2 Pedru 3:1-18
3 Axinnaka oophentiwa, ela epaphelo ya nenli kinoolepelaakani. Ntoko koolepenlyaakani epaphelo yoopacerya, vano kiniphavela wootumereryani, kiwuupuxeryakani wira murumeele wuupuwela wanyu saana,
2 muupuwelaka moolumo yaahimmwale* khalai ni maprofeta oororomeleya, ni soowiixuttiha sa Pwiya ahu ni Moopoli ihu. Soowiixuttiha iyo moowiiwa arummwa.
3 Musuwele etthu ela: Mahiku ookiserya, anookhumelela alipa-ooveeha itthu sooloka, nave anrowa opakaka itthu sootakhala, seiyo sinaasivela.
4 Awo anoohimyaka wira: “Ole aaleihenrye wira onootthika,* ori vai? Okhuma okathi amuhavinre ahu akhwiiye aya, itthu sotheene nlelo siri ntoko saari aya, okhuma okathi sipattuxiwe aya itthu sotheene”.
5 Awo khaniphavela wuupuwela ekeekhai ela: okhuma khalai yaahikhala erimu, ni wira Muluku aahirumeela nuulumo nawe wira ovalaanye elapo ni maasi, ni eriyari ya maasi.
6 Itthu iyo saahaapwetexa atthu a mahiku ale. Eyo yaahiiraneya okathi yoole maasi yaakhunenle aya elapo yotheene ya vathi.
7 Nave, ni nuulumo nimosa-ru, erimu ya vano ni elapo ya vano soosukeriwa opahiwa ni mooro, nihiku ninrowa aya ophukeliwa ni opwetexiwa atthu ootakhala.
8 Tivo, axinnaka oophentiwa, muhiliyale etthu ela: nihiku nimosa ohoolo wa Yehova, ninlikana ni iyaakha 1.000, nave iyaakha 1.000 ohoolo wawe, sinlikana ni nihiku nimosa.
9 Yehova khonipisa omaliherya etthu oleihenrye awe, ntoko atthu akina anuupuwela aya wira onnipisa. Ohiya-vo, owo onnoopixeryani murima, maana khoniphavela wira mutthu opwetexiwe, nnakhala mmosa. Masi oniphavela wira atthu otheene arukunuxe murima.
10 Nihiku na Yehova, nnimoorwa ntoko latarau. Nihiku nlo, erimu enoorimeela ni oruma wuulupale,* nave itthu sa wiirimu ni sa vathi sinooviha ni sinootothowa. Elapo ni itthu sotheene siri memmo sinrowa osuwelihiwa.*
11 Okhala wira itthu sotheene sinrowa ototoxiwa, muthokoreryeke mweettelo anyu, ni etthu munireerela anyu opaka. Mukhaleke atthu anivara miteko sooloka ni mpakeke itthu sinooniherya wira munniroromeleya wa Muluku.
12 Nave, nwehereryeke nihiku na Yehova, muhiliyaleke.* Nihiku nlo, erimu enoopwetexiwa ni mooro, nave itthu sa wiirimu ni sa vathi, sinootothowa mwaha wa oviha vanceene!
13 Ninnilipelela erimu esya ni elapo esya, ntoko Muluku oleihenrye awe, memmo enrowa aya okhala exariya.
14 Siiso, axinnaka oophentiwa, okhala wira munnilipelela itthu iya, mwiimananiheke vanceene wira wookiseryani waya, Muluku oophwanyeeni muhirina nlepa, nnakhala nthowa, masi murina ene murettele.
15 Muthokoreryeke opixa murima wa Pwiya ahu ntoko eparakha ya woopoliwa. Nave, ti siiso oolepenlyaaweni munnihu oophentiwa Paulo, ovahiwaka ankhili ni Muluku.
16 Mweekeekhai, ipaphelo sawe sotheene, oolepa itthu iya. Masi, itthu sikina olempe awe ti soovila wiiwexexa, nave ale ahinsuwela saana* ni ale ahilimpe muupuwelo aya, annihonona itthu iyo, ntoko anihonona aya Soolempwa sikina, yiirelaka opwetexiwa.
17 Tivonto, axinnaka oophentiwa, okhala wira moosuwela itthu iya sihinatthi wiiraneya, mwiipasoopeke wira muhihapuxiwe ni soowiixuttiha soowoothiwa sa atthu ootakhala murima, wira waamini wanyu ohivukuwe.
18 Ohiya-vo, mwiimananiheke wira mutepeke waakhela oreera murima wuulupale ni osuwela wa Pwiya ahu ni Moopoli ahu, Yesu Kristu. Owo ovuwihiweke vano ni mahiku otheene. Amen.
Inoota
^ Aahiiso, “itthu saahimmwale”.
^ Nwehe Moolumo Ootthokiheriwa.
^ Eyo piiyo, oruma wa etthu enivira yaakuveyaka.
^ Aahiiso, “sinoopahiwa”.
^ Aahiiso, “mphaveleke vanceene”. Ekereku, “waakuviha”.
^ Aahiiso, “ahiniixuttiheya”.
