2 aKorinto 6:1-18
6 Hiyo ninvara muteko vamosa ni Muluku. Nave ninnooxonttelani wira muhaakhele oreera murima wuulupale wa Muluku, muhiirelaka ovarela etthu.
2 Muluku onihimya wira: “Okathi wooreerela, miyo koowiiwani, nave nihiku na woopoliwa, miyo kihookhaliheryani”. Moone! Vano ola tori okathi wootepexa oreerela. Moone! Vano nla ti nihiku na woopoliwa.
3 Hiyo khanniira etthu enaakwattuliha akina, wira ohikhale mutthu onrowa oveeha muteko oninvarela ahu Muluku.
4 Mwa inamuna sotheene, hiyo ninniixooniherya okhala arumeyi a Muluku: noovilela weehereriwa woovirikana, maxakha, okathi woovela-veliha ni mixankiho.
5 Naahimaniwa, naahitthukweliwa, naahikumana ni mittitthi sootakhala, naahivara muteko woolipa, naahiviriha mahiku makina nihirumpe ohiyu, naahivoliwa etala.
6 Nookhalana okumi wooloka, okumi ahu onivarihana ni osuwela, ninnipixa murima, hiyo na atthu ooreera murima, okumi ahu oneettihiwa ni munepa woowaarya, ophenta wahu khahiyo woowoothererya.
7 Hiyo ninnilavula ekeekhai, ninlipa ni ikuru sa Muluku, nookuxa ikapwitthi sa exariya moono ahu woolopwana* ni woothiyana.*
8 Hiyo ninnivuwihiwa ni khaninttittimihiwa, ninniveehiwa ni ninnittottopeliwa. Ninnihimmwa okhala atthu oowoka, masi hiyo ninlavula ekeekhai.
9 Ninnooniwa okhala atthu oohisuweliwa, masi Muluku onninsuwela, ninkhala ntoko atthu ahanle vakhaani okhwa,* masi naakumi. Ninnooniwa ntoko atthu anivahiwa ehukhumu,* masi khaniiviwe.
10 Atthu anuupuwela wira hiyo na atthu ooriipiwa murima, masi okathi wotheene ninnitteeliwa murima, nnooniwa ntoko alipa-oohaawa, masi ninnaavaha atthu anceene itthu sinceene sooloka. Nnooniwa ntoko atthu ahirina etthu, masi nookhalana itthu sotheene.
11 Axinnaka a oKorinto, ninlavula ni nyuwo nihivithaka etthu, nave ninnoophentani tthiri.*
12 Hiyo khinoowalenleni mirima sahu, masi ti nyuwo muniwalenle mirima sanyu.
13 Kinilavula ni nyuwo ntoko anaaka, nto munithokoreryeke ntoko hiyo nnoothokoreryaahuni. Ni nyuwo-tho mutthukuleke vanceene mirima sanyu.
14 Muhitakaahaneke ni ale ahinaamini.* Exariya enivarihana sai ni otakhala? Aahiiso, waarya onivarihana sai ni epiphi?
15 Ohiya-vo, niireke Kristu ni Satana* anniiwanana? Aahiiso, mutthu oowaamini* onivarihana sai ni mutthu oohaamini?
16 Nave, etemplo ya Muluku enivarihana sai ni amuluku eethiru? Hiyo na etemplo ya Muluku mmosa mukumi, ntoko Muluku ohimmye awe wira: “Miyo kinrowa okhala eriyari aya, kinrowa weettaka eriyari aya, kinrowa okhala Muluku aya, nave awo anrowa okhala atthu aka”.
17 “Yehova onihimya wira: ‘Tivonto, mukhume eriyari aya, nvalaane naawo, ni muhiye ovara itthu soonanara’”; “‘ni miyo kinrowa owaakhelani’”.
18 “Yehova, Muluku Oowerya Sotheene, onihimya wira: ‘Nave miyo kinrowa okhala tiithi inyu, ni nyuwo munrowa okhala anaaka axilopwana ni anaaka axithiyana’”.
Inoota
^ Wonasa wene, wira ewane.
^ Woonasa wene, wira yiixaakihe.
^ Aahiiso, “ninnooniwa ophwanelela okhwa”.
^ Aahiiso, “anittaruxiwa”.
^ Aahiiso, “nihootthukulelani mirima sahu”.
^ Eyo piiyo, muhitthukweleliweke vamosa ni mutthu mukina, siisaale enyompe enitthukweleliwa aya ni enyompe ehinlikana aya, orumeeliwaka mwiri mmosa-ru.
^ Aahiiso, “Beliyaali”.
^ Aahiiso, “mutthu oororomeleya”.
