Wahala a Nenli 19:1-11
19 Moottharelana, mwene Yosafati a oYuda, aahitthikela owannyawe* oYerusalemu ni murettele.
2 Yehu, mwaana a Hanani, yoowo aasuwela otaphulela itthu ooniheriwe awe ni Muluku, aahirowa okumana ni Yosafati, onamuhimeerya wiira: “Munuupuwela wiira etthu yooloka, waakhaliherya atakhali ni waaphenta ale animunyokha Yehova? Mwaha wa yeeyo, Yehova oonanariwa ni nyuwo.
3 Masi, Muluku oophwanya itthu sooloka vamurimani vanyu, okhala wiira moomala-maliha miri saakokhoreliwa* elapo ela, nave moolakela vamurimani vanyu omphavela Muluku eekeekhai”.
4 Yosafati nlelo aakhala oYerusalemu, nto aahivenya wiira orowe aaxukurye atthu a oBeri-Xeba, muttetthe wa omiyaakoni wa wEfrayimi wiira aattikiherye wa Yehova, Muluku a amuhavinre aya.
5 Nave-tho, owo aahaathanlela alipa-oophuka elapo yootheene. Khula epooma yoolipihiwa aahikhala mulipa-oophuka.
6 Vano owo aahaahimeerya alipa-oophuka awo wiira: “Mukhalane ephoole ni ele munivara anyu, okhala wiira khamuniphuka ni nsina na mutthu, masi muniphuka ni nsina na Yehova, nto owo onookhalaka ni nyuwo okathi munrowa anyu ophukaka mulattu.
7 Vano mmooveke Yehova. Mukhalane ephoole ni ele enivara anyu, okhala wiira Yehova Muluku ahu khonivilela ohixariya, khonaathanla atthu, nnakhala khoneemererya okunyariwa”.
8 Nave, oYerusalemu, Yosafati aahaathanla alevi akina, anamukuttho ni ahooleli a imusi sa atthu a Isarayeli wiira arumeeleke ntoko alipa-oophuka a Yehova, ni wiira ephukeke milattu sa atthu yaakhala oYerusalemu.
9 Owo aahaaleela-tho wiira: “Etthu mukhanle anyu oopaka mmoovaka Yehova moororomeleya ni murima wooloka tiila:
10 Okathi axinninyu anikhala ipooma sikina anrowa aya oruuha mulattu aya onivarihana ni wiiva aahiiso okoha etthu enivarihana ni nlamulo, yooruma, ikano, aahiiso malakiheryo, muhaana waavaha miruku wiira awo ahikhalane mulattu ohoolo wa Yehova. Mwaahiire siiso, owo onoonanariwa ni nyuwo vamosa ni axinninyu. Ela ti etthu mukhanle anyu oopaka wiira muhikhalane mulattu.
11 Amariya, mukhulupale a anamukuttho, tonrowa ohoolelaka myaha sootheene sinivarihana ni muteko wa Yehova. Zebadiya, mwaana a Iximayeli, tonrowa ohoolelaka imusi sa oYuda, myaha sootheene sinivarihana ni mwene. Nave alevi anrowa ovara muteko ntoko makhulupale. Mwiilipihe ni mpacerye ovara muteko, nave Yehova okhale ni ale anipaka itthu sooloka”.
