Masaalimu 147:1-20
147 Mmuttottopele Yah!*
Ti vooreera omuttottopela Muluku ahu ni isipo;Ti vooreera ni ti vookhalela omuttottopela yoowo!
2 Yehova ootthikela epooma ya oYerusalemu;Owo onnaattikiha aisarayeli yaari weepotthani.
3 Onnaamaaliha ale ariipiwe murima,Owo onnitthukwa makhwatta aya.
4 Owo onnisuwela mwaattelo wa itheneeri;Onniihana khula etheneeri ni nsina naya.
5 Pwiya ahu ti muulupale ni tooweryexa;Osuwela wawe khorina mukano.
6 Yehova onnimukhaliherya ni omweemexa mutthu oowiiyeviha,Masi, onnimurihela vathi mutakhali.
7 Mmwiipeleke isipo Yehova, mmuxukhurelaka;Mmuttottopeleke Muluku ahu ni isipo, muttharaka ni viola.
8 Ti yoowo onikhuneela erimu ni meeku,Onirupiha epula mulaponi,Ni onimeliha malaxi vamwaako.
9 Onnivaha eyoolya inama,Ni onnaavaha eyoolya axaana a anakhuku aninlela.
10 Para yena, owerya wa ikhavalo khahiyo etthu;Nave-tho, owerya* wa mutthu, khahiyo etthu.
11 Yehova omusivela atthu yaale animuttittimiha vanceene,*Yaale anilipelela ophenta wawe woororomeleya.
12 Nyuwo Yerusalemu, munvuwihe Yehova.
Nyuwo Siyoni, mmuttottopele Muluku anyu.
13 Owo onnilipiha itaranka sa mikhora sa epooma anyu;Onnaareeliha aniinyu.
14 Onniruuha murettele mmuttettheni mwanyu;Onnoovahani etiriku yooreerexa eniphiyerya.
15 Owo onnihimya etthu ekhanle oowiiraneya mulaponi;Moolumo awe anneetta moowaakuveya.
16 Owo onnimoroxa eneevi ntoko nxotte;Onnimwara-mwarya eneevi ntoko ettuurwa.
17 Onnimoroxela vathi maralala,* ntoko itathela sa ephaawu.
Ti pani oniwerya ovilela oriirya?
18 Owo onnilavula, nto maralala anatothowa.
Onniiriha epheyo woopa, maasi anavira.
19 Onnimuleela Yakobe nuulumo nawe,Nave onnimuleela Isarayeli malamulo awe ni ophukela wawe.
20 Owo khotonko wiira siiso ni maloko makina;Maloko awo khanisuwela ophukela wawe.
Mmuttottopele Yah!*
Inoota
^ Aahiiso, “Aleluya!” “Yah” ti enamuna yookhuveya ya nsina na Yehova.
^ Eheeperi, “metto”.
^ Eheeperi, “animoova”.
^ Aahiiso, “exeelu”.
^ Aahiiso, “Aleluya!” “Yah” ti enamuna yookhuveya ya nsina na Yehova.
