Masaalimu 105:1-45
-
Miteko sinooniherya ororomeleya Yehova oniwiirela awe atthu awe
105 Mmuxukhureleke Yehova, muromoleke nsina nawe,Mwaasuweliheke atthu miteko sawe!
2 Mmwiipeleke Muluku, mmwiipeleke isipo mmuttottopelaka,Muupuweleleke* miteko sawe sootheene sootikiniha.
3 Mwiittottopeke mwaha wa nsina nawe noowaarya.
Ale animwaavya Yehova, etteeliweke murima.
4 Mmwaavyeke Yehova ni muroromeleke ikuru sawe.
Okathi wootheene, mphaveleke wiira ookhaliheryeni.
5 Muupuweleke miteko sootikiniha ovanre awe,Muupuweleke miiriirya sawe ni enamuna aaphukenle awe atthu,
6 Nyuwo osuulu wa Abrahamu, murumeyi a Muluku,Nyuwo anamwane a Yakobe, muthanliwe nuuwo.
7 Owo ti Yehova, Muluku ahu.
Owo onniphukela elapo yootheene.
8 Onnuupuwela nivarihano nawe, mahiku ootheene,Khonikhala-khala oliyalaka etthu oleihenrye awe,*
9 Nivarihano opanke awe ni Abrahamu,Ni etthu omulaphenle awe Isaakhi.
10 Muluku aahimulipiherya Yakobe, etthu ele aalamphe awe,Nave aahiiriha okhala nivarihano na mahiku ootheene para Isarayeli.
11 Owo aahimmye wiira: “Kinimoovahani elapo ya oKanaani,Wiira ekhale yawinyu.
12 Eyo yaahiiraneya okathi awo yaari aya vakhaani,Aayo, vakhaanixa, nave yaari aya anamurwa mulaponi.
13 Awo yaaneetta akhumaka elapo emosa, arowaka elapo ekina,Akhumaka omwene omosa, arowaka omwene mukina.
14 Owo khamweemerenrye nnakhala mutthu mmosa waahaaxa,Masi mwaha wa yaawo, aahaapwapwela mamwene,
15 Oriki: “Muhaavare atthu aka kaathanlale aka,Nave muhiwiirihe etthu yootakhala maprofeta aka”.
16 Aahikumiherya etala mulaponi;Owo aahihiya waavaha ephaawu.*
17 Aahimuhooliha mulopwana mmosa ohoolo waya,Yosefe, yoowo aatumihiwe ntoko epottha.
18 Inawu sawe saahitthukiwa ni ikwirinti;Exiko awe yaahitthukiwa ni ekwirinti,
19 Mpakha okathi yiiraneyale aya etthu Muluku aaleihenrye awe,Nuulumo na Yehova ti naamureerihale.
20 Mwene aahiruma otaphuliwa,Aayo, mwene owo, aahiruma otaphuliwa mukhatteya.
21 Owo aahimukhaliha mukhulupale a etthoko awe,Ni mutthu aakhapelela mireerelo sawe sootheene,
22 Ni wiira aahooleleke makhulupale awe ntoko aaphavela awe,Ni owiixuttiheke axitokweene a mwene okhalana miruku.
23 Vano, Isarayeli aahiphiya wExiitu,Nave Yakobe aanikhala ntoko namurwa, mulaponi mwa Khami.
24 Muluku aahiwiiriha atthu awe waatta;Aahiwiiriha okhala ootupa waavikana awanani aya.
25 Owo aahaahiya awanani awo yaanyokhaka atthu awe,Ni oweettela olavilavi arumeyi awe.
26 Aahimuruma Moise, eyo piiyo, murumeyi awe,Ni Aroni, yoowo aamuthanlale awe.
27 Awo yaahipaka miiriirya sa Muluku ohoolo wa atthu,Yaahipaka miiriirya sawe, mulaponi mwa Khami.
28 Aahikumiherya epiphi, nto elapo ele yaahiriipela;Awo yaaniiwelela moolumo awe.
29 Owo aahitatuxa maasi a wExiitu, khukhala ephome,Nave aahiiva ihopa saya.
30 Elapo ele yaahisareya anaphulu,Mpakha ophiya ikwaartu sa mwene.
31 Owo aahaaruma aphuure,*Ni apwilimwithi wiira ahonone mittetthe saya.
32 Aahitatuxa epula, khukhala maralala,Nave aahikumiherya etari* mulaponi mwaya.
33 Aahihonona imatta saya sa ewuuva ni miri saya sa efiiku,Nave aahintakasa miri sa mmuttettheni mwaya.
34 Owo aahilavula wiira okhumelele nasope,Aayo, nasope munceene.
35 Nasope owo aahikhuura itthu sootheene sikithi mulaponi,Nave aahikhuura itthu saaruweriwe mulaponi.
36 Nuumala-vo, aahiwiiva anamwane ootheene oopaceriwa oyariwa,Ni inama sootheene soopacerya ototholiwa mulaponi-mme,
Aayo, milipu sa ikuru saya sa oyara.
37 Aahaakumiha atthu awe elapo ele, akunxe ene eparatha ni eweero;Eriyari ya mahimo awe, khuuvo mutthu mmosa ooceyale.
38 Atthu a wExiitu yaahitteeliwa murima, okathi awo yaakhumme aya,Okhala wiira awo yaaniwoova vanceene aisarayeli.
39 Owo aahikumiherya neeku wiira naakhapeleleke,
Ni mooro wiira waamwaleeleke ohiyu.
40 Okathi yaavenke aya enama, owo aahaakumiherya anapiri;Ni aanaavaha eyoolya yaaphiyerya, yeeyo yaakhuma wiirimu.
41 Owo aahithala mwala, anakhuma maasi;Maasi awo yaanivira moothakoni ntoko muro.
42 Muluku aahuupuwela itthu soowaarya aamuleihenrye awe murumeyi awe Abrahamu.
43 Siiso, owo aahaakumiha atthu awe, awo yaahitthapa,Atthu awe oothanliwa, yaahikhuwela atteeliwe ene murima.
44 Owo aahaavaha ilapo sa maloko makina;Awo yaahihalana itthu yaahaawenle aya atthu akina.
45 Owo aaphavela wiira yiiweleleke sooruma sawe,Nave atthareke malamulo awe.
Mmuttottopele Yah!*
Inoota
^ Woonasa wene, “Mulavuleke sa”.
^ Eheeperi, “nuulumo orumme awe”.
^ Eheeperi, “wuntakasa ikopo sootheene sa iphaawu”. Woonasa wene, sinihimmwa ikopo saathomeiwa iphaawu saapakiwa ntoko anela.
^ Aahiiso, “malimwe”.
^ Aahiiso, “malumi a mooro”.
^ Aahiiso, “Aleluya!” “Yah” ti enamuna yookhuveya ya nsina na Yehova.
