Masaalimu 9:1-20
Para tiretoore a isipo. Nsipo ninlavula sa muuthi-lapeemi.* Nsipo na Davidi.
א [aalefe]
9 Khoo Yehova, kinimoottottopelani ni murima aka wootheene;Kinoolaleya miteko sanyu sootheene sootikiniha.
2 Kinootteeliwa murima ni ohakalala mwaha wa nyuwo;Muluku Muulupalexa, kinimwiipaka isipo kittottopelaka* nsina nanyu.
ב [beete]
3 Okathi awanani aka anrowa aya otthyawa,Awo anoomora ohoolo wanyu ni anoopwetexiwa.
4 Nyuwo munnikaakiha wiira kiireliwe exariya;Mookilaathi veehiceni vanyu, munaphuka milattu mwa xariya.
ג [kiimele]
5 Moopwetexa maloko, muhaapwetexa atakhali,Moottipiha nsina naya para mahiku ootheene.
6 Atakhali aapwetexiwa wiira ahitthikele-tho okhala;Moomala-maliha ipooma saya,Khaavo-tho onrowa owuupuwela.
ה [he]
7 Masi Yehova ori veehiceni vawe mahiku ootheene;Owo onnilamulela wiira ekhaleke exariya.
8 Owo onimwaaphukela mwa xariya atthu anikhala mulaponi;Onoophukela maloko, ottharaka exariya.
ו [vaawu]
9 Yehova onrowa okhala ntthyawelo noolipa* para atthu oohaaxiwa,Ntthyawelo noolipa okathi wooxanka.
10 Ale anisuwela nsina nanyu, animoororomelakani;Yehova, ale aniwaavyani khanikhala-khala yoohiyakani.
ז [saine]
11 Mmuttottopeleke Yehova ni isipo, yoowo onikhala oSiyoni;Mwaasuweliheke atthu miteko sawe.
12 Muluku onniwuupuwela ale anihaaxiwa;Ni onoowunlela ikuhu ale awiivale.
ח [heete]
13 Xontte Yehova, mukimorele ikharari;Moone moota anikihaaxa aya ale anikinyokha,Ti nyuwo munikoopola mookhwaani,*
14 Wiira kilaleye miteko sanyu soottottopeleya,Vamukhora va anamwane axithiyana a oSiyoni,Ni wiira kitteeliwe murima mwaha woowi nyuwo mookoopola.
ט [teete]
15 Maloko aamorela nlitti athimpe aya;Metto saya sookweiwa mmatthavini, aneene yaawo avinthe aya.
16 Yehova onnisuweliwa mwaha wa maphukelo awe.
Atakhali aamorela mmuraakhoni, mwaha wa miteko saya.
Hikaiyoomi.* (Selahi)
י [iyoote]
17 Atakhali anoorowa Mmahiye,*Ti memmo anirowa aya maloko ootheene animuliyala Muluku.
18 Masi alipa-oohaawa, khanikhala-khala aliyaliwaka;Nnakhala nlipelelo na atthu oomaala, khaninrowa omala.
כ [kaafe]
19 Xontte Yehova, nvenye! Muhimuhiye pinaatamu oxinttaka.
Mphukele maloko muttharaka miteko saya.
20 Xontte Yehova, nwoopopihe,Maloko asuwele wiira awo ti apinaatamu paahi. (Selahi)
Inoota
^ Nwehe Moolumo Ootthokiheriwa.
^ Aahiiso, “opaka nsipo”.
^ Aahiiso, “ntthyawelo noorakama”.
^ Eheeperi, “munikoopola mukhora wa wookhwaani”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
