Masaalimu 144:1-15
Nsipo na Davidi.
144 Ottottopeliwe Yehova, yoowo ori mwala aka,Ti yoowo onikiixuttiha owana ekhotto.
2 Ti yoowo onikooniherya ophenta wawe woororomeleya, ni tori empa aka yoolipihiwa,Ti ntthyawelo naka noolipa* ni tori moopoli aka,Owo tori nikula naka na wiixaakihana* ni tonikikhapelela,Ti yoowo oniwiiriha atthu okiiwelela.
3 Khoo Yehova, pinaatamu ti pani wiira mmuthokoreryeke,Nave mwaana a mutthu ti pani wiira mmuthokoreryeke?
4 Pinaatamu onikhala ntoko iphumu;Mahiku awe ari ntoko muuttutthi onivira.
5 Khoo Yehova, mukuruxe* erimu anyu, wiira mukhuruwe;Mukwate miyaako ni mwiirihe otthuwa mwiixi.
6 Mwiirihe woopa etari ni mwaamwarye awanani;Nvonye mattheere* anyu ni nwaakanyerye.
7 Muri ene wiirimu, mookole matata anyu;Mukoopole ni mukikumihe mmaasini moowiixa,Mukoopole mmatatani mwa amalapo,
8 Yaawo anilavula moolumo oowootha,Nave aneemexa ntata naya noolopwana wiira alaphe mahala ene.
9 Khoo Muluku, kinoowiipelani nsipo na niinaano.
Kinimoottottopelani kiipaka isipo, kittharaka ni ekaruma ya isipo erina mikhoyi 10.
10 Kinoowiipelani nyuwo muniwiiriha mamwene oxintta,Ti nyuwo munimukhapelela murumeyi anyu Davidi, wiira ohiiviwe ni espaata.*
11 Mukoopole ni mukaakiherye mmatatani mwa amalapo,Yaawo anilavula moolumo oowootha,Nave aneemexa ntata naya noolopwana wiira alaphe mahala ene.
12 Vano, aniihu axilopwana, anrowa olikanaka ni miri suulupale,Aniihu axithiyana, anrowa olikanaka ni ipilaari sooreerihiwa siri mukantu mwa empa ya mwene.*
13 Arumasiya ahu, anrowa osareya soolya sa khula enamuna;Mmatta mwahu, inama sinimuncerereya ikonto, ikonto sene.
14 Ipooyi sahu sirupanle, khasinrowa ovulala aahiiso oyiiheya erukulu,Mapuro oowaatta atthu, khuuvo onrowa okhuwela mwaha wooxanka.
15 Nloko noohakalala, ti nenle Muluku onreeliha awe ni itthu iya sootheene!
Nloko noohakalala, ti nenle Muluku aya ori Yehova.
Inoota
^ Aahiiso, “ntthyawelo niri nipuro noorakamela osulu”.
^ Aahiiso, “eskuutu aka”.
^ Aahiiso, “muthetemanihe”.
^ Aahiiso, “mareetthe”.
^ Aahiiso, “xoowa”.
^ Aahiiso, “epalaasio”.
