Wahala a Nenli 1:1-17
1 Omwene wa Salomoni mwaana a Davidi waanitepa olipa, nave Yehova Muluku awe aari ni yena ni aanimukhaliha oowerya vanceene.
2 Salomoni aahiruma wiihaniwa atthu ootheene a Isarayeli: maxeefi a atthu 1.000, maxeefi a atthu 100, alipa-oophuka, makhulupale ootheene a atthu a Isarayeli ni ahooleli a imusi saya.
3 Nuumala-vo, Salomoni ni nloko nootheene naahirowa opuro woorakamela osulu waakokhoreliwa Muluku, oXibeyoni. Ti weiwo yaari aya etenta ya muthukumano ya Muluku eekeekhai, etenta yeeyo Moise murumeyi a Yehova, aapanke awe woothakoni.
4 Masi, Davidi aahikumiha nivuku na nivarihano na Muluku eekeekhai oKiriyathi-Yarimi, oroiha opuro aalokihenrye awe, okhala wiira aaheemexa etenta wiira opwehe nivuku nlo oYerusalemu.
5 Vano altaari a ekoopiri yoowo aapakiwe ni Besaleli, mwaana a Uri, mwaana a Huri, yaapwehiwe ohoolo wa etabernaakulu ya Yehova. Nto Salomoni ni nloko nootheene naanivekela ohoolo waya.*
6 Salomoni aahinvaha Yehova mikuttho soopahiwa 1.000 valtaari a ekoopiri, yoowo aari ohoolo wa etenta ya muthukumano.
7 Ohiyu ene yoole, Muluku aahimukhumelela Salomoni onamuhimeerya wiira: “Mukivekele etthu muniphavela anyu wiira koovaheeni”.
8 Nto Salomoni aahimuhimeerya Muluku oriki: “Nyuwo moomooniherya ophenta wuulupale woororomeleya paapa aka, Davidi, nave mookikhaliha mwene nipuro nawe.
9 Vano, khoo Yehova Muluku, etthu mmuleihenrye anyu paapa aka Davidi, ekhale etthu yoororomeleya, okhala wiira mookikhaliha mwene a atthu ala ahireere waatta, anlikana ni ntthupi na vathi.
10 Tivo, mukivahe miruku ni osuwela wiira kiwerye waahoolela atthu ala. Tani oniwerya waaphukela atthu anyu ala ahireere waatta?”
11 Vano Muluku aahimuhimeerya Salomoni wiira: “Okhala wiira eyo ti etthu eniphavela murima anyu ni khamukivekenle mihakhu, mireerelo, ottittimiheya, okhwa ale anoonyokhani nnakhala khamukivekenle okumi munceene, masi nvekenle miruku ni osuwela wiira nwerye waaphukela atthu aka, yaawo kookhalinhaakani mwene aya,
12 kinimoovahani miruku ni osuwela, masi-tho kinimoovahani mihakhu, mireerelo ni ottittimiheya, waavikana mamwene ootheene mwaaranttenle anyu, ni ale anrowa okhumelela muhoolo”.
13 Vano Salomoni aahihokolowa opuro woorakamela osulu waakokhoreliwa Muluku oXibeyoni, ohoolo wa etenta ya muthukumano onarowa oYerusalemu, weiwo aalamulela awe aisarayeli.
14 Salomoni aanitepa wiithukumanyerya ikaaro sa ekhotto ni ikhavalo. Owo aahikhalana ikaaro sa ekhotto 1.400, ni ikhavalo* 12.000. Nave aanipweha ikaaro iyo sa ekhotto ni ikhavalo mpooma ni oYerusalemu waattamela wa mwene.
15 Mwene aahisariha eparatha ni eweero oYerusalemu, ntoko maluku, nave aahisariha matera a eseeturu, ntoko miri sa ifiiku sa oXefela.
16 Ikhavalo sa Salomoni saakumihiwa wExiitu. Ekurupu ya alipa a nakoso a mwene, yaanithuma ikhavalo* eperesu yaakhala aya.
17 Khula ekaaro ya ekhotto yaakumihiwa wExiitu, yaakhala musurukhu 600 wa eparatha, nave ekhavalo yaakhala musurukhu 150 wa eparatha. Nuumala-vo, yaanaaroihela mamwene ootheene a ahiti ni mamwene a oSiiria.
Inoota
^ Ahiiso, “yaanimukoha opuro ole”.
^ Aahiiso, “anakhavalo”.
^ Aahiiso, woonasa wene: “Okhuma wExiitu ni Okewe. Alipa a nakoso a mwene yaathuma Okewe”. Woonasa wene onihimmwa oSiliisiya.
