Luka 22:1-71
-
Anamukuttho annimpaka palano wira amwiive Yesu (1-6)
-
Olokiheriwa Paasikha ookiserya (7-13)
-
Opacerihiwa Yoolya ya Ohiyu ya Apwiya (14-20)
-
“Ole onrowa okivariha, ori ni miyo vameesa” (21-23)
-
Onyakulihana mwaha wa okhulupale (24-27)
-
Nivarihano na Yesu na omwene (28-30)
-
Yesu onnihimya vahinatthi wira Pedru ammukhootta (31-34)
-
Oreerela waya okhala oolikana; axoowa anli (35-38)
-
Nivekelo na Yesu vamwaako Olivera (39-46)
-
Yesu onnivariwa (47-53)
-
Pedru onnimukhootta Yesu (54-62)
-
Yesu onniveehiwa (63-65)
-
Ophukeliwa ohoolo wa eSineedrio (66-71)
22 Nto, yaanaattamela Efesta ya Iphaawu Soohiheliwa Eferemento, yeeyo eniihaniwa Paasikha.
2 Makhulupale a anamukuttho ni alipa-oowiixuttiha Nlamulo, yaaniphavelasa enamuna yooreerela wira anvare Yesu, mwaha woowi yaaniwoova atthu.
3 Nto Satana aahimukela Yuda, yoowo aihaniwa Isikaryoti, aari mmosa a arummwa 12.
4 Yuda owo, aahirowa ovaanela ni makhulupale a anamukuttho ni ahooleli a etemplo moota wonvariha Yesu.
5 Awo yaahitteeliwa murima vanceene, avarihana onvaha musurukhu wa eparatha.
6 Owo aaheemererya ni aahipacerya ophavelasa okathi wooreerela onvariha Yesu, muttitthi wa atthu ohisuwelaka.
7 Naahiphiya nihiku noopacerya na Efesta ya Iphaawu Soohiheliwa Eferemento, nenlo aahitiwa awe mwaamunama a yoolya ya Paasikha.
8 Nto Yesu aahimuruma Pedru ni Yohani, iiraka: “Murowe mwanilokiherye yoolya ya Paasikha wira nilye”.
9 Awo yaahimukoha wira: “Muniphavela wira nalokiherye woowi yoolya eyo?”
10 Owo aahiwaakhula oriki: “Mwiiwe! Okathi muniphiya anyu opooma, munookumana ni mulopwana mmosa, okunxe ene murinki wa maasi. Nto mmutthare empa onrowa awe okela.
11 Mmuleele mwaneene empa eyo, wira: ‘Mwiixuttihi onihimya so: “Eri woowi esaala ya aletto kinrowa aka omulya Paasikha ni awiixutti aka?”’
12 Mulopwana owo onoowooniheryani esaala yuulupale eri osulu, elokiheriwe ene. Mmulokiherye memmo”.
13 Siiso, awo yaahirowa, aphwanya itthu ntoko Yesu aahimenrye awe. Vano yaahimulokiherya Paasikha.
14 Nto, yaaphiyale aya ewoora, Yesu ni arummwa awe yaahikilaathi ahaamela vameesa.
15 Vano Yesu aahaahimeerya wira: “Kaahiphavela vanceene omulya Paasikha ola ni nyuwo, kihinatthi ohaawa.
16 Tthiri kinooleelani wira, nkinrowa omulya-tho Paasikha, mpakha vanrowa awe omalelihiwa Moomweneni mwa Muluku”.
17 Yesu aahaakhela ekaalisi ya eviinyu, aahivekela, onahimya wira: “Mukuxeke ela, mukawaneke,
18 maana kinooleelani wira okhuma olelo orowa ohoolo, nkiniwurya-tho eviinyu ela, mpakha Omwene wa Muluku orwa”.
19 Nave-tho, aahikuxa ephaawu, aahivekela, aahikawanya, onaavaha awiixutti awe, iiraka: “Ela enithoonyerya erutthu aka, yeeyo kinrowa aka ovaha wira mphwanye mureerelo. Muthipeleleke opaka ela mukuupuwelaka miyo”.
20 Siiso-tho, nuumala olya, aahipaka etthu emosa-ru ni ekaalisi ya eviinyu, oriki: “Ekaalisi ela enithoonyerya nivarihano na niinaano, nenlo nlipihiwe ni ephome aka, wira mphwanye mureerelo.
21 “Nto, moone wira ole onrowa okivariha, ori ni miyo vameesa.
22 Veekeekhai, Mwaana a mutthu onrowa okhwa ntoko silempwale aya. Masi ootakhaliwa mutthu ole onrowa onvariha!”
23 Awiixutti yaahipacerya okohana, aphavelaka omusuwela ti pani a yaawo aarowa opaka etthu eyo.
24 Masi, waahikhumelela-tho ovaanyihana wuulupale yaawo-ru, aphavelaka omusuwela ti pani ooniwa okhala muulupalexa.
25 Vano, Yesu aahaaleela wira: “Mamwene a mulaponi, annaapuherya atthu aya, nave makhulupale anaawerya atthu awo, annisuweliwa okhala atthu aniwiirela itthu sooreera akhwaaya.
26 Masi nyuwo muhiireke siiso. Ole ori muulupalexa eriyari anyu, okhaleke ntoko mwaamukhaani. Ole ori muhooleli, okhaleke ntoko ole onirumeela.
27 Muulupalexa ti pani? Niireke tuule onilya* aahiiso ole onirumeela?* Kiira tuule onilya?* Miyo kiri eriyari anyu ntoko ole onoorumeelani.*
28 “Nyuwo khimwaakihiyale hata okathi keehereriwa aka.
29 Nave, miyo kinipaka nivarihano na omwene ni nyuwo, ntoko Tiithi aka opanke awe nivarihano na omwene ni miyo,
30 wira mulyeeke ni nwuryeke vameesa vaka Moomweneni mwaka, ni mukilaathele ihice wira mphukeleke mahimo 12 a Isarayeli.
31 “Nyuwo Simoni! Simoni, mwiiwe: Satana oohimya wira oniphavela wira otheene anyu nveeriwe ntoko etiriku.
32 Masi kinnimuxonttela Muluku wira waamini wanyu ohihononeye, wira mwatthika mwaalipihe axinninyu”.
33 Vano Pedru aahimuhimeerya Yesu wira: “Pwiya, koolikanana orowa ni nyuwo mpakha otthukweliwa ni mpakha okhwa”.
34 Yesu aahihimya wira: “Pedru, kinooleelani wira, muthupi ohinatthi wiipa olelo, nyuwo munookhootta ikwaha tthaaru wira munnikisuwela”.
35 Yesu aahaakoha awiixutti awe wira: “Okathi koorumalyaakani orowa muhikunxe murupa oniheliwa musurukhu, nnakhala murupa wa yoolya ya mukwaha ni isantaalya, yaahikhala etthu yoothonweni?” Awo yaahaakhula ariki: “Nnaari!”
36 Nto aahaahimeerya wira: “Vano, ole orina murupa oniheliwa musurukhu, ni orina murupa wa yoolya ya mukwaha, okuxeke. Nave, ohirina xoowa,* otumihe nlaya nawe na ota, omuthume mmosa.
37 Kinooleelani wira, ele elempwale, ehaana okiiraneela, yeeyo enihimya wira: ‘Owo ohooniwa okhala ntoko ale ahiniiwelela malamulo’. Tthiri, enniiraneya ele yaahimmwale wira yaamukiiraneela”.
38 Awo yaahimuhimeerya wira: “Pwiya, nookhalana axoowa ala anli”.* Nto owo aahiwiirela: “Aaphiyerya”.
39 Yesu aahivenya, khurowa omwaako Olivera, ntoko aalimalenle awe. Nave awiixutti yaahimutthara.
40 Vaaphiyale aya opuro owo, Yesu aahiwiirela: “Muhihiye ovekela wira muhimore mweehereriwaka”.
41 Vano owo aahaahiya eetta mavalo vakhaani, okokhora, onavekela,
42 oriki: “Tiithi, mwaphavela, mukumihe ekaalisi* ela ohoolo waka. Vano, ehiireye ntoko kiniphavela aka, masi yiireye ntoko muniphavela anyu”.
43 Okathi ene yoole, nlaikha na wiirimu naahimukhumelela, nnamulipiha.
44 Masi, Yesu aahiriipiwa murima vanceene, onatepa ovekela, olipiheryaka. Vano orettheela wawe waari ntoko mattonttoni a ephome yaamorela vathi.
45 Nuumala ovekela, aahirowa vaari awiixutti awe aaphwanya erupaka, okhala wira yaahikhulumuwa mwaha wa oriipiwa murima.
46 Yesu aahaakoha wira: “Munrupela-ni? Nvenye, muhihiye ovekela wira muhimore mweehereriwaka”.
47 Yesu olavulaka nlelo, waahiphiya muttitthi wa atthu, ohooliwaka ni Yuda, mmosa a arummwa 12. Vano Yuda owo, aahimwaattamela Yesu wira onvahe epeexo.
48 Masi Yesu aahimuhimeerya wira: “Yuda, muninvariha Mwaana a mutthu ni epeexo?”
49 Ale yaari ni Yesu, voonale aya etthu yaarowa wiiraneya, yaahimukoha wira: “Pwiya, naarumeeleke axoowa ahu?”*
50 Vano, mmosa a yaawo, aahiikittha niyaru noolopwana na murumeyi a namukuttho muulupale.
51 Masi Yesu aahiwaakhula wira: “Muhiire siiso”. Nto aahinvara niyaru murumeyi owo, khimpenuxa.
52 Yesu aahaahimeerya makhulupale a anamukuttho ni ahooleli a etemplo ni makhulupale a ayuda, yaarwenle onvara, oriki: “Nyuwo mukirwenle ni axoowa* ni ikopo ntoko latarau?
53 Okathi kaari aka ni nyuwo khula nihiku mutemplo, nyuwo khimwaakivanre. Masi ela ewoora anyu, ni ewoora epiphi enilamulela aya”.
54 Awo yaahinvara Yesu, amuroiha vatthokoni va namukuttho muulupale. Vano Pedru aanimutthara omurakamenle ene.
55 Okathi atthu yaapattihale aya mooro eriyari ya nivate, khukilaathi hoothe, nave Pedru aahikilaathi ni yaawo.
56 Masi murumeyi mmosa mwaamuthiyana, aahimoona Pedru okilanthi ene waattamela vamooroni. Aahinwehexexa oratteene, onahimya wira: “Nave-tho, mulopwana ola eetta ni yoole”.
57 Masi Pedru aahikhootta, iiraka: “Muthiyana, miyo nkinimusuwela ole”.
58 Nuuvira okathi vakhaani, mutthu mukina aahinweha Pedru, onahimya wira: “Nave-tho, nyuwo mwa mmosa a awiixutti awe”. Masi Pedru aahiira: “Mulopwana, khahiyo ti yoomi”.
59 Nuuvira ewoora emosa, mulopwana mukina aahipacerya olavula ohaanyiheryaka, oriki: “Mweekeekhai, mulopwana ola aari ni yoowo, maana ola mugalileya tthiri!”
60 Pedru aahaakhula iiraka: “Mulopwana, miyo nkinisuwela enihimya anyu”. Nlelo olavulaka, muthupi waahiipa okathi ene yoowo.
61 Niinaano-ru, Pwiya aahirukunuwa onanwehexexa Pedru. Vano Pedru aahuupuwela moolumo Pwiya aamuhimenrye awe wira: “Muthupi ohinatthi wiipa olelo, nyuwo munookikhootta ikwaha tthaaru”.
62 Pedru aahikhumela ota, onanla oriipiwe ene murima vanceene.
63 Vano, atthu yanvanre Yesu yaahipacerya onveeha, anammana.
64 Awo yaahimukhuneela owiitho wawe, anamukoha ariki: “Mwaari profeta, munileele, ti pani oomanneni?”
65 Nto yaanilavula moolumo manceene aninveeha Muluku, amuhimyaka Yesu.
66 Nuumala oxa, makhulupale a ayuda, eyo piiyo, alipa-oowiixuttiha Nlamulo ni makhulupale a anamukuttho, yaahithukumana. Awo yaahimuroiha oSineedrio* waya, anamukoha ariki:
67 “Nyuwo mwaari Kristu, munileele”. Masi Yesu aahiwaakhula wira: “Hata kooleelakani, nyuwo khamunrowa okupali nnakhala vakhaani.
68 Nave-tho, vaakhanle wira kihookohani, nyuwo khimwaarowa okaakhula.
69 Nto, okhuma vano orowa ohoolo, Mwaana a mutthu onrowa okilaathi moono woolopwana woowerya wa Muluku”.
70 Siiso, awo yaahimukoha, yiiraka: “Niireke nyuwo mwa Mwaana a Muluku?” Owo aahiwaakhula wira: “Ti nyuwo munihimya wira ka Mwaana a Muluku”.
71 Awo yaahihimya wira: “Khinnaaphavela-tho anamoona! Hiyo noomwiiwa olavulaka ni eyano awe”.
Inoota
^ Aahiiso “okilanthi ohamenle ene meesa”.
^ Aahiiso, “onivara muteko”.
^ Aahiiso “okilanthi ohamenle ene meesa”.
^ Aahiiso, “ole onoovarelani muteko”.
^ Aahiiso, “espaata”.
^ Aahiiso, “ispaata iya piili”.
^ Ekaalisi, enithoonyerya wira Muluku aahiphavela weemererya wira Yesu iiviwe, ootheriwaka onveeha Muluku.
^ Aahiiso, “nirumeeleke ispaata sahu”.
^ Aahiiso, “ispaata”.
^ Nwehe Moolumo Ootthokiheriwa.
