Wahala a Nenli 30:1-27
-
Ezekiya onnimpaka Paasikha (1-27)
30 Ezekiya aahiruma wiihaniwa atthu ootheene a wIsarayeli ni a oYuda, nave aahaalepela ikarta atthu a wEfrayimi ni a oManase, wiira arowe empa ya Yehova oYerusalemu, yampakele Paasikha Yehova, Muluku a atthu a Isarayeli.
2 Masi, mwene, makhulupale awe ni muloko wootheene wa oYerusalemu, yaahithanla ompaka Paasikha mweeri wa nenli,
3 okhala wiira khiyaawenrye ompaka Paasikha okathi wooreerela, maana khiyaakhanle anamukuttho anceene yaireerinhe, nave atthu khiyaathukumanne oYerusalemu.
4 Yoothanla eyo yaahimusivela mwene ni muloko wootheene.
5 Siiso, yaahilakela waaleela atthu ootheene a wIsarayeli, okhuma oBeri-Xeba mpakha oDani, wiira atthu arwe ampakele Paasikha Yehova, Muluku a atthu a Isarayeli, oYerusalemu, okhala wiira khiyaatonko ompaka Paasikha ntoko ekurupu, attharaka ele yaalempwale.
6 Atthu ale yaakunxe ikarta sa mwene ni sa makhulupale awe, yaaheetteetta wIsarayeli wootheene ni oYuda, ntoko mwene aarumme awe oriki: “Nyuwo atthu a Isarayeli, mmutthikele Yehova, Muluku a Abrahamu, a Isaakhi ni a Isarayeli, wiira owo aatthikele ale ahanle, yaawo yooponwe mmatatani mwa mamwene a wAsiiria.
7 Muhaatakihe amuhavinre anyu ni axinninyu yaawo yahaaroromeleyale wa Yehova, Muluku a amuhavinre aya, mpakha owo waakumiherya ehasara, ntoko munoona anyu.
8 Muhuumihe mirima sanyu, ntoko amuhavinre anyu. Mwiivahererye wa Yehova ni murowe opuro awe woowaarya yoowo oreerihale awe mahiku ootheene, nave mmurumeeleke Yehova Muluku anyu, wiira owo ohiye onanariwa vanceene ni nyuwo.
9 Mwamutthikela Yehova, axinninyu ni aniinyu anoomoreliwa ikharari ni ale yaakunxe ntoko ipottha, nave animweemereriwa otthikela elapo ela, okhala wiira Yehova Muluku anyu, onnoona othunku ni toomoriwa ikharari. Nto mwamutthikela, owo khonrowa wookhoottani”.
10 Alopwana ale yaarummwale yaahirowa khula epooma aviraka elapo ya wEfrayimi ni oManase, mpakha oZabuloni, masi atthu yaanaatheya ni khiyaacala.
11 Masi, atthu akina a wAxeri, a oManase ni a oZabuloni, yaahiiyeviha anarowa oYerusalemu.
12 Nave, ntata na Muluku eekeekhai naari oYuda wiira owiiraanihe* atthu ni yiiraneye ele mwene ni makhulupale yaarumme aya, attharaka moolumo a Yehova.
13 Mweeri wa nenli, muttitthi wa atthu waahithukumana oYerusalemu, wiira apake Efesta ya Iphaawu Soohiheliwa Eferemento. Tthiri waahikhala muloko muulupale wa atthu.
14 Awo yaahipacerya waakumiha altaari yaari oYerusalemu, nave yaahaakumiha altaari ootheene a nsenso yaarihela okhatoni wa oKeduroni.
15 Nuumala-vo, yaahihita inama sa mukuttho wa Paasikha, nihiku na namuloko ni xexe na mweeri wa nenli. Anamukuttho ni alevi yaahuuliwa muru, tivo yaahiireeriha ni yaahiruuha mikuttho soopahiwa empa ya Yehova.
16 Awo yaaheemela opuro aya, attharaka nlamulo na Moise, mulopwana a Muluku eekeekhai. Moottharelana, alevi yaahaavahererya anamukuttho ephome, nto awo yaahikuxa ephome eyo attikitthela valtaari.
17 Yaahikhala atthu anceene muloko ole yahaireerinhe, nave alevi yaahikhalana muritti woohita inama sa mukuttho wa Paasikha, para atthu ootheene yahaareerihiwe, wiira areeriheliwe Yehova.
18 Yaahikhala atthu oowaatta, otepexa wene a nloko na Efrayimi, na Manase, na Isakari ni na Zabuloni, yaamunlye Paasikha ahiireerinhe, avirikanyaka ele elempwale. Nto Ezekiya aahaavekelela oriki: “Yehova, yoowo ori ooreera murima aalevelele
19 atthu ootheene yaawo alokihenrye murima aya wiira amphavele Muluku eekeekhai, Yehova, Muluku a amuhavinre aya, nnaamwi ahiireerinhe attharaka malakiheryo a wiireeriha”.
20 Vano Yehova aahinwiriyana Ezekiya ni aahaalevelela* atthu ale.
21 Siiso, aisarayeli yaari oYerusalemu yaahipaka Efesta ya Iphaawu Soohiheliwa Eferemento, mahiku 7 atteeliwe ene murima. Nave alevi ni anamukuttho yaanimuttottopela Yehova nihiku ti nihiku, arumihaka voowiiwanyeya ikaruma saya sa isipo para Yehova.
22 Nave-tho, Ezekiya aahaalipiha murima alevi ootheene yaawo yaamurumeela Yehova ni ankhili. Nto yaahiviriha mahiku 7 alyaaka efesta eyo, avahaka mikuttho sa opatthani ni amuxukhurelaka Yehova Muluku a amuhavinre aya.
23 Moottharelana, muloko wootheene waahilakela oviriha-tho mahiku 7 atthapelaka efesta eyo. Siiso yaahiviriha mahiku 7 atthapelaka efesta eyo, atteeliwe ene murima.
24 Ezekiya mwene a oYuda, aahivaha muloko ole ipooyi 1.000 ni ipwittipwitthi 7.000, nave makhulupale yaahivaha muloko ole ipooyi 1.000 ni ipwittipwitthi 10.000. Nto anamukuttho oowaatta yaaniireeriha.
25 Muloko wootheene wa oYuda, anamukuttho, alevi, muloko wootheene waakhumme wIsarayeli, ni anamurwa yaakhumme elapo ya wIsarayeli ni ale yaakhala oYuda, yaanitteeliwa murima.
26 Nto waahikhala otteeliwa murima wuulupale oYerusalemu, okhala wiira okhuma mahiku a Salomoni, mwaana a Davidi, mwene a wIsarayeli, khiyaatonko wiiraneya etthu siisa oYerusalemu.
27 Nuumala-vo, anamukuttho alevi yaaheemela ni yaahaareeliha atthu. Nto Muluku aahiiwa moolumo aya, nave mavekelo aya yaahiphiya opuro awe woowaarya, wiirimu.
