2 aKorinto 7:1-16
7 Tivonto, axinnaka oophentiwa, okhala wira Muluku oonileiherya itthu iya, niirapihe, nikumihaka itthu sotheene sinnanariha erutthu ni murima,* nitepeke waarya nimoovaka Muluku.
2 Munitthukulele murima anyu. Khuuvo nimutthekenle ahu, khuuvo nimukumihenrye ahu muxankiho, nave khuuvo ninwonke ahu wira niphwanye mureerelo.
3 Nkinihimya itthu iya wira koolamuleni. Tthiri, kihoohimeeryani khalai ene wira nyuwo muri vamurimani vahu, wira nikhwe hoothe ni nikhale akumi hoothe.
4 Miyo kinnilavula ni nyuwo kihivithaka etthu. Kinniittottopa vanceene mwaha wa nyuwo. Koolipihiwa vanceene. Kinnitepa otteeliwa murima moohaawani mwahu motheene.
5 Mweekeekhai, okathi naaphiyale ahu oMasedonia, khinaamumunle, masi nlelo naanixanka mwa inamuna sotheene. Atthu yaaninivaanyiha, nave naanixanka mwaha wa miloko.
6 Masi Muluku, yoowo onaahakalaliha ale ariipiwe murima, oonihakalaliha ni orwa wa Tito.
7 Ohiya paahi mwaha wa orwa wawe, masi mwaha woowi ootthika olipihiwe ene mwaha wa nyuwo. Owo oonileela wira munniphavelasa okiweha, ni wira mooriipiwa murima, ni munnixanka* mwaha wa miyo. Nto eyo ennincererya otteeliwa waka murima.
8 Hata muriipiwe ene murima mwaha wa epaphelo aka, miyo nkinthanana. Woopaceryani, kaahiriipiwa murima mwaha wa wooriipihani murima. Masi koosuwela wira oriipiwa wanyu murima waari wa okathi vakhaani.
9 Vano kootteeliwa murima, ohiya mwaha woowi mwaahiriipiwa murima, masi mwaha woowi eyo yoowiirihani orukunuxa murima. Oriipiwa wanyu murima onnivarihana ni ele Muluku eniphavela awe, nto eyo ehookhaliheryani. Tivonto, itthu noohimenryaahuni, khisookumihenryeni muxankiho.
10 Oriipiwa murima onimusivela Muluku, onnikumiherya orukunuxa murima, weiwo onimwiiriha mutthu woopowa, ohithananaka. Masi, oriipiwa murima wa olumwenku ola, onnikumiherya okhwa.
11 Vannooneya wira mwaahiriipiwa murima ntoko Muluku oniphavela awe, nave mwaha wa yeeyo, nyuwo muhiimananiha opaka etthu yooloka. Mooreeriha masina anyu, mwaahinyoonyiwa mwaha wa etthu yoohiloka yaapakiwe, moomoova Muluku, moophavela orukunuxa murima, moomurumeela Muluku ni murima wotheene, moolokiherya etthu yoohiloka yaapakiwe. Moopaka oratteene itthu sotheene wira mphuke mwaha ola.
12 Vano, koolepelakani epaphelo, nkilempe mwaha wa ole opanke etampi, nnakhala mwaha wa ole otthekeliwe. Masi, kilempe wira kiwehe akhala wira munimooniherya ohoolo wa Muluku, wira munniphavela oniwiriyana.
13 Tivonto nlipihiwe ahu.
Masi nootepa otteeliwa murima mwaha wa otteeliwa murima wa Tito, okhala wira otheene anyu moomulipiha.
14 Miyo kihiittottopa ohoolo wa Tito mwaha wa nyuwo, nto nkiittottompe mahala ene. Wiittottopa wahu ohoolo wa Tito ti weekeekhai, siisaale itthu sotheene noohimenryaahuni siri aya seekeekhai.
15 Nave-tho, owo onnitepa woophentani, okathi onuupuwela awe moota otheene anyu muniiwelela anyu, ni moota mmwaakhenle anyu ni nttittimiho nuulupale.
16 Kinnitteeliwa murima okhala wira pooti woororomelani* mwa inamuna sotheene.
Inoota
^ Ekereku, “erutthu ni munepa”.
^ Ekereku, “nthiti nanyu”.
^ Aahiiso, woonasa wene: “wira kilipihiwe mwaha wa nyuwo”.
