Samuweli a Nenli 22:1-51
22 Davidi aahilavula ni Yehova omwiipelaka nsipo nla, nihiku Yehova aamooponle awe mmatatani mwa awanani awe ootheene ni mmatatani mwa Sawuli.
2 Davidi aahihimya wiira:
“Yehova mwala aka, ntthyawelo naka ni tonkoopola.
3 Muluku aka ti mwala aka weiwo kinitthyawela aka,Eskuutu aka ni moopoli aka oowerya,* ni opuro aka woolipa,Weiwo kinitthyawela aka. Ti nyuwo munikaakiherya mutthu ootakhala.
4 Kinninvekela Yehova nikhaliheryo, maana tomphwanela ottottopeliwa,Nave onrowa okoopola mmatatani mwa awanani aka.
5 Okhwa woohonona sootheene eriyari aka, ntoko maasi* a mphareya,Atthu anceene ootakhala aakikhumelela, nave miyo kaahoova ntoko osareya wa muro.
6 Mikhoyi sa Mahiye* sookiwayiha;Miraakho sa naakhwa sookihopha.
7 Moovelavelani mwaka, konvekela Yehova,Koomukhuwelela Muluku aka.
Mutemplo mwawe, oowiriyana nsu naka,Nave oowiriyana omukhuwelela waka kivekelaka nikhaliheryo.
8 Elapo yaahipacerya ottikinyeya ni othukumela;Alisenso a erimu yaahitetereya,Nave yaahithukumela okhala wiira owo aahinanariwa.
9 Mphulani mwawe mookhuma mwiixi,Nave mwaano mwawe mookhuma mooro onipaha itthu sootheene;Makhala a mooro anipatta, aakhuma wa yoowo.
10 Okathi Muluku aakhuruwa awe, erimu yaahuuramaMmettoni mwawe yaahikhala meeku ooriipa.
11 Owo aahirwa ovavaka, okilanthi ene vanlaikhani.*
Aanooneya mmapuphani na nlaikha.
12 Nto owo aahipweha epiphi mukerekhere mwawe ntoko ntthyawelo,Nave yaahikhala maasi ooriipa ni meeku a epula.
13 Eriyari awe waahikhala waarya, waakhala ntoko makhala a mooro.
14 Yehova aahipacerya okukutteya* wiirimu;Nsu na Muluku Muulupalexa naahiiwanyeya.
15 Owo aahivonya mattheere, aamwarya-mwarya awanani awe,Ni overunya aakumihenrye awe awo yaahoova ahinoona etthu yoopaka.
16 Wiixerya wa ephareya waahooneya,Alisenso a elapo aahikhumelela mwaha wa onanariwa wa Yehova,Ni mwaha wa iphumu sinceene soowerya saakhuma mphulani mwawe.
17 Ori ene wiirimu ookookolela ntata nawe;Ookivarela ni ookikumiha mmaasini moowiixa.
18 Owo ookaakiherya nwanani aka ootupa,Ale yaakinyokha, yaari oowerya okivikana miyo.
19 Awo yaahiwana ni miyo nihiku kavelavenle aka;Masi Yehova taakikhalihenrye.
20 Owo aahikikuxa okiroihaka opuro woovareleleya,Aahikoopola, okhala wiira aanisiveliwa ni miyo.
21 Yehova onnikitthuvela ottharaka exariya aka;Onnikiliva okhala wiira matata aka khatthenke.
22 Miyo nkinihiya weetta iphiro sa Yehova,Nave nkipamke etthu yootakhala wiira kimunyanyale Muluku aka.
23 Malamulo awe ootheene ari ohoolo waka;Nkinrowa ohiya weettela sooruma sawe.
24 Kinothipelela opaka itthu sooloka ohoolo wawe,Nave kinimwiikhapelela wiira kihipake etthu yootakhala.
25 Woonasa wene Yehova onookitthuvela ottharihaka exariya aka
Moovarihana ni ohittheka waka ohoolo wawe.
26 Nyuwo munniroromeleya ni mutthu oororomeleya,Munnimuthokorerya mwa xariya mutthu onilavula ekeekhai.
27 Nyuwo munniroromeleya ni atthu oororomeleya,Masi khamuniwokiwa ni atthu oowootha.
28 Nyuwo munniwoopola atthu oowiiyeviha,Nave munnaayeviha atthu oowiixinnuwiha, maitho anyu khansiveliwa naawo.
29 Khoo Yehova nyuwo mwa muthuko aka;Yehova tonikimwaleela kakhala mweepiphini.
30 Kikhaliheriwaka ni nyuwo kinniwerya waatuphela alavilavi;Kinniwerya owela ixiri ni ikuru sa Muluku.
31 Miteko sootheene sa Muluku eekeekhai ti sooreera;*Moolumo a Yehova tooloka.*
Owo ti eskuutu ya atthu ootheene anitthyawela wa yena.
32 Tani ori Muluku, ohikhanle Yehova?
Tani ori Mwala, ohikhanle Muluku ahu?
33 Muluku eekeekhai ti ntthyawelo naka noolipa,Owo onooreeriha ephiro aka.
34 Owo onnikiiriha otupha ntoko nahe;Onnikeemexa mapuro oorakamela osulu.
35 Owo tonkixuuttiha owana ekhotto,Miyoono saka sinniwerya okokha muura wa ekoopiri.
36 Nyuwo munnikivaha eskuutu anyu wiira mukoopole,Nave wiiyeviha wanyu onnikivuwiha.
37 Nyuwo munnireeriha ephiro kinivira aka,Tivo nkinrowa omora.
38 Kinoowoomola awanani aka ni kinimwapwetexa;Nkinitthika kihinatthi waamala-maliha.
39 Miyo kinimwaamala-maliha ni kinimwaapwetexa wiira ahitthikele-tho ovenya;Awo anoomora ni kinimwaanyakela ni inawu saka.
40 Nyuwo munookivaha ikuru wiira kawane ekhotto;Munimwaamoroxa awanani aka ohoolo waka.
41 Nyuwo munoowiiriha awanani aka okitthyawa;*Miyo kinimwaamala-maliha* ale anikinyokha.
42 Awo annivekela okhaliheriwa, masi khuuvo oniwoopola;Hata annimukhuwelela Yehova, masi owo khoniwaakhula.
43 Kinimwaaxila mpakha olikana ni ntthupi;Kinimwaaphwatta ni waakhittela ntoko mattophe a mphironi.
44 Nyuwo munookaakiha okathi atthu aka anikilavula aya voohiloka.
Munookikhapelela wiira kikhale muhooleli a maloko;Atthu kihinaasuwela aka anookirumeela.
45 Anamurwa animuurama ohoolo waka yoovaka;Etthu anrowa aya wiiwa kihimmwaka miyo, enoowiiriha okiiwelela.
46 Anamurwa onimwaamalela olipa murima;Anookhuma athukumelaka mapuro yaatthyawenle aya.
47 Yehova onnikhala! Ottottopeliwe Mwala aka!
Ovuwihiwe Muluku aka, yoowo ori mwala onikoopola.
48 Muluku eekeekhai onimwaaliva awanani aka;Owo onniwiiriha atthu okiiwelela.
49 Owo onnikaakiherya awanani aka.
Nyuwo munnikittukhulela osulu wa ale anikituphela;Munnikaakiherya mulopwana ootakhala.
50 Khoo Yehova, tivo kinrowa aka wooxukhuruni eriyari ya maloko,Nave kinimwiipela nsipo nsina nanyu.
51 Owo onnipaka miteko sootikiniha wiira omoopole mwene awe;Nave onnimooniherya ophenta woororomeleya ole omuthanlale awe,Davidi ni osuulu awe, mahiku ootheene”.
Inoota
^ Eheeberi, “nnyaka ninkoopola”. Nwehe Moolumo Ootthokiheriwa ani: “Nnyaka”.
^ Aahiiso, “mawimpi”.
^ Nwehe Moolumo Ootthokiheriwa.
^ Eheeberi, “vakerubi”.
^ Aahiiso, “onyakula”. Eyo piiyo, oruma oniiwanyeya nuumala woopa etari.
^ Eheeberi, “ti soomalela”.
^ Aahiiso, “tooreerihiwa ni mooro”.
^ Aahiiso, “munookivahererya ettuli ya awanani aka”.
^ Eheeberi, “kinimwaamaaliha”.
