aRoma 8:1-39
-
Munepa onnivaha okumi ni otaphuliwa (1-11)
-
Munepa wa Muluku onninikupaliha wira na anamwane a Muluku (12-17)
-
Soopattuxiwa sinrowa ophwanya otaphuwa wa anamwane a Muluku (18-25)
-
‘Munepa woowaarya onninivekelela’ (26, 27)
-
Othanliwa ni Muluku vahinatthi ophiya okathi (28-30)
-
Oxintta mwaha wa ophenta wa Muluku (31-39)
8 Vano, ale yiiranne ni Kristu Yesu, khanivahiwa mulattu.
2 Nto, nlamulo na munepa onivaha okumi, nihootaphulani munlamuloni na etampi ni okhwa, nyuwo munimutthara Kristu Yesu.
3 Nlamulo na Moise khinaawerya wootaphulani, okhala wira apinaatamu tootteettheya ni oottheka. Muluku anwerya owoopolani omurumaka Mwanawe, aalikana ni pinaatamu oottheka, wira omalihe etampi. Siiso, Muluku oolamula etampi mweerutthuni,
4 wira nimaliherye etthu ya xariya Nlamulo ninvekela aya, niheettihiwaka ni erutthu, masi neettihiwaka ni munepa.
5 Ale aniiwelela erutthu, anuupuwela itthu sa weerutthuni, masi ale aniiwelela munepa, anuupuwelela itthu munepa onaalakiherya aya opaka.
6 Wuupuwelela itthu sa weerutthuni, onniroiha wookhwaani. Masi wuupuwelela itthu sa munepa, onniphwanyiha okumi ni murettele.
7 Nahiya erutthu ahu yoottheka yeettihaka muupuwelo ahu, enoonikhaliha awanani a Muluku. Tthiri, erutthu ahu yoottheka kheniiwelela nlamulo na Muluku, hata kheniwerya wiiwelela.
8 Siiso, ale anitthara itthu siniphavela aya erutthu, khaniwerya omusiveliha Muluku.
9 Masi, nyuwo axinnaka, khamunitthara erutthu yoottheka. Akhala wira munepa wa Muluku onnikhala mwa nyuwo tthiri, weeso munikhala moovarihana ni munepa. Mutthu yoole ohirina munepa wa Kristu, mutthu owo khahiyo ta Kristu.
10 Masi, vakhala wira muhiiraana ni Kristu, munepa onnookhalihani akumi mwaha wa exariya, hata erutthu ekhwiiye ene mwaha wa etampi.
11 Munepa wa Muluku woomuhihimuxa Yesu mookhwaani. Akhala wira munepa owo ori mwa nyuwo, nto Ole omuhihimunxe Kristu Yesu mookhwaani, nave-tho onrowa okhaliha sikumi irutthu sanyu sinikhwa, orumeelaka munepa awe, yoowo ori mwa nyuwo.
12 Tivo, axinnaka, hiyo khaninkhanyereriwa wiiwelela erutthu yoottheka.
13 Mwaiwelela erutthu, tthiri munimookhwa. Masi mweemererya okhaliheriwa ni owerya wa munepa, wira mwiive miteko sa erutthu, nyuwo munookhala akumi.
14 Mweekeekhai, otheene ale aneettihiwa ni munepa wa Muluku, tthiri anamwane a Muluku.
15 Nyuwo khimwaakhenle munepa onookhalihani ipottha ni oniwiirihani-tho woova. Ohiya-vo, muhaakhela munepa onniiriha okuxiwa wira nikhale anamwane* a Muluku. Munepa owo, onniniiriha okhuwela, niiraka: “Abba,* Tiithi!”
16 Munepa wa Muluku onninikupaliha* wira na anamwane a Muluku tthiri.
17 Akhala wira na anamwane a Muluku, nnimwaakhela etthu Muluku onivaha awe. Nave-tho, onoonivaha etthu envahale awe Kristu. Masi nihaana toko ohaawa hoothe, wira nivuwihiwe hoothe.
18 Tivo, ohaawa onniphwanya vano khahiyo etthu, nalikanyiha ni etthuvo yuulupale Muluku onrowa awe onivaha muhoolo.
19 Soopattuxiwa sotheene sinnimulipelela vanceene Muluku, wira aasuwelihe anaawe.
20 Soopattuxiwa khisaaphavela olamuliwa wira sikhaleke sihilipelelaka etthu muhoolo, masi Muluku aaheemererya eyo. Tivo, okathi Muluku aalamunle awe, owo aahinivaha nlipelelo.
21 Vano, soopattuxiwa khasinrowa-tho okhala ipottha sa etampi ni okhwa. Nto, sinrowa ophwanya otaphuwa woovuwa wa anamwane a Muluku.
22 Noosuwela wira mpakha-va, soopattuxiwa sotheene sinnuupulela vamosa ni sinnihaawa vamosa.
23 Ohiya eyo paahi, hiyo naakhenle epantta yoopacerya ya etthuvo, eyo piiyo, munepa woowaarya, ninniipulela vamurimani vahu, nimulipelelaka Muluku onikuxa wira nikhale anaawe.* Owo onniwerya opaka eyo, okhala wira Kristu ooliva,* wira noopoliwe mweerutthuni mwahu.
24 Okathi noopoliwe ahu, hiyo noophwanya nlipelelo nna. Nlipelelo nnooneya, khahiyo nlipelelo neekeekhai. Niireke mutthu onnilipelela etthu onoona awe?
25 Masi naalipelelaka etthu nihinoona ahu, hiyo ninnitepa olipelela etthu eyo nivilelaka.
26 Nave munepa woowaarya onoonikhaliherya okathi onitteettheya ahu. Okathi owo, hiyo pooti osuwela wira nihaana ovekela, masi nihinasuwela etthu yoovekela. Vano munepa woowaarya, pooti onivekelela okathi onuupulela ahu, nihiweryaka ohimya moolumo ookhalela.
27 Muluku onnitokosa mirima sahu, ni onnisuwela etthu munepa onihimya awe, okhala wira munepa owo onnivekela ottharihaka ele Muluku onaaphavelela awe ale oororomeleya.*
28 Hiyo noosuwela wira Muluku, onniiriha miteko sawe sotheene ovara vamosa, wira saakumiherye mureerelo ale animphenta, yaawo Muluku owiihanne awe moovarihana ni yoolakela awe.
29 Owo aapacenrye waathokorerya yaawo, nto vahinatthi ophiya okathi, aahilakela wira awo yaarowa okhala ntoko Mwanawe. Siiso, Mwanawe taarowa okhala oopacerya eriyari ya axinna anceene.
30 Nto, Muluku aahiwiihana ale aathanlale awe. Nave owo aahaahimya okhala anaxariya, ale aawiihanne awe. Nuumala-vo, aahaavuwiha ale aahimmye awe okhala anaxariya.
31 Nto, nihimye exeeni mwaha wa itthu iya? Akhala wira Muluku ori ni hiyo, ti pani onrowa onivirikanya?
32 Owo khoovelenle onvaha Mwanawe wira onikhwele otheene ahu. Ohiya paahi onivaha Mwanawe, niireke nave khonrowa onivaha itthu sikina ni murima wotheene?
33 Ti pani oniwerya waahimyana itthu ale Muluku aathanlale awe? Muluku tonaahimya atthu awo okhala anaxariya.
34 Ti pani oniwerya waalamula atthu awo? Khuuvo, okhala wira Kristu Yesu, ohookhwa ni oohihimuxiwa mookhwaani. Vano, owo ori moono woolopwana wa Muluku, nave onninivekelela.
35 Niireke yookhala etthu enrowa onivalaanya ni ophenta wa Kristu? Niireke mixankiho,* ohaawa, olupatthiwa, etala, ohikhalana etthu yoowara,* woopopihiwa, aahiiso otupheliwa,* onoowerya onivalaanya ni ophenta wa Kristu?
36 Soolempwa sinihimya wira: “Okathi wotheene,* ninnihala wiiviwa mwaha wa nyuwo. Atthu annithokorerya ntoko ipwittipwitthi sinrowa wiiviwa”.
37 Masi mwa itthu iya sotheene, hiyo ninnixintta moomalela mwaha wa* ole oniphentale.
38 Tthiri, kinnikupali wira nnakhala okhwa, aahiiso okumi, wala malaikha, nnakhala ikuvernu, aahiiso itthu sikhanle vano wala itthu sinrowa okhumelela muhoolo, nnakhala owerya,
39 hata itthu sa musulu, nnakhala itthu sa vathi, aahiiso itthu sikina sipattuxiwe, khasiniwerya onivalaanya ni ophenta wa Muluku, weiwo onooniheriwa mwa Kristu Yesu, Pwiya ahu.
Inoota
^ Nuulumo na ekereku nirumeeliwe-va, nnihimya omukuxa mwaana ohimuyanre awe, onamulepiha wira okhale awawe.
^ Nuulumo na eheeberi aahiiso aramaiko, nenlo nintaphulela “Khoo, Tiithi!”
^ Ekereku, “onnivaha onamoona ni munepa ahu”.
^ Nuulumo na ekereku nirumeeliwe-va, nnihimya omukuxa mwaana ohimuyanre awe, onamulepiha wira okhale awawe.
^ Nwehe Moolumo Ootthokiheriwa ani: “Yoowoopola”.
^ Ekereku, “ale oowaarya”.
^ Ekereku, “maxakha”.
^ Ekereku, “ohiwara etthu”.
^ Aahiiso, “xoowa; espaata”.
^ Ekereku, “Nihiku notheene”.
^ Aahiiso, “ni owerya wa”.
