2 aKorinto 8:1-24
8 Axinnaka, vano nimphavela woosuwelihani ele miloko sa oMasedonia sinipaka aya mwaha woowaakhela oreera murima wuulupale wa Muluku.
2 Okathi yeehereriwa aya vanceene ni mixankiho suulupale, awo yaahooniherya otteeliwa murima ni yaahooniherya okhala atthu oovaha, nnaamwi yaari ootepa ohaawa.
3 Miyo kinnaakhalela onamoona wira yaahivaha ntoko yaawerya aya, hata ovikana yaawerya aya.
4 Ikwaha sinceene, awo yaanivekela voohikhanyereriwa, wira naavahe eparakha ya ovaha etthu ni murima wotheene, ni waakhaliherya ale oororomeleya.*
5 Nave yaahipaka ovikana ele naalipelela ahu, epaceryaka waarumeela ni murima wotheene Apwiya vamosa ni hiyo, ettharaka ele Muluku oniphavela awe.
6 Eyo yaahiniiriha omutumererya Tito wira omalihe muteko aapacenrye awe eriyari anyu, eyo piiyo, okuxa soovaha munivaha anyu voohakalala.
7 Nyuwo munniira saana itthu sotheene. Waamini wanyu ti woolipa. Munniwerya olavula. Osuwela wanyu ti woowaatta. Munniimananiha opaka itthu sotheene. Munnaaphenta tthiri atthu akina, ntoko hiyo nnoophentaahuni. Siiso, muthipeleleke ophavela ovaha mwa enamuna eyo.
8 Miyo nkinilavula eyo ntoko yooruma, masi kimphavela wira musuwele wiimananiha ni ophavela orina aya atthu akina. Nave kiniphavela woona ophenta wanyu waari weekeekhai.
9 Tthiri, nyuwo munnisuwela oreera murima wuulupale wa Pwiya ahu Yesu Kristu, yoowo nnaamwi aari oothaaciri, aahiikhaliha masikhini mwaha wa nyuwo, wira nyuwo muthaaciri mwaha wa ohaawa wawe.
10 Nave, moonelo aka tuula: Ovara muteko ola, onnoophwanyihani mureerelo, okhala wira mmwaisana, mwaahipacerya muteko ola, ohiya-vo, mwaahooniherya ophavela wanyu opaka eyo.
11 Vano, mmalelihe muteko mpacenrye anyu ovara. Siiso, munoomaleliha muteko owo, muttharihaka ele erina anyu, ntoko mulakenle anyu khalai ene.
12 Tthiri, Muluku onnisiveliwa vanceene naavahaka ni murima wotheene, maana onilipelela wira mutthu ovaheke ele eniwerya awe, ohiya ele ehiniwerya awe.
13 Miyo nkiniphavela okhweiherya okumi wa atthu akina, nto khiyaxankiha okumi anyu.
14 Okathi ola, okhalana wanyu itthu sinceene onookhaliherya othoiwa waya. Mwiiraka siiso, okhalana waya itthu sinceene onookhaliherya othoiwa wanyu. Siiso, otheene anyu munrowa olikanaka.
15 Ti siiso valempwale aya wira: “Mutthu orina itthu sinceene, khotempe okhalana itthu sinceene, nave mutthu orina itthu vakhaani, khotempe okhalana itthu vakhaani”.
16 Ninnimuxukhuru Muluku, okhala wira Tito onnoothokoreryani ntoko hiyo nniira ahu.
17 Owo oheemererya ele naamulenle ahu, masi-tho, aaniphavela tthiri opaka ele nanvekenle ahu, tivo oolakela orwa wa nyuwo.
18 Vamosa ni Tito, ninnimuruma munna yoowo onittottopeliwa ni miloko sotheene, mwaha wa olaleya ihapari sooreera.
19 Ohiya-vo, owo oothanliwa ni miloko wira neetteke mikwaha hoothe, niroihaka soovaha iya, seiyo ninrowa ahu okawa wira Apwiya avuwihiwe, ni nooniherye wira ninniphavela waakhaliherya akina.
20 Siiso, ninnisyaka olavuliwa voohiloka, mwaha wa moota ninkhapelela ahu itthu iya sinivahiwa ni murima wotheene.
21 Tthiri, hiyo ‘ninnikhapelela itthu sotheene moororomeleya, ohiya paahi vamaithoni va Yehova, masi-tho vamaithoni va atthu’.
22 Nave, ninnimuruma vamosa naawo munnihu, yoowo ikwaha sinceene nimweerenrye ahu, niweha wira onnikhalela nthiti myaha sinceene. Vano onnitepa okhalela nthiti, okhala wira onnoororomelani vanceene.
23 Yakhala atthu anikoha wira Tito ti pani, mwaaleele wira owo onivara muteko vamosa ni miyo wira nookhaliheryeni. Nave-tho, yakhala atthu anikoha wira axinna ala taani, mwaleele wira awo arummwa a miloko, nave anninvuwiha Kristu.
24 Nto, nwooniherye axinna awo wira munnaaphenta ni murima wotheene. Nave, nwooniherye atthu a mmulokoni, ele eniirinhe wiittottopa mwaha wa nyuwo.
Inoota
^ Ekereku, “ale oowaarya”.
