Esteeri 1:1-22
1 Mahiku a Asuwero,* eyo piiyo, Asuwero yoowo aalamulela iprovinsia 127 okhuma wIndia mpakha wEthiyopia,*
2 okathi yoowo, mwene Asuwero aahikilaathi veehiceni wawe ya omwene, opuro woolipihiwa wa oSusa,
3 eyaakha ya neeraru ya olamulelo awe, owo aahaapakela efesta makhulupale awe ni arumeyi awe ootheene. Nave opuro owo, yaahikhala maxeefi a anakhotto a oPersia ni a oMedia, atthu oovuwa ni makhulupale a iprovinsia.
4 Nave aahiviriha mahiku manceene, eyo piiyo, mahiku 180, owooniheryaka muhakhu wa omwene awe wuulupale, owerya wawe wuulupale ni ovuwa wawe.
5 Nuuvira mahiku awo, mwene aahaapakela efesta atthu ootheene yaakhala opuro woolipihiwa wa oSusa, okhuma aalupale mpakha akhaani, yeeyo yaamalinhe mahiku 7. Efesta eyo yaapakiwe vanivateni na exarti ya opalaasio wawe.
6 Yaahikhala ekortiina ya eliinyu, ya nxotte nooreerexa, ya ekuwo yooripelela yaatthaviwe ni mikhoyi sa ekuwo yooreerexa. Nave saahikhala mikhoyi sa eliinyu yooreerexa saatthukweleliwe anela a eparatha, vamosa ni ipilaari sa maluku a marmore. Nto ipilaari iyo saari vasulu va maluku aniihaniwa porfiru, a marmore ootteela, a maluku aniihaniwa maatrepeerola ni a maluku aniihaniwa marmore ooriipa, nave-tho saahikhala ikhatera sooreera sa eweero ni sa eparatha.
7 Vano eviinyu yaaheliwa mukaalisini ya eweero, khula ekaalisi yaari yoovirikana ni ekina. Yaahikaiwa eviinyu yinceene ya mwene, ntoko mwene aawerya awe.
8 Khuuvo aakhanyereriwa owurya, okhala wiira nlo naari nlamulo naatthariwa na okathi ole, maana mwene ni makhulupale a opalaasio wawe, yaahilakela wiira khula mmosa aahaana owurya ntoko aaphavela awe.
9 Nave-tho, pwiyamwene Vasti aahaapakela efesta athiyana, vatthokoni* va mwene Asuwero.
10 Nihiku na neethanu nenli, okathi mwene aahakalanle awe mwaha wa eviinyu, owo aahimuruma Mehumani, Bisitha, Haribona, Bigitha, Abagatha, Zethari ni Kaarika, makhulupale 7 yanvarela muteko, yaawo yaari anamakhaliherya a mwene Asuwero,
11 wiira amuruuhe ohoolo wa mwene pwiyamwene Vasti owanre ene ekhara* wiira mwene owooniherye atthu ni makhulupale oreera wawe, okhala wiira khaareere oreera.
12 Masi pwiyamwene Vasti aanithipelela okhootta etthu mwene aarumme awe makhulupale awe. Nto mwene aahinanariwa vanceene ni aahiviruwa.
13 Vano mwene aahaakoha asuweli, yaawo yaasuwela oratteene malamulo (okhala wiira myaha sa mwene yaaroiheliwa atthu ootheene yaasuwela nlamulo ni yaasuwela ophuka.
14 Atthu aamakela awe waakoha miruku, yaari ala: Karxena, Xetari, Adimatha, Taarisi, Meresi, Marsena ni Memukani. Makhulupale ala 7 a oPersia ni a oMedia yaakhala vakhiviru ni mwene, nave yaahikhalana ikarku suulupale moomweneni mwa mwene).
15 Mwene aahikoha oriki: “Moovarihana ni nlamulo, iirihiwe exeeni pwiyamwene Vasti mwaha woohiiwelela yooruma ya mwene Asuwero, aarumme awe makhulupale awe?”
16 Vano Memukani aahaakhula ohoolo wa mwene ni wa makhulupale iiraka: “Khahiyo paahi pwiyamwene Vasti okhoottale omwiiwelela mwene, masi-tho khaattittiminhe makhulupale ootheene ni atthu ootheene a iprovinsia sa mwene Asuwero.
17 Vano athiyana ootheene ootheliwa animwiiwa ele pwiyamwene epanke awe, nave animwaathanyaka axiiyaya ahimyaka wiira: ‘Mwene Asuwero aahiruma wiihaniwa pwiyamwene Vasti, masi owo aahikhootta orowa’.
18 Nihiku nenlo, axaaraya makhulupale ootheene a oPersia ni oMedia, anrowa aya wiiwa ele pwiyamwene epanke awe, anoowiirela etthu emosa-ru axiiyaya makhulupale ootheene a mwene, nto eyo enookumiherya ohiiwanana ni oviruwa vanceene.
19 Mwene oona oreerela, okumiherye yooruma ni nsina nawe, ni malamulo a oPersia ni oMedia, yaawo ahinttipihiwa. Murume olempwa wiira: Vasti khontthikela-tho orowa wa mwene Asuwero. Nave mwene onvahe muthiyana mukina ootepexa oloka onvikana yena, opuro awe wa opwiyamwene.
20 Okathi yooruma ya mwene enrowa aya osuweliwa moomweneni mwawe mootheene, athiyana ootheene animwaattittimihaka axiiyaya, akhale aalupale mpakha acikhaani”.
21 Moonelo ola waahimusivela mwene ni makhulupale, mpakha mwene opaka ele Memukani aahimmye awe.
22 Siiso, mwene aahiruma oroihiwa ikarta iprovinsia sootheene sa omwene awe, saalempwale moovarihana ni khula eprovinsia ni nttaava na khula mutthu, orumaka wiira khula mulopwana okhaleke mwaneene* etthoko, nave etthoko awe elavuliweke nttaava nawe.
Inoota
^ Vanikhala wiira onihimmwa Xerxe oopacerya, mwaana a Mukhulupale Dario (Dario Hixitapixi).
^ Aahiiso, “oKuxi”.
^ Aahiiso, “opalaasio wa”.
^ Eyo piiyo, enamuna emosa ya ekuwo mapwiyamwene yaawara aya mmuru wiira yiiphwanelihe.
^ Aahiiso, “mukhulupale”.
