aRoma 13:1-14
13 Niwiiweleleke makhulupale a mulaponi,* yaawo annilamulela. Khuuvo orina okhulupale, oheemereriwe ni Muluku. Khula mmosa a yaawo, ookhalihiwa opuro awe ni Muluku.
2 Tivonto, ole onaavirikanya makhulupale, onnivirikanya mukhalelo okumiheriwe ni Muluku. Nto ale anivirikanya siiso, anoophukeliwa.*
3 Ale anipaka itthu sooreera, khaniwoova makhulupale, masi ale anipaka itthu sootakhala, taniwoova. Niireke munniphavela ohiwoova makhulupale? Mpakeke itthu sooreera, nto awo animoottottopelani.
4 Makhulupale awo, arumeyi a Muluku, nave aakhalihiwa mapuro aya wira yoophwanyihekeni mureerelo. Masi mwapaka etthu yoohiloka, mooveke, okhala wira awo aakhalana owerya* wa woohukhumuni, nto khanipaka eyo mahala ene. Awo arumeyi a Muluku, anaahukhumu ale anipaka itthu sootakhala.
5 Nto, nookhala nthowa nuulupale ninwiirihani owiiwelela makhulupale. Khahiyo mwaha wa woova onanariwa waya paahi, masi-tho mwaha wa murima* anyu.
6 Tivo muniliva anyu mpoosito, okhala wira awo arumeyi a Muluku, anaavarela muteko atthu otheene. Annivara muteko owo okathi wotheene.
7 Munvaheke khula mutthu etthu oniphwanela awe: ole onivekela mpoosito, munvaheke mpoosito; ole onivekela musurukhu wa kuvernu, mmuliveke musurukhu wa kuvernu; ole onivekela wooviwa, mmooveke; ole onivekela ottittimihiwa, mmuttittimiheke.
8 Muhikopheke etthu ehinwerya anyu oliva, masi muhaana ophentana mukina ni mukhwaawe, okhala wira ole onimphenta mukhwaawe, onneettela nlamulo.
9 Nlamulo noowi: “Muhiraruwe, muhimwiive mutthu, muhiiye, muhikhaleleke nrima itthu sa aneene”, vamosa ni sooruma sotheene siniphwanyaneya Munlamuloni, siniirela mpantta nlamulo nimosa paahi, nenlo nnihimya wira: “Mumphenteke mukhwiinyu ntoko muniiphenta anyu”.
10 Ole oniphenta, khoniwiirela sootakhala akhwaawe. Tivo, ole oniphenta, onneettela nlamulo.
11 Mwiireke siiso, maana munnisuwela okathi ola ninkhala ahu. Ola okathi woovenya mwaarupa anyu, okhala wira vano woopoliwa wahu onnitepa waattamela, ovikana okathi naapacenrye ahu waamini.
12 Ohiyu ohanle omala, nave vanihala vakhaani oxa. Vano nihiye ovara miteko sa epiphi, masi nikuxe ikapwitthi sa muthuko.
13 Nikhalaneke mukhalelo wooreera,* ntoko atthu anivara muteko nipuro nookokola. Nihipakeke ifesta sootakhala,* nnakhala ohapaliwa, orupihana woohiloka, nihikhalaneke mweettelo woohiloka onooniherya ohuuliwa muru,* nihiwaneke, aahiiso nihikhalaneke nrima.
14 Mmutakiheke Pwiya Yesu Kristu, nave muhimpakeleke palano moota munrowa anyu opaka etampi.*
Inoota
^ Eyo piiyo, anamalamulela a kuvernu.
^ Aahiiso, “anoolamuliwa; anoohukhummwa”.
^ Ekereku, “xoowa; espaata”.
^ Nwehe Moolumo Ootthokiheriwa.
^ Aahiiso, “Neetteke saana”.
^ Ifesta seiye khula mutthu onipaka awe etthu eniphavela awe.
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
^ Ekereku, “soophavela sa erutthu”.
