1 Timootheyo 5:1-25
5 Muhimpwapweleke vootakhala mulopwana oowuuluvala. Ohiya-vo, mmuthokoreryeke ntoko paapa anyu. Vano, mwaathokoreryeke amiravo ntoko axinninyu.
2 Athiyana oowuuluvala, mwaathokoreryeke ntoko aximaminyu. Nave, athiyana oohuuluvala, mwaathokoreryeke ntoko axirokorinyu, ni mukhalelo wooloka.
3 Mwaattittimiheke ni mwaakhapeleleke anaamukhweli athiyana, yaawo anikhala mekhaya.*
4 Masi, akhala wira muthiyana naamukhweli ookhalana anamwane ni axisulu awe, awo ahaana wooniherya wira annimoova Muluku, yaakhapelelaka amusi aya. Nave, awo ahaana waavaha itthu sinaathowa axipapaya ni aximamaya, vamosa ni axipiipi aya ni axitaata aya. Eyo ti etthu enimusivela Muluku.
5 Vano, muthiyana naamukhweli, yoowo onikhala mekhawe tthiri, ni ohirina etthu, onnimuroromela Muluku, ni khonihiyererya omuxonttela ni onvekela, othana ni ohiyu.
6 Masi muthiyana naamukhweli, yoowo oniphavela paahi itthu sinimusivela,* owo ohookhwa hata ori ene mukumi.
7 Tivo, mwaavaheke malakiheryo ala,* wira ohikhale mutthu onrowa waahimyana itthu soohiloka.
8 Tthiri, akhala mutthu ohinaakhapelela amusi awe, vanceenexa ale anikhala vatthokoni vawe, owo onnikhootta waamini, nave tootepa otakhala onvikana mutthu ohinaamini.
9 Mmuhele valiistani muthiyana naamukhweli, orina iyaakha sinivikana 60, yoowo aari oororomeleya wa iyawe,
10 nave aasuweliwe mwaha wa miteko sawe sooreera, ntoko waahuwa anamwane, owaakhela aletto, orapiha inawu sa ale oororomeleya,* waakhaliherya atthu oohaawa ni wiivahererya ovara miteko sotheene sooreera.
11 Masi, muhaahele valiistani athiyana anaamukhweli oohuuluvala, okhala wira okathi ophavela waya orupihana onaakhoottiherya aya omurumeela Kristu, awo anrowa ophavelaka otheliwa.
12 Awo anookhalana mulattu mwaha woohiya waamini yaarina aya woopaceryani.*
13 Nave-tho, anniixutta okhala oolosowa, yeetteettaka mmawaani. Ohiya paahi wiixutta okhala oolosowa, masi-tho anniixutta owaapa atthu ni anniikeliha myaha sihikhanle sawaya. Siiso, annilavula itthu yahaareerela aya olavula.
14 Tivo, kiniphavela wira athiyana anaamukhweli oohuuluvala, etheliweke, yaayareke anamwane, ekhapeleleke etthoko aya wira ahaavahe nthowa ale annivirikanya, wira enaapeke.
15 Mweekeekhai, athiyana akina anaamukhweli aahiya ephiro yooreera, enamutthara Satana.
16 Akhala muthiyana oowaamini orina mmusi awe naamukhweli, owo tonrowa omukhaliheryaka naamukhweli owo. Muloko khorina muritti woomukhaliherya. Siiso, muloko onrowa waakhaliheryaka athiyana anaamukhweli* oohaawa, ahirina mutthu oowaakhaliherya.
17 Axitokweene anihoolela saana muloko, ahaana ovahiwa nttittimiho nuulupale, vanceenexa ale anivara muteko ni nthiti, alavulaka nuulumo na Muluku ni yiixuttihaka.
18 Soolempwa sinihimya wira: “Muhitthukwe iyano sa enyompe, okathi eninyakela aya ipyo”, ni “Namuteko onniphwanela oliviwa”.
19 Akhala mutthu mmosa onimuhimyana etthu mutokweene, muhipake etthu. Masi yakhala atthu anli wala araru animuhimyana etthu, nyuwo pooti opaka etthu.
20 Mwaapwapweleke ohoolo wa atthu otheene ale anipaka etampi, wira akina yooveke.
21 Kinnootumereryani oratteene, ohoolo wa Muluku ni wa Kristu Yesu ni wa malaikha oothanliwa, wira mutthareke malakiheryo ala muhaathanyaka nnakhala muhaathanlaka atthu.
22 Muhaakuveleke omwiixaatherya matata mutthu,* nnakhala muhiireleke mpantta itampi sa atthu akina. Muhihiye okhalana mukhalelo wooloka.
23 Muhiwuryeke-tho maasi-ru paahi,* masi nwuryeke eviinyu vakhaani mwaha wa mmirimani mwanyu,* ni mwaha woowi munniwereiwa ikwaha sinceene.
24 Itampi sa atthu akina, sinnisuweliwa ni atthu otheene, nto awo anniphukeliwa voohipisa. Masi itampi sa atthu akina, sinisuweliwa nuuvira okathi.
25 Siiso-tho, miteko sooreera sinnisuweliwa ni atthu otheene, nave hata sihisuweliwaka, iyo khasinwerya wiipithihiwa.
Inoota
^ Aahiiso, “athiyana anaamukhweli ari oothoiwa tthiri”, eyo piiyo, ahirina mutthu oowaakhaliherya.
^ Woonasa wene onihimmwa ophavela orupihana.
^ Aahiiso, “sooruma iya”.
^ Ekereku, “ale oowaarya”.
^ Aahiiso, “etthu yaaleihenrye aya woopaceryani”.
^ Aahiiso, “athiyana anaamukhweli ari oothoiwa tthiri”, eyo piiyo, ahirina mutthu oowaakhaliherya.
^ Eyo piiyo, muhaakuveleke omuthanla mutthu.
^ Aahiiso, “Muhiwuryeke-tho maasi”.
^ Aahiiso, “nipwiipwi nanyu; niphu nanyu”.
