Masaalimu 56:1-13
Para tiretoore a isipo. Nsipo ninlavula sa Epompa Yoomaala Enikhala Ottaiwene. Mikitaami.* Esaalimu ya Davidi, yeeyo iipale awe okathi afilisti yanvanre aya oGaathi.
56 Xontte Muluku, mukireerele murima, okhala wiira apinaatamu annikituphela.*
Nihiku nootheene anniwana ni miyo, ni annikihaaxa.
2 Khula nihiku, awanani aka annikilupattha;Atthu anceene anniittottopa mwaha wa owana ni miyo.
3 Okathi kinoova aka, kinnoororomelani nyuwo.
4 Kinnimuroromela Muluku, yoowo kinittottopela aka nuulumo nawe;Kinnimuroromela Muluku, ni nkinoova etthu.
Nto pinaatamu onrowa okiiriha exeeni?
5 Khula nihiku, awo annipaka itthu wiira akoonihe owereya;Awo anuupuwela okikumiherya mixankiho paahi.
6 Anniipitha wiira akituphele;Annikiwehaweha khula opuro kinivira aka,Aphavelaka okiiva.
7 Mwaakhootte atthu awo, mwaha wa otakhala waya.
Xontte Muluku, mwaavahe ehukhumu munanariwe ene.
8 Nyuwo munnisuwela mapuro kinivira aka.
Muthukumanye maithori aka mmurupani mwanyu mwa esapala.
Nyuwo moolepa maithori awo muliivuruni mwanyu.
9 Nihiku kinrowa aka owiitthanani wiira mukikhaliherye, awanani aka anootthikela ottuli.
Kinnikupali wiira Muluku ori ni miyo.
10 Miyo kinnimuroromela Muluku, yoowo kinittottopela aka nuulumo nawe;Miyo kinnimuroromela Yehova, yoowo kinittottopela aka nuulumo nawe;
11 Kinnimuroromela Muluku, ni nkinoova etthu.
Nto pinaatamu onrowa okiiriha exeeni?
12 Muluku, miyo koosuwela wiira kihaana waataphula anatiri koomanenlyaakani;Kinimoovahani mikuttho sa oxukhurela.
13 Nyuwo mookoopola mookhwaani,Mookikhaliherya wiira kihikwattuliwe.*Siiso, kinookhalaka mukumi, ni kinimweettaka ohoolo wa Muluku.
Inoota
^ Nwehe Moolumo Ootthokiheriwa.
^ Aahiiso, “anneererya okikhuura”.
^ Aahiiso, “kihikwathule; kihikakattuwe”.
