Yesu aahimwaakhula wira: “Khoo muthiyana! Waamini wanyu ti wuulupale. Yiiraneye ntoko siniphavela anyu”. Okhuma ewoora ene yeele, mwanawe aahikhala saana.
29 Yesu aahivenya opuro ole, onarowa waattamela ephareya ya oGalileya. Aahiwela vamwaako, okilaathi vaavo.
30 Nto mittitthi suulupale sa atthu, saahirowa vaari awe, simuroihelaka atthu oorakala, yaatuthunya, oohoona, yahaalavula, ni aretta akina anceene. Vano aretta awo yaanaataleliwa ohoolo wa Yesu, nto owo aanaapenuxa.
31 Tivo, muttitthi ole wa atthu waahitikinihiwa owoona ale yahaalavula, alavulaka; ale yaatuthunya, apenuxiwe ene; ale oorakala, yeettaka oratteene; alipa-oohoona, yoonaka. Atthu otheene yaahinvuwiha Muluku a Isarayeli.
32 Yesu aahiwiihana awiixutti awe, khwaahimeerya wira: “Muttitthi ola wa atthu onnikooniha othunku, maana wookhala ni miyo mahiku mararu, ohilyiiye etthu. Nave nkiniphavela owiirela orowa owaani evoliwe ene etala,* wira ahimore mustaraatani”.
33 Masi awiixutti yaahimukoha wira: “Ninrowa ophwanya vai, opuro ola woorakamela omuttettheni, iphaawu siniphiyerya ovaha muttitthi muulupale siisa?”
34 Yesu aahaakoha wira: “Murina iphaawu ikavi?” Awo yaahaakhula ariki: “Nrina iphaawu 7 ni ihopa vakhaani, saamukhaani”.
35 Nto Yesu aahiruma muttitthi ole wa atthu okilaathi vathi.
36 Nuumala-vo, aahikuxa iphaawu iye 7 ni ihopa, aahivekela. Vano aahikawanya iphaawu iyo, aavaha awiixutti, nto awiixutti yaahikawela mittitthi iye.
37 Atthu otheene yaahilya mpakha ovona. Nuumala-vo, saahittotteliwa ipetaaso saahanle,* khusarya ittanka* 7 suulupale.
38 Vano atthu yaalyiiye yaari 4.000, ohaakontari athiyana ni anamwane.
39 Nuumala Yesu waamwarya atthu ale, aahikela mukalawani, onarowa muttetthe wa oMagadani.
Inoota
^ Afarisi ni ayuda yaaninyawa attharihelaka soolema saya.
^ Aahiiso, “onaaramusa”.
^ Ekereku, porneía. Nwehe Moolumo Ootthokiheriwa.
^ Afarisi ni ayuda yaaninyawa attharihelaka soolema saya.
^ Aahiiso, “axineene aya”.
^ Aahiiso, “ahilyiiye etthu”.
^ Aahiiso, “mapattuxa yaahanle”.
^ Aahiiso, “isestu; ittanka saaheliwa yoolya”.
